پەرەگراف
جارێكی دیكە دیوانی چاودێریی دارایی عێراق بۆ وردبینی لە لیستی مووچەی هێزە ئەمنییەكان دێتەوە هەرێمی كوردستان. پەرلەمانتارێك دەڵێت "ئامادەكردنی ڕاپۆرتی وردبینییەكە 10 ڕۆژی دیكەی پێویستە".
ئەمە لەكاتێكدایە هێزی پێشمەرگە و ئەمنییەكانی هەرێم بەهۆی كێشە لە لیستی مووچەكانیاندا، دوو مانگە مووچەیان وەرنەگرتووە و هێشتا دیار نییە كە بەر لەم وردبینییە مووچەیان پێ دەدرێت یان نا.
سۆران عومەر، ئەندامی پەرلەمانی كوردستان، لە هەژماری خۆی لە فەیسبووك ڕایگەیاند، بۆ بەدواداچوونی وردبینی لە لیستی هێزە ئەمنییەكان، پەیوەندییەكی لەگەڵ د. عەمار سوبحی، سەرۆكی دیوانی چاودێریی دارایی عێراق ئەنجام داوە.
سۆران عومەر دەڵێت "سەرۆكی دیوانی چاودێریی دارایی عێراق پێی وتم: لە ئەنجامی وردبینی، تێبینی لەسەر لیستی هێزە ئەمنییەكان هەبووە، داوای زانیاریمان لە حكومەتی هەرێمی كوردستان كردووە، بەڵام حكومەتی هەرێم درەنگ ڕەزامەندیی دەربڕیوە بە پێدانی زانیاری لەسەر لیستەكان".
پاش ئەوی حكومەتی هەرێم ڕەزامەندیی دەربڕیوە، بڕیارە شاندێكی چاودێریی دارایی عێراق سەردانی هەرێمی كوردستان بكات بۆ وەرگرتنی زانیاری و وەڵامی ئەو پرسیارانەی لەسەر لیستی هێزە ئەمنییەكان هەیانە.
سۆران عومەر لە زاری سەرۆكی دیوانی چاودێریی دارایی عێراقەوە دەڵێت "شاندەكە پێویستی بە 10 ڕۆژی دیكە هەیە بۆ تەواوكردنی ڕاپۆرتی وردبینییەكەی لەسەر لیستی هێزە ئەمنییەكان".
بەهۆی كەموكووڕی لەو لیستەی كە حكومەتی هەرێم بۆ بەغدادی ناردووە، حكومەتی فیدراڵ دوو مانگە مووچەی هێزە ئەمنییەكان و هێزەكانی پێشمەرگەی نەناردووە، ئەوەش ناڕەزایەتیی لەناو بەشێك لە هێزی پێشمەرگە لێ كەوتووەتەوە و ئەمڕۆیش جارێكی دیكە بەشێك لە پێشمەرگەكانی لیوای 9ـی پیادەی پێشمەرگە لە بازیان گردبوونەوەیان ئەنجام دا.