کونسوڵی نوێی ئەمەریکا لە هەولێر: هەڵبژاردنی پەرلەمانی کوردستان شەفاف و دادپەروەرانە بێت
پەرەگراف
ستێڤ بیتنەر وەک کونسوڵی گشتیی نوێی ئەمریکا لە هەرێمی کوردستان دەستبەکاربوو، ئەمڕۆ لەگەڵ بەرپرسانی باڵای هەرێم کۆبووەوەو هەڵبژاردنی پەرلەمانی کوردستان تەوەرێکی سەرەکی گفتوگۆکانیان بووە.
بیتنەر چاوی بە نێچیرڤان بارزانی سەرۆکی هەرێم کەوت، کونسوڵخانەی ئەمەریکا لە تۆڕی ئێکس دەڵێت، هەردولا هاوڕابوون لەسەر بەڕێوەچووونی هەڵبژاردنێکی دادپەروەرانەو شەفاف لە 20ی ئۆکتۆبەر.
هاوکات سەرۆکایەتی هەرێم لەبارەی کۆبوونەوەکەوە دەڵێت "كونسوڵى گشتيى نوێى ئهمهريكا بهردهواميى پشتگيرى و هاوبهشى و هاوپهيمانيى وڵاتهكهى لهگهڵ عێراق و ههرێمى كوردستاندا دووپات كردەوە، ههروهها ههردوولا جهختيان له گرنگيى ههڵبژاردنى پهرلهمانى كوردستان كردهوه و هيوايان خواست پرۆسهى دهنگدان سهركهوتووانه بهڕێوهبچێت".
هەر ئەمڕۆ ستێڤ بیتنەر لەگەڵ قوباد تاڵەبانی جێگری سەرۆکوەزیران کۆبووەوە.
تاڵەبانی دەڵێت "هاوڕابووین لەسەر گرنگیی بەڕێوەچوونی هەڵبژاردنێکی پاک و بێگەرد کە دەرئەنجامەکەی رەنگدانەوەی تەواوی خواست و ئیرادەی هاوڵاتییانی هەرێم بێت".
نێچیرڤان بارزانی سەرۆکی هەرێمی کوردستان ڕۆژی 20-10-2024ی دیاریکرد بۆ هەڵبژاردنی پەرلەمانی کوردستان، کۆمسیۆنی هەڵبژاردن و لایەنە سیاسییەکان پێشوازییان لە دیاریکردنی ڕۆژەکە کردووەو ئامادەن بۆ ئەنجامدانی پڕۆسەکەو ئامادەکارییەکان بەردەوامن.
هەڵبژاردنی خولی شەشەمی پەرلەمانی كوردستان دەبوو لە مانگی 10ـی 2022 بەڕێوەبچێت، سەرباری و فشاری ناوخۆیی و دەرەكی بۆ ئەنجامدانی، بەڵام بەهۆی ناكۆكیی لایەنەكان لەسەر یاسای هەڵبژاردن بە تایبەت پارتی و یەکێتی لەسەر كورسیی پێكهاتەكان، پڕۆسەكە ئەنجام نەدراو پەرلەمان ساڵێک تەمەنی خۆی درێژکردەوە دواتر دادگای فیدراڵیی عێراق درێژکردنەوەکەی بە "نادەستووریی" لە قەڵەم داو پەرلەمانی کوردستانی هەڵوەشاندەوەو هەرێم کەوتە بۆشایی دەسەڵاتی یاسادانان و حکومەت بوو بە کاربەڕێکەر.
پەرلەمانی کوردستان لە ١٠٠ کورسیی پێکدێت و پێنج كورسی بۆ پێكهاتەكان تەرخان کراوە، هەڵبژاردنەکە بە سیستەمی چوار بازنەیی بەڕێوەدەچێت.
پێنج كورسییەکەی پێكهاتەكان بەسەر سێ پارێزگادا دابەش كراون، سێ كورسی لە هەولێرو سلێمانی و دهۆك بۆ پێكهاتەی مەسیحی تەرخان كراوە، دوو كورسیش لە هەولێر و سلێمانی بۆ پێكهاتەی توركمان.
كورسییەكانی پەرلەمان بەم جۆرە دابەش كراون بەسەر پارێزگاکاندا؛ پارێزگای هەولێر 34 كورسی كە دوو كورسییان بۆ پێكهاتەكانە، پارێزگای سلێمانی 38 كورسی كە دوو كورسییان بۆ پێكهاتەكانە، پارێزگای دهۆك 25 كورسی كە یەك كورسیی بۆ پێكهاتەكانە، پارێزگای هەڵەبجەیش سێ كورسی.
هەڵبژاردنەکە تا ئێستا چوار جار دواخراوە، سەرەتا سەرۆكی هەرێم ڕۆژی ١-١٠-٢٠٢٢ی دیاریكرد بۆ هەڵبژاردن، بەڵام لەو ڕۆژەدا نەكراو سەرەڕای سێ جاری دیكەش دیاریكردنی ڕۆژی هەڵبژاردن لەلایەن سەرۆكی هەرێمەوە (١٨-١١-٢٠٢٣ و ٢٥-٢-٢٠٢٤ و 10-6-2024) بەڵام لەو سێ ڕێکەوتەشدا نەکرا.
لە ماوەی سێ دەیە حوكمڕانیی هەرێمی كوردستان و لە دوای یەكەم هەڵبژاردنەوە لە ١٩-٥-١٩٩٢، هیچ پڕۆسەیەكی هەڵبژاردن بۆ پەرلەمانی كوردستان لە وادەی یاسایی و دیاریكراوی خۆیدا بەڕێوە نەچووە.