چوار ڕۆژە ڕەز و باخی پێنج گوند لە ئامێدی دەسووتێت، 'قایمقامی دهۆك ئاگرەكە دەبینێت و هیچ هەوڵێك نادات'
پەرەگراف
ماوەی چوار ڕۆژە ڕەز و باخی پێنج گوند لە دەڤەری بەرێگارەی قەزای ئامێدی دەسووتێت، هیچ كەسێكیش نییە ئاگرەكە كۆنترۆڵ بكات. ڕەنج و ماندووبوونی دانیشتووانی ئەو گوندانە كە بەهاكەی سەدان ملیۆن دینارە، بە بەرچاویانەوە دەسووتێت، بەبێ ئەوەی هیچیان لەدەست بێت".
موختاری گوندی مژێ لە دەڤەری بەرێگارە، ڕەخنە لە قائیمقامی دهۆك دەگرێت و دەڵێت "لە پەنجەرەی بیناكەیەوە ئاگرەكە بە چاوی خۆی دەبینێت، بەڵام هیچ هەوڵێك بۆ كۆنترۆڵكردنی نادات".
ناوچەی بەرێگارەی ناودارە بە سماق، هەر خێزانێك بەلای كەمەوە ساڵانە بە بەهای پێنج ملیۆن دینار بەرهەمی هەیە، ئەمە جگە لە گوێز و سێو و دەیان بەرهەمی تر كە بەشی زۆریان سووتاون.
ئازاد هەمزۆ، موختاری گوندی مژێ لە دەڤەری بەرێگارەی سەر بە ئامێدی، بە پەرەگرافی وت "چوار ڕۆژە لەسەر یەك، بە بەردەوامی ئاقاری گوندەكانی دەڤەری بەرێگارەی دەسووتێت، هیچ لایەنێكیش تا ئێستا ئامادەیی خۆی دەرنەبڕیوە بێت ئاگرەكە كۆنترۆڵ بكەت".
دەڤەری بەرێگارەی لە پێنج گوند پێك هاتووە: گێرگاشێ، كەڤنە مژێ، مژێ، سپیندارێ و دێرەشێ. زیاتر لە دوو هەزار خێزان لەو پێنج گوندەدا دەژین، زۆرترین زیان بەر گوندی كەڤنە مژێ كەوتووە كە زیاتر لە 80%ـێ ئاقارەكەی سووتاوە".
موختاری گوندی مژێ وتیشی "دوو جار خۆمان هەوڵی كۆنترۆڵكردنی ئاگرەكەمان داوە، بەڵام لەدەستمان دەرچووە. تەنیا چەند كاتژمێرێك مۆڵەتمان پێ دەدەن بۆ كۆنترۆڵكردنی ئاگرەكە، ئەویش دەتوانم بڵێم لە دەوروبەری كاتژمێر 12ـی نیوەڕۆ تا 6ی ئێوارە".
ئازاد هەمزۆ بە سەرسوڕمانەوە دەپرسێت "ئەگەر حكومەت هاوكاریمان نەكات، چۆن بتوانین ئاگرەكە كۆنترۆڵ بكەین؟!".
"ساڵانە سەدان تۆن لە سماق لەم گوندانە بەرهەم دەهێنرێت. باخەكەی من كە نزیكەی هەزار دارە لە گوێز و قۆخ و ترێ، سووتاوە، دراوسێكەم بە هەمان شێوە نزیكەی چوار دۆنم زەویی سماقی سووتاوە، زیانەكە ئەوەندە زۆرە ناخەمڵێندرێت"، ئازاد هەمزۆ وای وت.
سەبارەت بە هەوڵی لایەنە پەیوەندیدارەكان بۆ كۆنترۆڵكردنی ئاگرەكە، بێوار عەبدولعەزیز، وتەبێژی بەرگریی شارستانی دهۆك، بە پەرەگرافی وت "تیمی بەرگریی شارستانیمان لە شیلادزێ و دێرەلووك و سەنتەری ئامێدی هەیە، بەڵام ئەو ناوچانەی ئاگرەكەی لێ كەوتووەتەوە، شەڕ و ئاڵوزیی تێدایە، ناتوانین بچینە ئەو شوێنانە".
وتەبێژی بەرگریی شارستانی دهۆك جەختی كردەوە كە "گیانی كارمەندەكانی خۆمان ناخەینە مەترسییەوە، تەنیا بۆ ئەو شوێنانە دەچین كە پێشتر بزانین هیچ مەترسییەكی نییە".