پەرەگراف
ئەمڕۆ وەزارەتی تەندروستیی هەرێمی كوردستان ڕێكارەكانی خۆپارێزی و ئامادەكاری بۆ ڕووبەڕووبوونەوەی نەخۆشیی ئاوڵەی مەیموون لە دامودەزگاكانی تەندروستی دەست پێ دەكات. سێ بڕیار لەوبارەیەوە درا.
هاوكات وەزارەتی تەندروستیی هەرێم هاووڵاتییان دڵنیا دەكاتەوە كە "تا ئێستا هیچ حاڵەتێكی گومانلێكراو نییە". دەشڵێت "بە وردی چاودێریی دۆخی ئەم نەخۆشییە دەكەین و تەواوی ئامادەباشی و ئامادەكاری دەكەین".
ئێوارەی دوێنێ، وەزارەتی تەندروستیی هەرێم كۆبوونەوەیەكی فراوانی بە بەشداریی نوێنەری ڕێكخراوی تەندروستیی جیهانی (WHO) دەربارەی نەخۆشیی ئاوڵەی مەیموون ئەنجام داوە.
بەپێی ڕاگەیەندراوی وەزارەتی تەندروستی، بڕیاریش دراوە لیژنەی باڵای (یەك تەندروستی) (One Health) كە لیژنەیەكی باڵای هاوبەشە لەنێوان وەزارەتی تەندروستی و وەزارەتی كشتوكاڵ، دابنرێت.
هەروەها بڕیارێكی دیكە دانانی پەیامەكانی تەندروستییە بۆ هاووڵاتییان و گەشتیاران، بۆ هۆشیاریی تەندروستی و هەڵمەتی ڕاگەیاندن و ڕۆشنبیریی تەندروستی سەبارەت بە نەخۆشییەكە.
هەنگاوێكی دیكەی وەزارەتی تەندروستی، ئامادەكاری دەبێت بۆ "دابینكردنی تێستی پشكنینی تاقیگەیی"، كە لەگەڵ ڕێكخراوی تەندروستیی جیهانی ئەنجام دەدرێت.
نەخۆشیی ئاوڵەی مەیموون كە نەخۆشییەكی مەترسیدارە، لە ماوەی ڕابردوودا تەشەنەی سەندووە و ئێستا نەخۆشییەكە لە نزیكەی ٢٥ دەوڵەتدا بڵاو بووەتەوە، بەڵام هیچ حاڵەتێك لە عێراق و هەرێمی كوردستان تۆمار دەكراوە.