پەرەگراف
عەلی حەمەساڵح، سەرۆكی ڕەوتی هەڵوێستی نیشتمانی، دەڵێت "ئەمڕۆ هەنگاوی یەكەممان هەڵگرت بۆ چارەسەری گرفتی مووچە و تەوتین (بەبانكیكردن)، بە تۆماركردنی سكاڵا لەسەر هەردوو سەرۆكوەزیران (مەسروور بارزانی و محەمەد شیاع سوودانی)".
سكاڵاكە لە ڕێگەی پارێزەران ڕێبین شێخ سمایل و محەمەد نەجیمەوە لە دادگای باڵای فیدراڵی تۆمار كراوە.
دەریا محەمەد، یاساناس و مامۆستای زانكۆ، بە نوێنەرایەتیی ڕەوتی هەڵوێست سكاڵاكەی تۆمار كردووە و دەڵێت "هەموو توانا و لێهاتویی خۆمان لە بواری یاساییدا بەكار دەهێنین بۆ ئەوەی بتوانین لە دادگایی فیدڕاڵییەوە بڕیارێك بدرێت كە لە بەرژەوەندیی هەموو مووچەخۆران بێت".
ئامانجی سكاڵاكە ئەوەیە "هەردوو حكومەتی فیدراڵی و هەرێم مولزەم بكرێن بەوەی مووچەخۆران نەكەنە قوربانی كێشەی سیاسییەكانی نێوان خۆیان".
بەپێی بڕیاری دادگای فیدراڵی، دەبێت مووچەی مووچەخۆرانی هەرێم لە بانكە حكومییە فیدراڵییەكانی دەرەوەی هەرێمی كوردستان بەبانكی بكرێت، كە تا ئێستا جێبەجێ نەكراوە، هەروەها نابێت مووچە تێكەڵ بە كێشە سیاسییەكان بكرێت و نابێت ناكۆكیی نێوان حكومەتەكانی هەرێم و عێراق ببێتە لەمپەر لەبەردەم خەرجكردنی مووچەی مووچەخۆرانی هەرێم.