وتەبێژی كۆمیسیۆن: 139 لیست تۆمار كراون و وردبینی لە ناوی كاندیدەكان دەستی پێ كردووە
پەرەگراف
وتەبێژی كۆمیسیۆنی هەڵبژاردنەكانی عێراق ڕایگەیاند "وردبینی لە ناوی كاندیدەكان دەستی پێ كردووە و لە نیوەی یەكەمی مانگی ئابیشدا تیروپشك بۆ ژمارەی لیستی حیزب و كاندیدەكان دەكرێت". دەشڵێت "139 لیست و كاندید خۆیان تۆمار كردووە".
جومانە غەلای، وتەبێژی كۆمیسیۆنی باڵای سەربەخۆی هەڵبژاردنەكانی عێراق، بە پەرەگرافی ڕاگەیاند "13 حیزب، دوو هاوپەیمانی و 124 كاندیدی تاكەكەسی خۆیان بۆ بەشداری لە هەڵبژاردنی پەرلەمانی كوردستان تۆمار كردووە".
لەناو كاندیدە سەربەخۆكان، 19یان مەسیحین، حەوت لە هەولێر و هەشت لە دهۆك و چوار لە سلێمانی. هەروەها 20 كاندیدی توركمان هەن، 14یان لە هەولێر و شەش لە سلێمانی. 85 كاندیدیش بە سەربەخۆ خۆیان كاندید كردووە.
جومانە غەلای ڕایگەیاند "ئێستا لیژنەیەكی تایبەتی كۆمیسیۆن سەرقاڵی وردبینی و لێكۆڵینەوەن لە شیاویی كاندیدەكان، ناوی كاندیدەكان ئاراستەی لایەنە پەیوەندیدارەكان لە وەزارەتی ناوخۆ، بەڵگەی تاوان و دەستەی دەستپاكیی عێراق دەکرێن".
وتەبێژی كۆمیسیۆن دەشڵێت "دوای ئەوەی لیست و كاندیدەكان پەسەند كران، تیروپشك بۆ ژماری لیستی حیزب و كاندیدە تاكەكەسییەكان دەكرێت".
نێچیرڤان بارزانی، سەرۆکی هەرێمی کوردستان، ڕۆژی 20-10-2024ـی بۆ ئەنجامدانى هەڵبژاردنی پەرلەمانی کوردستان دیاری کردووە، کۆمسیۆنی هەڵبژاردن و لایەنە سیاسییەکان پێشوازییان لە دیاریکردنی ڕۆژەکە کردووە و ئامادەن بۆ ئەنجامدانی پڕۆسەکە.
هەڵبژاردنی خولی شەشەمی پەرلەمانی كوردستان دەبوو لە مانگی 10ـی 2022 بەڕێوە بچێت، سەرباری و فشاری ناوخۆیی و دەرەكی بۆ ئەنجامدانی، بەڵام بەهۆی ناكۆكیی لایەنەكان لەسەر یاسای هەڵبژاردن بە تایبەت پارتی و یەکێتی لەسەر كورسیی پێكهاتەكان، پڕۆسەكە ئەنجام نەدرا و پەرلەمان ساڵێک تەمەنی خۆی درێژکردەوە، دواتر دادگای فیدراڵیی عێراق درێژکردنەوەکەی بە "نادەستووری" لەقەڵەم دا و پەرلەمانی کوردستانی هەڵوەشاندەوە و هەرێم کەوتە بۆشایی دەسەڵاتی یاسادانان و حکومەت بوو بە کاربەڕێکەر.
بەپێى دابەشکاریى نوێ، پەرلەمانی کوردستان لە ١٠٠ کورسی پێک دێت و پێنج كورسی بۆ پێكهاتەكان تەرخان کراوە، هەڵبژاردنیش بە سیستەمی چوار بازنەیی بەڕێوە دەچێت.
پێنج كورسییەکەی پێكهاتەكان بەسەر سێ پارێزگادا دابەش كراون، سێ كورسی لە هەولێر و سلێمانی و دهۆك بۆ پێكهاتەی مەسیحی تەرخان كراوە، دوو كورسیش لە هەولێر و سلێمانی بۆ پێكهاتەی توركمان.
كورسییەكانی پەرلەمان بەم جۆرە بەسەر پارێزگاکاندا دابەش كراون: پارێزگای هەولێر 34 كورسی كە دوو كورسییان بۆ پێكهاتەكانە، پارێزگای سلێمانی 38 كورسی كە دوو كورسییان بۆ پێكهاتەكانە، پارێزگای دهۆك 25 كورسی كە یەك كورسیی بۆ پێكهاتەكانە، پارێزگای هەڵەبجەیش سێ كورسی.
هەڵبژاردنەکە تا ئێستا چوار جار دوا خراوە، سەرەتا سەرۆكی هەرێم ڕۆژی 1-10-2022ـى بۆ ئەنجامدانى هەڵبژاردن دیاری كرد، بەڵام لەو ڕۆژەدا نەكرا و سەرەڕای سێ جاری دیكەش دیاریكردنی ڕۆژی هەڵبژاردن لەلایەن سەرۆكی هەرێمەوە (18-11-2023 و 25-2-2024 و 10-6-2024)، بەڵام لەو سێ ڕێکەوتەشدا نەکرا.
لە ماوەی سێ دەیە حوكمڕانیی هەرێمی كوردستان و لە دوای یەكەم هەڵبژاردنەوە لە 19-5-1992، هیچ پڕۆسەیەكی هەڵبژاردن بۆ پەرلەمانی كوردستان لە وادەی یاسایی و دیاریكراوی خۆیدا بەڕێوە نەچووە.