پەرەگراف
وەزارەتی تەندروستی لیژنەیەكی لێكۆڵینەوە بۆ بەدواداچوونی گرتەیەكی ڤیدیۆیی پێك دەهێنێت كە تێیدا ئاشكرا كرا ڕۆژانە لە هەولێر دەیان كۆرپەی لەبارچوو يان لەباربراو بە شێوەیەكی نەشیاو دەشاردرێنەوە.
وەزارەتی تەندروستی لە ڕاگەیاندراوێكدا دەڵێت "بۆ بەدواداچوونی ڕاستی و دروستی و هۆكار و ئاستی كەمتەرخەمی لە جێبەجێكردنی ڕێنماییەكانی تەندروستی، لە دیاردەی لەبارچوونی كۆرپە و هەڵسوكەوت كردن لەگەڵ پاشماوەی لەبارچوون تایبەت بە هەواڵ و بڵاوبوونەوەی پارچە ڤیدیۆیەك لە سۆشیاڵ میدیا، وەزارەتی تەندروستی بڕیاری دا بە پێكهێنانی لیژنەی لێكۆلینەوە".
وەزارەتی تەندروستی ڕایدەگەیەنێت "لیژنەكە بە هاوبەشی لەگەڵ سەرۆكایەتیی داواكاری گشتی پێك هێنراوە، بۆ گەیشتن بە دەرەنجام و دەستنیشانكردنی سەرپێچیكاران و وەرگرتنی ڕێككاری یاسایی و ئاگاداركردنەوەی ڕایگشتی لە دەرەنجامەكان".
بەپێی ژماریەك گرتەی ڤیدیۆیی كە لەم ڕۆژانەدا لە سۆشیال میدیا بڵاو كرانەوە، ئاشكرا كرا كە ڕۆژانە دەیان كۆرپەی لەباربراو لەلایەن ژمارەیەك كەسەوە دەبرێنە شوێنێك لە گۆڕستانی ئیمام محەمەد لە هەولێر و بە شێوەیەكی نەشیاو دەشاردرێنەوە.