وەزیری پەروەردە: لە حەوت ڕۆژدا وردبینی لە لیستی وانەبێژان بەمەبەستی دامەزراندنیان بكەن
پەرەگراف
وەزیری پەروەردە بە نووسراوێك سەرجەم بەڕێوەبەرایەتییەكانی پەروەردە ئاگادار دەكاتەوە كە "لە ماوەی حەوت ڕۆژدا" وردبینی لە لیستی ناوی مامۆستایانی وانەبێژی دانەمەزراو بەمەبەستی دامەزراندنیان بە "گرێبەستی هەمیشەیی" بكەن و ڕەوانەی وەزارەتی بكەن.
لە نووسراوەكەدا هاتووە "بە فەرمانی سەركوەزیرانی هەرێم، مامۆستایانی وانەبێژی دانەمەزراو لەسەر داهاتی ناوخۆ دەكرێنە گرێبەستی هەمیشەیی، لیستی ناوی ئەو مامۆستایانەتان بۆ دەنێرین، وردبینیی بكەنەوە و هیچ كەموكووڕییەك نەبێت".
وەزیری پەروەردە دەشڵێت "تەنیا حەوت ڕۆژی كاركردن ماوەتان هەیە بۆ گەڕاندنەوەی لیستەكان بۆ بەڕێوەبەرایەتیی گشتیی دیوانی وەزارەت، ڕۆژی پێنجشەممە 05-09-2024 كۆتا وادەی گەڕاندنەوەی لیستەكانە".
دوێنێ یەكشەممە 25-08-2024، مەسروور بارزانی، سەرۆكی حكومەتی هەرێم، لەگەڵ نوێنەرانی مامۆستایانی وانەبێژی هەرێمی كوردستان كۆبووەوە و دواتر ڕایگەیاند "بڕیارمان دا لەسەر داهاتی ناوخۆی حكومەت هەرێم، سەرجەم وانەبێژان كە ژمارەیان نزیكەی 38 هەزار كەس دەبێت، بكرێن بە گرێبەست".
سەرۆكی حكومەتی هەرێم سوپاسی مامۆستایان و وانەبێژانی كرد كە سەرەڕای دۆخی سەختی دارایی، "كۆڵیان نەداوە و درێژەیان بە ئەرك و پەیامی پیرۆزی خۆیان داوە و بەرپرسیاریەتیی خۆیان بەجێ گەیاندووە".
"بە داخەوە بە شێوەیەكی دادپەروەرانە مامەڵە لەگەڵ هەرێمی كوردستان ناكرێت، هەر بۆ نموونە لە ئاستی حكومەتی فیدراڵدا، لە پارێزگاكانی دیكەی عێراقدا، تەنیا لە ماوەی ساڵێكدا، نزیكەی یەك ملیۆن كەس دامەزراون، بەڵام تەنانەت یەك كەسیان بۆ هەرێمی كوردستان دانەمەزراندووە" مەسروور بارزانی وا دەڵێت.
مامۆستایانی وانەبێژ دەیان خۆپیشاندان و سەدان یاداشتیان ئاڕاستەی حكومەتی هەرێم كردووە لە پێناو دامەزراندنیان بە هەمیشەیی، وانەبێژان بەشێكی سەرەكیش بوون لە بەرەی بایكۆت و خۆپیشاندانەكان لە سلێمانی و هەڵەبجە و گەرمیان و ڕاپەڕین.
مامۆستای وانەبێژ لە هەرێمی كوردستان مووچەیان بەپێی بڕوانامە و ئەو شوێنەی وانەی تێدا دەڵێنەوە جیاوازە، كەمترینیان مانگانە 250 هەزار دینار و زۆرترینیشیان 400 هەزار دینار وەردەگرن.
وانەبێژان لەسەدا 30ی بۆشاییەكانی كەرتی پەروەردەیان پڕكردووەتەوە و لە ئێستادا بودجەی پێویست بۆ شایستە داراییەكانیان نزیكەی ١٤ ملیار دینارە، ئەگەر بكرێنە گرێبەست بڕی چوار ملیار دینار زیاد دەبێت بۆ كۆی ئەو مووچەیەی مانگانە وانەبێژان وەری دەگرن.