دادگای فیدراڵی سكاڵای دژی مەرجەكانی فرەژنیی ڕەت كردەوە؛ دووبارە سكاڵاكە تۆمار دەكرێتەوە
پەرەگراف
دادگای فیدراڵیی عێراق سكاڵای سێ پارێزەری كوردی ڕەت كردەوە كە داوای هەڵوەشاندەوەی ماددەیەكی تایبەت بە مەرجەكانی فرەژنییان لە هەرێمی كوردستان كردبوو. ئەو پارێزەرانە دەڵێن "دووبارە سكاڵاكە بەو جۆرەی كە دادگای فیدراڵی قبووڵی دەكات، تۆمار دەكەینەوە".
سكاڵاكە لەلایەن پارێزەران (ئاسۆ هاشم، موحسین فەرەج و سەردار ئەحمەد)ـەوە لەسەر (سەرۆكی پەرلەمانی كوردستان/سەرباری پیشەكەی) تۆمار كراوە.
دادگای فیدراڵی لەبارەی ئەنجامی سكاڵاكەوە دەڵێت "دادگا سكاڵاكەی ڕەت كردەوە، لەبەر ئەوەی لە سكاڵاكەدا مەرجەكانی بوونی بەرژەوەندیی پێویست بەدی نەهاتووە".
موحسین فەرەج كە یەكێكە لە پارێزەرە سكاڵاكارەكان، بە پەرەگرافی ڕاگەیاند "دادگای فیدراڵی لە ڕووی شكڵییەوە سكاڵاكەی ڕەت كردووەتەوە، لەبەر ئەوەی كەسی زیانمەندبوو لەناو سكاڵاكەدا نەبووە".
سكاڵاكاران داوایان لە دادگای فیدراڵی كردووە، ماددەی یەكەمی یاسای ژمارە 15ـی ساڵی 2008ـی پەرلەمانی كوردستان، بە "نادەستووری" بناسێنێت، كە بریتییە لە هەمواری ماددەیەكی یاسای باری كەسێتیی عێراق.
یاسا عێراقییەكە دوو مەرجی بۆ فرەژنی داناوە، كە بریتییە لەوەی "پیاوەكە توانای دارایی بۆ بەڕێوەبردنی زیاتر لە ژنێك هەبێت و بەرژەوەندییەكی ڕەوای بۆ هێنانی زیاتر لە ژنێك هەبێت". بەڵام لە یاساكەی هەرێمدا ئەو ماددەیە هەموار كراوە و پێنج مەرج بۆ فرەژنی دانراوە.
ئەگەر پیاوێك ژنی دووەم بەبێ ڕەزامەندیی دادوەر و جێبەجێكردنی مەرجەكان بهێنێت، سزا دەدرێت بە زیندانیكردن بۆ ماوەیەك لە شەش مانگ كەمتر و ساڵێك زیاتر نەبێت، بە غەرامەیەكی 10 ملیۆن دیناریش سزا دەدرێت.
پارێزەر موحسین فەرەج بۆ پەرەگراف وتی "ئێمە لە ڕۆژانی داهاتوودا هەوڵ دەدەین كەسێك بدۆزینەوە كە بەهۆی ئەو ماددە یاساییەوە زەرەرمەند بووبێت و بەهۆی هێنانی ژنی دووەمەوە سزا درابێت، دەبین بە وەكیلی ئەو كەسە و دووبارە سكاڵاكە لە دادگای فیدراڵی تۆمار دەكەینەوە".
پێنج مەرجەكەی ناو یاساكەی هەرێم بریتین لە "1- لەبەردەم دادگا ڕەزامەندیی هاوسەری یەكەم لەسەر ژنهێنانی دووەمی مێردەكەی وەربگیرێت. 2- تووشبوونی ژنەكە بە نەخۆشییەكی درێژخایەنی سەلمێنراو كە ڕێگە لە كاری سەرجێیی ژن و مێردایەتی بگرێت، یاخود نەزۆك بێت. 3- ئەو پیاوەی ژنی دووەم دەهێنێت، توانای دارایی وای هەبێت كە بەشی زیاتر لە ژنێك بكات. 4- دەبێت مێردەكە لەبەردەم دادگا بەڵێننامەیەك بە نووسین پێشكەش بكات بە بەدیهێنانی یەكسانی و دادپەروەری لە نێوان هەردوو هاوسەرەكەی. 5- نابێ ژنەكە ئەو مەرجەی لە گرێبەستی هاوسەرگیری دانابێ كە هەوێی بەسەر نەیەت".
پارێزەر موحسین فەرەج دەڵێت "خەڵكێكی زۆر بەهۆی هێنانی ژنی دووەم و جێبەجێكردنی ئەو ماددە یاساییە بەسەریاندا، زەرەرمەند بوون".
لە دوای دەرچوونی ئەو یاسایە لە هەرێمی كوردستان، پیاوانی هەرێم گرێبەستی هاوسەرگیریی دووەم لە دادگاكانی عێراق بە تایبەت كەركووك و خانەقین ئەنجام دەدەن، بەوپێیەی یاسا عێراقییەكە مەرجی ئاسانتری بۆ داناون، بەڵام دوای ئەوەی لە دادگاكانی هەرێم لەلایەن هاوسەری یەكەمیانەوە سكاڵایان لەسەر تۆمار دەكرێت، سزا دەدرێن.