پەرەگراف
سەنتەری میترۆ "بە توندی" سەركۆنەی بەئامانجگرتنی تیمی (چرا تیڤی و چرا ئێف ئێم) لەلایەن توركیاوە دەكات و داوا لە حكومەتی عێراق و حكومەتی هەرێمی كوردستان دەكات "ڕۆڵی تەماشەكەر نەبینن، هاووڵاتیانیان لە ئاگری ئەم جەنگە بپارێزن".
ڕۆژی 8-7-2024، هێزی ئاسمانیی توركیا ئۆتۆمبێلێكی لە كۆمەڵگەی تل قەسەبی شنگال بەئامانج گرت، كە تیمێكی ڕۆژنامەنووسانی تەلەفزیۆنی چرا تیڤی و چرا ئێف ئێمی تێدا بوو.
لەو هێرشەدا (مەدیا حەسەن كەمال، مراد میرزا برایم و خەلەف خیدر) بریندار بوون، كە مراد میرزا، پەیامنێری كەناڵی چرا ئێف ئێم، بەیانیی ئەمڕۆ لە نەخۆشخانەیەكی شاری مووسڵ لە كاتی نەشتەرگەریدا بەهۆی سەختیی برینەكەیەوە گیانی لەدەست دا.
سەنتەری میترۆ بۆ داكۆكی لە مافی ڕۆژنامەنووسان، سەرباری سەركۆنەكردنی هێرشەكە، داوا لە ڕێكخراوە نێدەوڵەتییەكان دەكات "فشار بخەنە سەر حكومەتی توركیا بە ئاراستەی دوورخستنەوەی ئاگری شەڕ لەو كەسانەی دەستیان لە هەڵگیرسانی جەنگ نییە و بەشدار نین تیایدا".
میترۆ ئاماژە بەوە دەكات كە لە سەرەتای ئەمساڵەوە "11 هاووڵاتیی مەدەنی بەهۆی بۆردوومانی سوپای توركیاوە گیانیان لەدەست داوە و 9 هاووڵاتیی دیكەیش بریندار كراون". دەشڵێت "هەردوو حكومەتی عێراق و هەرێمی كوردستان ڕۆڵی تەماشاكەر دەبینن".
"لەو هێرشانەی هێزی ئاسمانی و زەمینیی سوپای توركیا، بە هیچ شێوەیەك ڕەچاوی (ڕێككەوتنی ژنێف ساڵی 1949) نەكراوە، كە هەموو بڕگەكانی باس لە پاراستنی مافە بنەڕەتییەكانی مرۆڤ دەكات لە كاتی سەرهەڵدانی جەنگ و داگیركاری و پاراستنی گیانی خەڵكی سڤیل لە مەیدانی جەنگدا و مافی ئەوانەی دەستیان لە هەڵگیرسانی جەنگ نییە و بەشدار نین تیایدا"، سەنتەری میترۆ وا دەڵێت.