کۆمسیۆنی هەڵبژاردن بۆ پەرەگراف: بە هیچ شێوەیەک کەس نازانێت دەنگدەر دەنگی بە کێ داوە
پەرەگراف
جومانە غەلای وتەبێژی کۆمسیۆنی هەڵبژاردنەکانی عێراق، دەنگدەران دڵنیا دەکاتەوە کە ئازادن لەوەی دەنگ بە چ لایەنێک دەدەن لە هەڵبژاردنی پەرلەمانی کوردستان و دەنگدانەکەیان نهێنییە.
جومانە غەلای بە پەرەگرافی وت "بە هیچ شێوەیەک هیچ کەس و حیزبێک نازانێت دەنگدەر دەنگی بە کێ داوە".
وتەبێژەکەی کۆمسیۆن جەخت دەکاتەوە هەر لایەنێک ئەو بانگەشەیە بکات "ناڕاستە"، کارتی دەنگدان ناوی لەسەر نییەو دەستوری عێراق ئازادیی بەشداریی هەڵبژاردن و نهێنیی دەنگدانی پاراستووە.
وتەبێژەکەی کۆمسیۆن ئەوەش دەخاتەڕوو، فۆرمی دەنگدان ناوی دەنگدەری لەسەر نییەو ئامێری هەژمارکردنی دەنگەکان تەنها ئەو ژمارەیە تۆمار دەکات کە دەنگدەر هەڵیدەبژێرێت لەسەر فۆرمەکەو دەنگی پێدەدات.
ڕۆژی 20-10-2024 دیاریکراوە بۆ هەڵبژاردنی پەرلەمانی کوردستان، کۆمسیۆنی هەڵبژاردن و لایەنە سیاسییەکان پێشوازییان لە دیاریکردنی ڕۆژەکە کردووەو ئامادەن بۆ ئەنجامدانی پڕۆسەکەو ئامادەکارییەکان بەردەوامن.
هەڵبژاردنی خولی شەشەمی پەرلەمانی كوردستان دەبوو لە مانگی 10ـی 2022 بەڕێوەبچێت، سەرباری و فشاری ناوخۆیی و دەرەكی بۆ ئەنجامدانی، بەڵام بەهۆی ناكۆكیی لایەنەكان لەسەر یاسای هەڵبژاردن بە تایبەت پارتی و یەکێتی لەسەر كورسیی پێكهاتەكان، پڕۆسەكە ئەنجام نەدراو پەرلەمان ساڵێک تەمەنی خۆی درێژکردەوە دواتر دادگای فیدراڵیی عێراق درێژکردنەوەکەی بە "نادەستووریی" لە قەڵەم داو پەرلەمانی کوردستانی هەڵوەشاندەوەو هەرێم کەوتە بۆشایی دەسەڵاتی یاسادانان و حکومەت بوو بە کاربەڕێکەر.
پەرلەمانی کوردستان لە ١٠٠ کورسیی پێکدێت و پێنج كورسی بۆ پێكهاتەكان تەرخان کراوە، هەڵبژاردنەکە بە سیستەمی چوار بازنەیی بەڕێوەدەچێت.
پێنج كورسییەکەی پێكهاتەكان بەسەر سێ پارێزگادا دابەش كراون، سێ كورسی لە هەولێرو سلێمانی و دهۆك بۆ پێكهاتەی مەسیحی تەرخان كراوە، دوو كورسیش لە هەولێر و سلێمانی بۆ پێكهاتەی توركمان.
كورسییەكانی پەرلەمان بەم جۆرە دابەش كراون بەسەر پارێزگاکاندا؛ پارێزگای هەولێر 34 كورسی كە دوو كورسییان بۆ پێكهاتەكانە، پارێزگای سلێمانی 38 كورسی كە دوو كورسییان بۆ پێكهاتەكانە، پارێزگای دهۆك 25 كورسی كە یەك كورسیی بۆ پێكهاتەكانە، پارێزگای هەڵەبجەیش سێ كورسی.
هەڵبژاردنەکە تا ئێستا چوار جار دواخراوە، سەرەتا سەرۆكی هەرێم ڕۆژی ١-١٠-٢٠٢٢ی دیاریكرد بۆ هەڵبژاردن، بەڵام لەو ڕۆژەدا نەكراو سەرەڕای سێ جاری دیكەش دیاریكردنی ڕۆژی هەڵبژاردن لەلایەن سەرۆكی هەرێمەوە (١٨-١١-٢٠٢٣ و ٢٥-٢-٢٠٢٤ و 10-6-2024) بەڵام لەو سێ ڕێکەوتەشدا نەکرا.
لە ماوەی سێ دەیە حوكمڕانیی هەرێمی كوردستان و لە دوای یەكەم هەڵبژاردنەوە لە ١٩-٥-١٩٩٢، هیچ پڕۆسەیەكی هەڵبژاردن بۆ پەرلەمانی كوردستان لە وادەی یاسایی و دیاریكراوی خۆیدا بەڕێوە نەچووە.