پەرەگراف
جڤاتی نیشتیمانی گۆڕان ئەمڕۆ کۆبوونەوەیەکی نائاسایی گرێداو وتەبێژی بزوتنەوەکە ڕایگەیاند، جڤاتی نیشتمانی پەسەندی گفتوگۆ و لێکتێگەیشتن و ڕێککەوتنی لەگەڵ کەسایەتی و لایەنە ناڕازییەکان کردو لیژنەی تایبەتمەند بۆ گفتوگۆ و شێوازی ڕێککەوتنەکان فراوانکرا، بە ئامانجی دروستکردنی بەرەیەکی سیاسیی کاریگەر.
دلێر عەبدولخالق دەڵێت، ئەجێندای سەرەکی کۆبونەوەی ئەمڕۆی جڤاتی نیشتیمانی گۆڕان، "کاری پێکەوەیی و بەیەکەوەکارکردن لەگەڵ چەند کەسایەتیەکی دڵسۆز و هەمو ئەو خەڵکە ناڕازییانەی خەونی گۆڕانکارییان لە دەستنەداوە، ئەمەش لەسەر بنچینەی پڕۆژەی سیاسیی، کە وەڵامدەرەوەی خواستەکانی خەڵکی کوردستان بێت".
"خاڵێكی گرنگ كە هەمو ئەندامانی جڤاتی نیشتیمانی بزوتنەوەی گۆڕان لەسەر رەزامەندن ئەویش ئەوەیە چۆن بتوانین بزوتنەوەی گۆڕان بەهێزتر بكەین و ببێتەوە جێگەی تموح و ئەو ئاستی داواكارییەی خەڵك هەیەتی بۆ ئەوەش پێویستمان بە گفتوگۆی راستەوخۆ هەیە لەگەڵ ژمارەیەیەك كارەكتەر، كەسایەتی، ناوەندی رۆشنبیری و رۆژمانەوانی و سیاسی كە ئەمانە خەڵكی دیار و خۆشەویستن و بەخەم بەرژەوەندیەكانی میللەتەكەمانەوەن و بەخەم بەهێزكردنەوە و سەرپێخستنەوەی بزوتنەوەی گۆڕانن بۆ ئەوەی هەمومان بەیەكەوە لەناو قەوارەی سیاسیی بزوتنەوەی گۆڕانەوە بتوانین بە گوتارێكی سیاسی و میدیایی كە وەڵامگۆری ئەم پێداویستیانەی ئێتای كۆمەڵگەی كوردستان بێت ئەم گفتوگۆیانە دوەستپێ بكەی.
وتیشی: ئەمە خاڵێكی گرنگە سەبارەت بەئێمە و ئەو هاوڕێیانەش كە ئامادەییان دەربڕیوە لەم قۆتاغەدا بەیەكەوە كاربكەین و شان بخەینە بەر ئەو بەرپرسیارێتییە نیشتیمانییە نەتەوەییەی كە ئێستا كۆمەڵگەی كوردستان پێویستییەتی.
پەیوەست بە هاوپەیمانی لەگەڵ لایەنە سیاسییەکان، دلێر عەبدولخالق دەڵێت: "لایەنی سیاسیی هەبوە كە داوای لە بزوتنەوەی گۆڕان كردوە لە چوارچیبوەی هاوپەیمانییەتییەك كۆببینەوە، بەڵام جڤاتی نیشتیمانی بزوتنەوەی گۆڕان، بڕیاریان داوە بزوتنەوەی گۆڕان خۆی هاوتەریب لەگەڵ كۆمەڵێك كەسایەتی كە خەڵكی دیار و خۆشەویست و خاوەن مەبدەئن، بتوانین گفتوگۆ بكەین بێنەوە ناو بزوتنەوەی گۆڕان بۆ ئەوەی یەكە رێكخراوەییەكەی بزوتنەوەكە و لیستەكانمان بەهێز بكەینەوە".