دەستەی دادوەریی هەڵبژاردنەكان بڕیاری هەڵوەشاندنەوەی سێ پارتی نزیك لە پەكەكەی دەركرد
پەرەگراف
دەستەی دادوەریی هەڵبژاردنەكانی سەر بە ئەنجوومەنی باڵای دادوەریی عێراق، بڕیاری هەڵوەشاندنەوەی سێ پارتی نزیك لە پەكەكەی دەركرد و بارەگاكانیان لە سەرتاسەری عێراق دادەخرێن.
پارتی تەڤگەری ئازادی، پارتی ئازادیی دیموكراتی ئێزدی، بەرەی تێكۆشانی دیموكراسی ئەو سێ پارتەن كە بڕیاری هەڵوەشاندنەوەیان دراوە و تۆمەتی ئەوەیان دراوەتە پاڵ كە سەر بە پەكەكەن.
ئەمە دووەم هەنگاوی حكومەتی عێراقە دژی پارتی كرێكارانی كوردستان (پەكەكە)، پێشتر لە 22-4-2024 كە ڕەجەب تەیب ئەردۆغان، سەرۆككۆماری توركیا، سەردانی بەغدای كرد و لەگەڵ محەمەد شیاع سوودانی، سەرۆكوەزیرانی عێراق، بۆ یەكەم جار پەكەكە بە "ڕێكخراوی قەدەغەكراو" ناسێنرا.
بەپێ بەڵگەنامەیەك كە لەلایەن دەستەی دادوەریی هەڵبژاردنەكانەوە دەركراوە و وێنەیەكی دەست پەرەگراف كەوتووە، ئاماژە بەوە كراوە كە لەسەر داوای فەرمانگەی كاروباری پارت و ڕێكخراوە سیاسییەكان، بڕیاری داوە بە هەڵوەشاندنەوەی ئەو پارتانە و "بارەگاكانیان لە عێراق دادەخرێن و دەستیش بەسەر ماڵ و موڵكەكانیاندا دەگیرێت".
ئەوەش خراوە تەڕوو كە ئەو بڕیارە لەسەر بنەمای سكاڵایەكی ڕاوێژكاری ئاسایشی نەتەوەیی عێراق دراوە، پاش ئەوەی "لە لێكۆڵینەوەی فەرمانگەی كاروباری حیزب و ڕێكخراوە سیاسییەكان و زانیارییەكانی دەزگای هەواڵگریی عێراق، ئەوە پشتڕاست كراوەتەوە كە ئەو سێ پارتە پەیوەندییان بە پەكەكەوە هەیە".
هەروەها لە نووسراوەكەدا داوا لە پارت و لایەنەكانی عێراق و دەرەوە كراوە كە "بە هیچ شێوەیەك لە ڕووی دارایی و سیاسییەوە مامەڵە لەگەڵ ئەو سێ پارتە نەكەن".