پەرەگراف
بەڕێوەبەرایەتیی گشتیی ئاسایشی سلێمانی دەستگیركردنی سێ تۆمەتباری سووتاندنی چیای گۆیژەی ڕاگەیاند و دەڵێت "بكەری سووتاندنی درەخت و پووش و پاوان بوون و تێكدانی بەشێك لە ژینگە و سروشتی جوانی چیای گۆیژە بوون".
بەپێی ڕاگەیەندراوی بەڕێوەبەرایەتیی ئاسایشی سلێمانی، ئەو تۆمەتبارانە شەوی 30-07-2024، لەلایەن بەڕێوەبەرایەتیی گشتیی ئۆپراسێونەكانی ئاسایشەوە دەستگیر كراون.
ئاسایشی سلێمانی دەڵێت "تۆمەتباران بەپێی ماددەی (٣٤٢) لە یاسای سزادان ڕاگیراون و ڕووبەڕوی یاسا كراونەتەوە".
لە ماوەی ڕابردوودا زنجیرەیەك ئاگر لە چیاكانی ئەزمەڕ و گۆیژەی سلێمانی كەوتنەوە، زیانمەندترینیان ئەو ئاگرە بوو كە بەرەبەیانی 29-7-2024 كەوتەوە و بەهۆیەوە سەدان دۆنم دارستان و پووش و پاوان سووتان.
ڕۆژی 04-08-2024 قائیمقامی سلێمانی دەستگیركردنی كەسێكی بە تۆمەتی خستنەوەی ئاگر لە ئەزمەڕ و گۆیژە ڕاگەیاند. وتیشی "هەڵمەتێك بۆ چاككردنەوەی تۆڕی دابەشكردنی ئاو و ئاودانی نەمامەكان دەستی پێ كردووە".
ئاوات محەمەد، قائیمقامی سلێمانی، ئاماژەی بەوەش كرد كە "كەوتنەوەی ئەو ژمارەی زۆرەی ئاگر لە ماوەیەكی كەمدا، گومان دروست دەكات كە بە ئەنقەست بن، بۆیە لێكۆڵینەوە لەوبارەیەوە بەردەوامە".
ئێستا هەڵمەتێكی فراوان بۆ "چاككردنەوەی تۆڕی دابەشكردنی ئاوەكان و ئاودانی نەمامەكان و ڕزگاركردنی ئەو دارانەی كە بە تەواوی نەسووتاون" لە گۆیژە و ئەزمەڕ دەستی پێ كردووە، قائیمقامی سلێمانی جەخت دەكاتەوە كە "ئەم ڕووداوانە ساردمان ناكاتەوە و لە سەوزكردنی گۆیژە و ئەزمەڕ بەردەوام دەبین".
سەبارەت بە زیانەكانی ئەو ئاگرانە، ئاوات محەمەد ڕایگەیاند "بەپێی ئەو خەمڵاندنانەی كە كراوە، لە شاخەكانی گۆیژە و ئەزمەڕ زیاتر لە 400 دۆنم دارستان و پووش سووتاوە، زیاتر لە 19 هەزار دار لە تەمەنی جیا جیادا سووتاون".
پێشتر لە ڕۆژی كەوتنەوەی ئاگرە گەورەكەی 29ـی 7، ڕەئوف بایز ئاغا، بەڕێوەبەری پرۆژەی دارستانی گۆیژە، ڕایگەیاند "ئاگرەكە لە سەرەوە دروست بووە، لەو ناوچەی كە گەشتیار و خەڵك لێی دادەنیشن و مەقاڵی و نێرگەلە دادەنێن. ڕەشەباش هۆكار بووە بۆ ئەوەی ئاگرەكە زیاتر تەشەنە بكات".
بەڕێوەبەری پرۆژەی دارستانی گۆیژە سەبارەت بە زیانەكان ڕایگەیاند "تەنیا لە یەك پرۆژەدا كە 240 دۆنمە، 23 هەزار نەمامی تەمەن سێ ساڵ سووتاون، كە تۆڕی ئاویشی هەبووە و بە قەترە ئاو دراون".
هەروەها وتی "پرۆژەیەكی دیكە كە 200 دۆنمە و نزیكەی 22 هەزار نەمامی تێدایە، زیاتر لە نیوەی سووتاوە. 30 بۆ 40 دۆنمیش لە بەشی خوارەوە سووتاوە".
هەر بەهۆی ئاگرەكەوە چەندین داری بەتەمەن سووتان كە لە ساڵی 1947 بەدواوە نێژراون و تەمەنیان 70 بۆ 80 ساڵ دەبوو.