پەرەگراف
لە ناوخۆی هەرێم و دەرەوەی وڵات، چالاكی بۆ ساڵیادی تیرۆركردنی ڕۆژنامەنووس وەدات حسێن بەڕێوە چوو. لە دهۆك هێزە ئەمنییەكان ڕێگرییان كرد و ڕۆژنامەنووسێكیشیان دەستگیر كرد.
لە شاری سلێمانی بە بەشداریی دەیان ڕۆژنامەنووس و چالاكی مەدەنی، مەراسیمێك بۆ هەشتەمین ساڵیادی تیرۆركردنی وەدات حسێن بەڕێوە چوو. تێیدا بەیاننامەی بنەماڵەی ئەو ڕۆژنامەنووسە و ئاژانسی ڕۆژنیووز كە وەدات كاری تێدا دەكرد، خوێندرایەوە. لە لەندەنی پایتەختی بەریتانیاش ژمارەیەك لە ڕۆژنامەنووس و چالاكان چالاكییەكیان بەو بۆنەیەوە ئەنجام دا.
بەڵام ئێوارەی ئەمڕۆ ژمارەیەك لە چالاك و ڕۆژنامەنووسان هەوڵیان دا چالاكییەك لەسەر گۆڕی ئەو ڕۆژنامەنووسە ئەنجام بدەن، كەچی هاوشێوەی ساڵانی ڕابردوو لەلایەن هێزە ئەمنییەكانی دهۆكەوە ڕێگرییان لێ كرا.
هێزە ئەمنییەكانی دهۆك ڕۆژنامەنووس (ئومێد بەرۆشكی)ـشیان دەستبەسەر كرد كە هەوڵی دەدا چالاكییەك بۆ ئەو ساڵیادە ڕێك بخات، پاش چەند كاتژمێرێك ئەمشەو ئازاد كرا.
كەسوكاری ئەو ڕۆژنامەنووسە دەڵێن "وەدات لە شەقامێكی قەرەباڵغی دهۆك و بە ئاشكرا ڕفێندراوە، بەڵام تا ئێستا تۆمەتباران دەستگیر نەكراون، ئەمەش هیچ گومانێك ناهێڵێتەوە كە ئەم تیرۆرە لەلایەن دەسەڵاتەوە یان لەژێر چاودێریی ئەواندا ئەنجام دراوە".
ئاژانسی ڕۆژنیووزیش ڕاستەخۆ پارتی دیموكراتی كوردستان بە "تیرۆركردن"ـی وەدات حسێن تۆمەتبار دەكات و دەشڵێت "دادگای دهۆك لە پاش هەشت ساڵ، لە بەرانبەر تیرۆرێكی ئاشكرا و بە ڕۆژی ڕووناك، لەگەڵ هەبوونی دەیان بەڵگە و دەلیل، هێشتا پەیڤێكی نوێی لەبارەی كەیسی تیرۆركردنی شەهید وەدات حسێنەوە نەدركاندووە، بكوژانی دەستگیرنەكراون و كەیسەكەشی لەلایەن هێزە ئەمنییەكانەوە داخراوە".
ڕۆژنامەنووس وەدات حسێن، پەیامنێری ئاژانسی ڕۆژنیووز، لە بەیانیی 13-8-2016 لە ناوشاری دهۆك لەلایەن چەند چەكدارێكەوە ڕفێندرا و بە ئەشكەنجەدانەوە كوژرا.