باڵیۆزی ئەمریكا: جەخت لە ئەنجامدانی هەڵبژاردنێكی ئازاد و بێگەرد لە هەرێمی كوردستان دەكەینەوە
پەرەگراف
باڵیۆزی ئەمریكا جەخت لە ئەنجامدانی هەڵبژاردنێكی "ئازاد و بێگەرد" لە هەرێمی كوردستان دەكاتەوە و ڕایشیدەگەیەنێت كە ئەمریكا پابەندە بە كاركردن لەگەڵ حكومەتی هەرێم.
ئالینا ڕۆمانۆوسكی، باڵیۆزی ئەمریكا لە عێراق، دەڵێت "ستیڤ بیتنەر، كونسوڵی گشتیی نوێی ئەمریكا لە هەولێر، لەگەڵ سەركردەكانی حكومەتی هەرێمی كوردستان كۆبووەوە و جەخت لەسەر گرنگیی ئەنجامدانی هەڵبژاردنی ئازاد و دادپەروەرانە لە 20ـی تشرینی یەكەمدا كرایەوە".
باڵیۆزی ئەمریكا لە هەژماری خۆی لە تۆڕی كۆمەڵایەتیی ئێكس، جەختیش دەكاتەوە كە "ئێمە پابەندین بە كاركردن لەگەڵ هاوبەشەكانمان لە حكومەتی هەرێم، بۆ بەرزكردنەوەی سەقامگیری و ئاسایشی عێراق لە ڕێگەی پرۆسەی دیموكراسییەوە".
ستیڤ بیتنەر، كونسوڵی گشتیی نوێی ئەمریكا لە هەولێر، لەگەڵ دەستبەکاربوونى لە چەند ڕۆژى ڕابردوودا سەردانى سەرۆکى هەرێم، جێگر و سەرۆکى حکومەتى هەێم، سەرۆکانى پارتى و یەکێتیى کرد. پرسى هەڵبژاردنى خولى شەشەمى پەرلەمانى کوردستان سەرەکیترین تەوەرى کۆبوونەوەکان بووە.
بەپێى ڕاگەیەندراوى نووسینگەکانى ئەو سەرۆکایەتییانە، لە کۆبوونەوەکاندا جەخت لە ئەنجامدانى هەڵبژاردنێکى "ئازاد، پاک و بێگەرد" لە وادەى دیاریکراودا کراوەتەوە.
نێچیرڤان بارزانی سەرۆکی هەرێمی کوردستان ڕۆژی 20-10-2024ی دیاریکرد بۆ هەڵبژاردنی پەرلەمانی کوردستان، کۆمسیۆنی هەڵبژاردن و لایەنە سیاسییەکان پێشوازییان لە دیاریکردنی ڕۆژەکە کردووەو ئامادەن بۆ ئەنجامدانی پڕۆسەکەو ئامادەکارییەکان بەردەوامن.
هەڵبژاردنی خولی شەشەمی پەرلەمانی كوردستان دەبوو لە مانگی 10ـی 2022 بەڕێوەبچێت، سەرباری و فشاری ناوخۆیی و دەرەكی بۆ ئەنجامدانی، بەڵام بەهۆی ناكۆكیی لایەنەكان لەسەر یاسای هەڵبژاردن بە تایبەت پارتی و یەکێتی لەسەر كورسیی پێكهاتەكان، پڕۆسەكە ئەنجام نەدراو پەرلەمان ساڵێک تەمەنی خۆی درێژکردەوە دواتر دادگای فیدراڵیی عێراق درێژکردنەوەکەی بە "نادەستووریی" لە قەڵەم داو پەرلەمانی کوردستانی هەڵوەشاندەوەو هەرێم کەوتە بۆشایی دەسەڵاتی یاسادانان و حکومەت بوو بە کاربەڕێکەر.
پەرلەمانی کوردستان لە ١٠٠ کورسیی پێکدێت و پێنج كورسی بۆ پێكهاتەكان تەرخان کراوە، هەڵبژاردنەکە بە سیستەمی چوار بازنەیی بەڕێوەدەچێت.
پێنج كورسییەکەی پێكهاتەكان بەسەر سێ پارێزگادا دابەش كراون، سێ كورسی لە هەولێرو سلێمانی و دهۆك بۆ پێكهاتەی مەسیحی تەرخان كراوە، دوو كورسیش لە هەولێر و سلێمانی بۆ پێكهاتەی توركمان.
كورسییەكانی پەرلەمان بەم جۆرە دابەش كراون بەسەر پارێزگاکاندا؛ پارێزگای هەولێر 34 كورسی كە دوو كورسییان بۆ پێكهاتەكانە، پارێزگای سلێمانی 38 كورسی كە دوو كورسییان بۆ پێكهاتەكانە، پارێزگای دهۆك 25 كورسی كە یەك كورسیی بۆ پێكهاتەكانە، پارێزگای هەڵەبجەیش سێ كورسی.
هەڵبژاردنەکە تا ئێستا چوار جار دواخراوە، سەرەتا سەرۆكی هەرێم ڕۆژی ١-١٠-٢٠٢٢ی دیاریكرد بۆ هەڵبژاردن، بەڵام لەو ڕۆژەدا نەكراو سەرەڕای سێ جاری دیكەش دیاریكردنی ڕۆژی هەڵبژاردن لەلایەن سەرۆكی هەرێمەوە (١٨-١١-٢٠٢٣ و ٢٥-٢-٢٠٢٤ و 10-6-2024) بەڵام لەو سێ ڕێکەوتەشدا نەکرا.
لە ماوەی سێ دەیە حوكمڕانیی هەرێمی كوردستان و لە دوای یەكەم هەڵبژاردنەوە لە ١٩-٥-١٩٩٢، هیچ پڕۆسەیەكی هەڵبژاردن بۆ پەرلەمانی كوردستان لە وادەی یاسایی و دیاریكراوی خۆیدا بەڕێوە نەچووە.