پەرەگراف
دەزگای ئاسایشی هەرێمی كوردستان "نزیكەی 250 ملیۆن دەنك حەپ و 125 كیلۆگرام ماددەی هۆشبەر"ـی لەناو برد. ڕایشیدەگەیەنێت كە "بازرگانیكردن بە ماددەی هۆشبەرەوە زیادی كردووە" و هێشتا "زیاتر لە دوو تۆن" ماددەی هۆشبەری دیكە ماون كە دەستیان بەسەردا گیراوە، بۆ لەناوبردنیان چاوەڕوانی یەكلابوونەوەی كەیسەكانیانن لە دادگا.
ئەمڕۆ لە پرۆسەیەكدا لە ناوچەی بازیانی سلێمانی ماددە هۆشبەرەكان لەناو بران و بڕەكانیان بۆ میدیاكان خرایە ڕوو كە "نزیكەی پێنج كیلۆگرام تلیاك، زیاتر لە 15 كیلۆگرام كریستاڵ، زیاتر لە 19 كیلۆگرام حەشیش، زیاتر لە 50 كیلۆگرام مۆرفین و چەندین جۆر ماددەی دیكە" بوون.
دەزگای ئاسایشی هەرێم دەڵێت "لە حەوت مانگی ئەمساڵدا 638 تۆمەتباری ماددەی هۆشبەر دەستگیر كراون، كە 200 بۆ 250 كەسیان ئالوودەبووی ماددەی هۆشبەرن، ئەوانی دیكە بازرگان و فرۆشیاری ماددەی هۆشبەرن".
دەزگاكە دەشڵێت "بەراورد بە حەوت مانگی یەكەمی ساڵی پار، بازرگانیكردن بە ماددەی هۆشبەرەوە زیادی كردووە"
"ماددەی هۆشبەر لە دەرەوەی هەرێمەوە دەهێنرێت و ئەم ناوچەیە (هەرێمی كوردستان) زیاتر وەكوو ترانزێت بەكار دەهێنرێت بۆ گواستنەوەی بۆ ناوەڕاست و باشووری عێراق و دەرەوەی عێراقیش".