ئەردۆغان: تا دەسەڵاتدارانی سلێمانی مەودایەک لە نێوان خۆیان و پەکەکە دانەنێن، گۆڕانکاری لە هەڵوێستمان ڕوو نادات
پەرەگراف
ڕەجەب تەیب ئەردۆغان، سەرۆككۆماری توركیا، دەڵێت "لە سەردانمان بۆ هەولێر باسمان كرد كە تا ئەو كاتەی دەسەڵاتدارانی سلێمانی مەودایەك لە نێوان خۆیان و پەكەكە دانەنێن، ئەوە هیچ گۆڕانكارییەك لە هەڵوێستی ئێمە بەرامبەر سلێمانی بەدی نایەت و گەمارۆی سەر كایەی ئاسمانی بەردەوام دەبێت".
ئەردۆغان دەشڵێت "ئەگەر لە لایەنی سلێمانی هەندێك هەنگاو بگرنە بەر، هەڵسەنگاندن بۆ هەڵوێستمان دەكەین. ئێستا تۆپەكە لە گۆڕەپانی ئەواندایە".
سەرۆككۆمار توركیا، پەكەكە تۆمەتبار دەكات بە "ئاگرتێبەردانی ئەو گوند و ناوچانەی چۆڵیان دەكات" و دەشڵێت "دەركەوتووە كە لەم هێرشانەدا كەسانی نزیك لە بافڵ تاڵەبانی و پێشمەرگەكانی سەر بە ئەوان (یەكێتی)یان لەگەڵدایە".
ئەردۆغان "دڵخۆشی"ی خۆی لەوە نیشان دەدات كە دوای سەردانەكەی بۆ بەغداد و هەولێر، "هاوكاریی هێزە ئەمنییەكانی عێراق لەگەڵ دەسەڵاتدارانی هەولێر" هەیە و دەڵێت "لەگەڵ وەزارەتی بەرگریی عێراق و دەزگای هەواڵگریی ئەو وڵاتە هاریكاریی باشمان هەیە".