تەرمی سێ حاجیی دیكەی كورد دۆزرایەوە؛ عێراق: تەرمی حاجییان بە كاتی لە سعودیە دەنێژرێن
پەرەگراف
تا ئێستا 23 حاجیی كوردی هەرێمی كوردستان لە سعودیە گیانیان لەدەست داوە و ئامارەكە ڕۆژانە لە بەرزبوونەوەدایە، ژمارەیەكی دیكەش هێشتا چارەنووسیان نادیارە و وەزارەتی ئەوقاف سۆراغیان دەكات. بەهۆی بەرزیی ژمارەی گیانلەدەستدان، عێراق دەڵێت "حاجییانی كۆچكردوو بەشێوەیەكی كاتی لە سعودیە دەنێژرێن".
ئێوارەی ئەمڕۆ 21-6-2024، كاروان ستوونی، وتەبێژی حەج و عومرەی هەرێمی كوردستان، دۆزینەوەی تەرمی سێ حاجیی دیكەی هەرێمی ڕاگەیاند و دەڵێت "ژمارەی حاجییانی كۆچكردووە گەیشتە 23 كەس، لەو ژمارەیە 22یان بە ڤیزای ساڵی گەشتی حەجیان كردووە".
جگە لەو 23 حاجییە كە زۆرینەیان لە كێوی عەرەفە كۆچی دواییان كردووە و ڕۆژانە تەرمەكانیان دۆزراوەتەوە، ژمارەیەكی دیكەی حاجییان هێشتا بێسەروشوێنن. لە چەند ڕۆژی ڕابردوودا وتەبێژی حەج و عومرەی هەرێم ڕایگەیاند "19 حاجیی هەرێمی كوردستان بێسەروشوێنن".
وەزارتی ئەوقاف لە ڕێگا فەرمییەكانەوە لە هەوڵی یەكلاكردنەوەی چارەنووسی حاجییە بێسەروشوێنەكاندایە و زانیاریی ئەو كەسانەی لە كەسوكاریان وەرگرتووە.
بەپێی پلانی بەڕێوەبەرایەتیی حەج و عومرەی هەرێمی كوردستان، 4685 هاووڵاتیی هەرێم گەشتی حەجیان ئەنجام داوە، بەڵام ژمارەیەكی زۆریش لە ڕێگەی ڤیزای ساڵییەوە بەشدارییان لە پرۆسەكە كرد و بەوهۆیەوە تووشی كێشە و لێپێچینەوە و دەستگیركردن دەبوونەوە.
كاروان ستوونی دەڵێت "ئەو كەسانەی بە ڤیزای یەك ساڵی چوونەتە سعودیە، هیچ تیمێكی تەندروستییان لەگەڵدا نەبووە، لەبەر ئەوەی كۆدی ئەو حاجییانەشمان لا نەبووە، پاش ونبوون لە سەرەتاوە چارەنووسیان نەزانراوە".
بەپێی ئەو ئامارانەی لە میدیا جیهانییەكان بڵاو كراونەتەوە، تا ئێستا زیاتر لە هەزار و 100 حاجی كۆچی دواییان كردووە، جگە لە ژمارەیەكی دیكە كە هێشتا چارەنووسیان نادیارە.
كونسوڵخانەی عێراق لە شاری جیددەی سعودیە دەڵێت "بەهۆی ڕێژەی بەرزی گیانلەدەستدان لەنێو حاجییانی بەساڵاچوودا لە ئەنجامی بەرزیی پلەی گەرما، پزیشكی دادی شاری مەككە دەرفەتی دەركردنی بەڵگەنامەی مردنی بۆ حاجییان نییە، بۆیە ئەو حاجییانەی گیانیان لەدەست داوە، بەشێوەیەكی كاتی بەخاك دەسپێردرێن و دواتر بەڵگەنامەی مردنیان بۆ دەردەكرێت".
كونسوڵخانەی عێراق لە سعودییە ڕاشیگەیاندووە "دوای كۆتاییهاتی مەڕاسیمەكانی حەج، ئەگەر كەسوكاری ئەو حاجییانە ویستیان لەسەر بێت، دەتوانن تەرمی حاجییەكان بگێڕنەوە بۆ عێراق".
بەپێی ئاماری فەرمیی سعودیە، زیاتر لە یەك ملیۆن و 800 هەزار كەس بەشدارییان لە پرۆسەی حەجی ئەمساڵ كردووە، بەڵام ژمارەیەكی زۆریش بە ڤیزای دیكەی جگە لە ڤیزای حەج چوونەتە ئەو وڵاتە و حەجیان ئەنجام داوە.