پەرەگراف
كۆمیسیۆنی هەڵبژاردنەكانی عێراق جارێكی دیكە پەنجەمۆری دەنگدەرانی هەرێم وەردەگرێتەوە و دووبارەیش دەرگای پێشكەشكردن بۆ كارمەندی سەر سندووقەكانی دەنگدان دەكاتەوە.
كۆمیسیۆنی هەڵبژاردنەكانی عێراق ڕایگەیاند "لە چوارچێوەی ڕێكارەكانی ئەنجامدانی هەڵبژاردنی پەرلەمانی كوردستان، كۆمیسیۆن دووبارە پەنجەمۆری ئەو دەنگدەرانە وەردەگرێتەوە كە لە ڕۆژی هەڵبژاردندا پەنجەمۆرەكانیان نەخوێندراوەتەوە".
وەرگرتنەوەی پەنجەمۆری دەنگدەران بۆ ماوەی یەك هەفتەیە، لە 1-7-2024 دەست پێ دەكات و لە 10-7-2024 كۆتایی دێت.
هاوكات هەر ئەمڕۆ كۆمیسیۆن ڕایگەیاند، دەرگای پێشكەشكردن بۆ كارمەندی سەر سندووقەكانی دەنگدان بۆ هەڵبژاردنی پەرلەمانی كوردستان، دەكاتەوە.
كۆمیسیۆن دەڵێت، ئەو كەسانەی پێشتر دەرفەتی پێشكەشكردنیان بۆ كارمەندی ڕۆژی هەڵبژاردن نەبووە، دەتوانن سوود لەم دەرفەتە وەربگرن كە لە 4-7-2024 دەست پێ دەكات و لە 23-7-2024 كۆتایی دێت.
ئەمە سێیەم جارە كۆمیسیۆنی هەڵبژاردنەكانی عێراق پەنجەمۆری دەنگدەران بۆ هەڵبژاردنی خولی شەشەمی پەرلەمانی كوردستان وەردەگرێتەوە، دووەم جاریشە دەرگای پێشكەشكردن بۆ كارمەندی سەر سندووقەكانی دەنگدان دەكاتەوە.
وەرگرتنەوەی پەنجەمۆری ئەو دەنگدەرانەی كە ئامێرەكانی كۆمیسیۆن لە ڕۆژی هەڵبژاردندا پەنجەمۆرەكانیانی نەخوێندووەتەوە، یەكێك لە داواكارییە سەرەكییەكانی پارتی بوو بۆ بەشداری لە هەڵبژاردن.