پەرەگراف
دەستەی داكۆكیكردن لە سروشت و موڵكی سلێمانی لەبارەی هەڵمەتی (گۆیژە بپارێزە) دەڵێـت "كۆمەڵگە بەسەر دوو بەرەدا دابەش بووە، بەرەی داكۆكیكار لە سروشت و ژینگەی كوردستان لە لایەك و بەرەی كۆمپانیا و دەسەڵات و بەرپرسی خۆجێی و ڕۆژنامەنووس و ڕۆشنبیری سوودمەند لە لایەكی دیكە".
دەستەكە لە پەیامێكدا لەژێر ناوی (هەڵمەتی بەرگریكردن لە گۆیژە بەرەو كوێ؟)، پاش مانگ و نیوێك لە چالاكییەكانی جەخت دەكاتەوە كە "هەڵمەتی دژی تێكدانی سروشتی چیای گۆیژە بەردەوامە" و دەشڵێت "پرسی گۆیژە بپارێزە تەنیا لە زنجیرە چیایەكدا نەماوەتەوە، بەڵكو درێژ بووەتەوە بۆ هەموو گرد و باخ و سەرچاوە ئاوییەكان
دەستەی داكۆكیكردن لە سروشت و موڵكی سلێمانی پاش مانگێك لە كۆبوونەوەكەی لەگەڵ ئەندامانی ئەنجوومەنی پارێزگای سلێمانی، ئاشكرای دەكات كە "ئەندامانی ئەنجوومەنەكە كە نزیكەی 20 ئەندام بوون، جگە لە دوو ئەندامیان، سەرجەمیان مكوڕ بوون لەسەر ئەنجامدانی پرۆژەی نیشتەجێبوونی گۆیژە و چاككردنی ئەو ڕێگایە لە لای تونێلی گۆیژەیە".
دەقی پەیامەكەی دەستەی داكۆكیكردن لە سروشت و موڵكی سلێمانی:
هەڵمەتی بەرگریكردن لە گۆیژە بەرەو كوێ؟
ماوەی زیاتر لە مانگ و نیوێكە هەڵمەتی دژی تێكدانی سروشتی چیای گۆیژە بەردەوامە و تا ئەمڕۆ ئەم هەڵمەتە لەسەر ئاستی میدیا و سۆسیال میدیا و لەسەر ئاستی میلییش درێژەی هەیە.
جگە لە پاڵپشتی هەڵمەتەكە، هاوڵاتیان مافی خۆیانە و حەز دەكەن بزانن ئەنجامی ئەم جووڵانەوە ژینگەپارێز و خۆكردە كە لە لایەن دەستەی داكۆكیكردن لە سروشت و موڵكی سلێمانی و گرووپی گۆیژە ببپارێزە و سەرجەم رێكخراو و ژینگەپارێزانی دی، هەنگاوی پۆزەتیڤ و كاریگەریان هاویشتووە، بە كوێ گەیشتووە؟
یەكێك لەو خاڵە پۆزەتیڤانەی لە ئەنجامی ئەو جموجوڵەوە لەسەر ئاستی ستونی هاتۆتە ئاراوە، پەیوەندی بە هۆشیاری ژینگەییەوە هەیە، لە ئێستادا لە هۆشیاریی هاوڵاتیاندا پرسی پاراستنی ژینگە بۆتە داخوازییەكی هەنووكەیی و سەرنجێكی زۆری خەڵكی سلێمانی و كوردستانی بە گشتی بەلای خۆیدا راكێشاوە، بە ئەندازەیەك ڕای گشتی مكوڕە لەسەر ئەوەی كە چیتر پرسی پاراستنی ژینگەی كوردستان پرسێكی پلەكانی خوارەوەی داواكارییەكانی نەبێت، بەڵكو لەسەرەوەی لیستی داخوازییەكانیەوە بێت و خەباتی بۆ بكات.
هاوكات ئەم بزووتنەوەیە لەسەر ئاستی ئاسۆیی توانی لەو ماوە كەمەدا خەڵكێكی زۆر لە دەوری ئەم داخوازییە كۆبكاتەوە و پرسەكەی كردووە بە پرسێكی جڤاكیی بەرفراوان و لەسەر ئاستی میدیا و جەماوەریش و بۆتە داخوازییەكی هەنووكەیی.
پرسی گۆیژە بپارێزە ئێستا تەنها لە زنجیرە چیایەكدا نەماوەتەوە كە ناوی گۆیژەیە، بەڵكو درێژبۆتەوە بۆ هەموو گرد و باخ و سەرچاوە ئاویانەی كە لەلایەن كۆمپانیاكان و بەرپرسە حزبییەكانەوە داگیركراون.
ئەو دەمەی ئەم بزووتنەوەیە سەری هەڵدا و كەوتە چالاكی، پرسی پاراستنی ژینگە لەسەر ئاستی میدیایی تەنها لە سنوری سلێمانیدا نەمایەوە، بەڵكو رۆژ بەرۆژ فراوانتربوو، لە ئێستادا ناوچە و شوێنی دیكەشی گرتۆتەوە و ئێستا لە قۆناغێكدایە كە تۆڕێكی فراوانی هەمەهانگی لەسەر ئاستی هەرێم و دەرەوەش خەریكە گەڵاڵە دەبێت و بۆتە پرسێكی گشتی كۆمەڵگا و رای گشتیی خەڵكی كوردستان بەشێوەیەكی فراوان لە دەوری كۆبوونەتەوە و بە جۆرێك ئەم پرسە هێندە بەرفراوان و كاریگەر بووە كە خۆی بەسەر دۆسیەكانی تری ئەجێندای دەسەڵاتی سیاسی و حوكمڕانی هەرێمی كوردستاندا سەپاندووە و گەیشتۆتە ئاستێك لە لوتكەی دەسەڵاتی هەرێمدا گفتوگۆی لە بارەوە دەكرێت.
لەسەر ئاستی كۆمەڵگاش گەر تا دوێنێ كوردەواری دابەش بووبێت بەسەر توێژێكی دەسەڵاتداری خۆسەپێنێی هەرێم كە لە هیچ بابەتێك نەپرینگابێتەوە و هەموو هێڵە سورەكانی شكاندبێت، ئەوا ئەمڕۆ بەتایبەتی لەبواری سروشتی كوردستان، ئەوەی پەیوەندی بە خاك و ئاو و سروشتی وڵاتەوە هەیە، ئەوا ئەم دەسەڵاتە خۆسەپێنە رووبەڕووی ناڕەزایەتییەكی گەورە بۆتەوە و لەمەودوا هەروا كارێكی ئاسان نییە كە بوێری بكات وەك پێشوو دەست بۆ شێواندنی ژینگەی كوردستان بەرێت، ئەمە هەروەك چۆن بۆ دەسەڵاتی سیاسی و هەردوو حزبی حوكمڕان راستە، هاوكات بۆ كۆمپانیاكان زەحمەتترە كە جارێكی تر هەر وەك پێشوو بە سانایی دەست بۆ چیاو قەدپاڵ و ئاو و سروشت ببەن و تێكی بدەن.
لەگەڵ دروستبوونی ئەم بزووتنەوەیەدا كۆمەڵگە بەشێوازێكی جیاوازتر لەجاران دابەشبووە بەسەر دوو بەرەدا؛ بەرەیەكی داكۆكیكار لە سروشت و ژینگەی كوردستان، بەرەیەكی تریش كە پێكدێن لە كۆمپانیاكان و دەسەڵاتی حوكمڕانی كوردستان و كۆمەڵێك بەرپرسی خۆجێی و رۆژنامەنووس و رۆشنبیر كە هەریەكە و بە شێوازێك سوودەمەندە لە رووی دارایی و موڵكەوە لە تێكدانی سروشتی كوردستان.
ئەو رێكخراو و دەستانەی كە داكۆكی لە ژینگەی كوردستان و گۆیژە دەكەن، لە نێوان ئەوان و ژینگەی كوردستاندا هیچ نێوەندگیرێك ( واستەیەك ) نییە، تەنها خۆشەویستی و خۆبەخشی نەبێت بۆ ئەم نیشتمانە و ئایندەی وڵات، بەڵام لە نێوان ئەوانەی سروشتی كوردستان تێك دەدەن، چەندان نێوەندگیری دەسەڵاتخوازی و سوودمەندی دارایی هەیە، لەنێوان حزب و كۆمپانیا و بەرپرسە ئیدارییەكان و ژمارەیەك دەزگای راگەیاندن و نووسەر و رۆژنامەنووسە دەربارەكاندا كە پاكانە بۆ تێكدانی گۆیژە و شوێنەكانی تری كوردستان دەدۆزنەوە، ئەمانە هەموویان بە تۆڕێكی بەرژەوەنی ئاڵۆزەوە بە یەك بەستراون و سەرجەمیان وەك بلۆكێكی خاوەن بەرژەوەندی دەردەكەون كە لە لوتكەكەیدا بنەماڵەو حزب و كۆمپانیاكانن، بە چواردەوریشیاندا بەرپرسە خۆجێیەكان و ژمارەیەك میدیاو میدیاكارو رۆشنبیری پیسخۆر دەور دراون كە هەندێكیان وەك رۆژی رووناك دیارە سودمەندن لەو كۆمپانیایانە و ناتوانن بیشارنەوە، هەندێكیانی تریشیان نزیك یان دوور لە ئایندەدا ئاشكرا دەبێت كە چەند سوودمەندبوون لەو داكۆییە ناویژدانییەی لە كۆمپانیاكانی دەكەن.
ئەم بزووتنەوەیە كە لەم ماوە كورتەدا دەستی پێكردووە، هەنگاوێكی نوێی كۆمەڵگای كوردی باشوری كوردستانە، هەرچەندە ئەم هەنگاوە نوێیە بە بەراورد بە پارچەكانی تری كوردستان هەنگاوێكی كەمێك لە رووی زەمەنیەوە دواكەوتووە، بەڵام هەنگاوێكی بابەتیانەو دواخوازییەكی واقیعی باشوری كوردستان و عێراق و پرسێكی هاوچەرخی كۆمەڵگای مرۆڤایەتییە كە گۆی زەوی تیایدا هاوبەشن.
هیوادارین ئەم بزووتنەوەیە هەرچی زووترە بە چڕی لەشارەكانی تر دەست پێبكات و سنورێك بۆ ئەو هەموو سەرپێچیانە دابنێت كە چەندان ساڵە دەكرێتەوە سەر سروشت و مێژوو و كەلتوریی كوردستان.
چالاكییەكانی دەستەی داكۆكیكردن لە سروشت و موڵكی سلێمانی لەم ماوەیەدا:
بە درێژایی ئەو ماوەیەی دەستەی داكۆیكردن لە سروشت و موڵكی سلێمانی دروستبووە، بە مەبەستی راگرتنی ئەو شێواندنەی كراوەتە سەر چیای گۆیژە چەندین دیداری لەگەڵ بەرپرسانی خۆجێی سلێمانی و هەرێمدا سازكردووە.
لەو كۆبوونەوانە، رۆژی ٢٩ ی ئایار لەسەر داوای ئەنجومەنی شارەوانی كۆبوونەوەیەكی درێژی دوو كاتژمێرو نیوی دەستەی داكۆیكردن لەگەڵ ئەنجومەن شارەوانی سازكرا، سەرجەم ئەندامانی ئەنجومەن كە نزیكی ٢٠ ئەندام دەبوون، تەنها دوو ئەندامیان رای جیاوازیان هەبوو، تێكڕایان مكوڕبوون لەسەر ئەنجامدانی پرۆژەی نیشتەجێبوونی گۆیژە و چاككردنی ئەو رێگایە لەلای تونێلی گۆیژەیە.