پەرەگراف
پاش زیاتر لە سێ ساڵ و شەش مانگ زیندانیكردنی، نێچیرڤان بارزانی، سەرۆكی هەرێمی كوردستان، لێبوردنی تایبەتی بۆ ڕۆژنامەنووس قارەمان شوكری دەركرد و ئازاد دەكرێت.
بەشدار حەسەن، پارێزەری دۆسیەی دەستگیركراوانی بادینان، ڕایگەیاند "مەرسومی سەرۆكی هەرێمی كوردستان بۆ لێبووردنی تایبەت بە ڕێژەی ٦٠٪ بۆ سزادراوی شاری دهۆك (قارەمان شوكری ڕێكانی) دەرچووە و ئەمڕۆ وێنەی مەرسومەكە گەیشتە بەڕێوەبەرایەتیی چاكسازیی گەورانی دهۆك".
ئەو پارێزەرە دەشڵێت "قارەمان شوكری بەپێی ماددەی یەك لە یاسای ژمارە ٢١ـی ساڵی ٢٠٠٣ـی پەرلەمانی كوردستان سزا درابوو"، كە هەمان ئەو ماددەیە چالاك و ڕۆژنامەنووسانی دیكەی بادینانی پێ سزا دراوە.
ئەو ڕۆژنامەووسە لە 21-1-2021 لەلایەن هێزێكی ئەمنییەوە لە گوندی سیرێیی شیلادزێ دەستگیر كرا و چەند مانگێك بێسەروشوێن بوو، دواتر كەسوكاری لە زیندان بینییان و پێی ڕاگەیاندن كە سزای حەوت ساڵ زیندانیكردنی بەسەردا سەپێندراوە.
ماددەی یەك لە یاسای ژمارە 21ـی ساڵی 2003 دەڵێت "ماددەی 156 لە یاسای سزاكانی عێراقی ژمارە 111ـی ساڵی 1969ـی هەمواركراو لەكار دەخرێت و لە هەرێمی كوردستانی عێراق ئەمە جێگەی دەگرێتەوە: هەركەسێ بەدەستی ئەنقەست و بە هەر شێوەیەك لە كارێكدا تێوەگلێ بەمەبەستی زیاندان لە ئاسایش و سەقامگیری و سەروەریی دامودەزگاكانی هەرێمی كوردستانی عێراق و ببێتە هۆی كەوتنەوەی ئەو زیانە، بە بەندكردنی هەتاهەتا یان بە بەندكردنی كاتی سزا دەدرێت".
لەلایەن بەشێك لە پسپۆڕانی یاسایی و چالاكوانانەوە ڕەخنەی ئەوە لە ماددە یاساییەكە دەگیرێت كە "لاستیكی"یە و جۆری تاوان و سزاكەی بە وردی دیاری نەكردووە، ئەمەش وا دەكات كەڵكی خراپی بۆ سزادانی چالاكان و ڕۆژنامەنووسان لێ وەربگیرێت.