پەرەگراف
وەزارەتی دارایی هەرێمی كوردستان لیستی مووچەی مانگی پێنجی بۆ بەغداد نارد و چاوەڕوان دەكرێت لەگەڵ خەرجكردنی مووچەی وەزارەتەكانی عێراق، مووچەی فەرمانبەرانی هەرێمی كوردستانیش خەرج بكرێت، بەڵام هێشتا كێشەی مووچەی هێزە ئەمنییەكان چارەسەر نەكراوە.
وەزارەتی دارایی و ئابووری حكومەتی هەرێمی كوردستان ڕایگەیاند "ئەمڕۆ سێشەممە (٤ـی حوزەیرانی ٢٠٢٤)، لیستی مووچەی مانگی ئایاری فەرمانبەران و مووچەخۆرانی هەرێمی كوردستان، ڕادەستی وەزارەتی دارایی حكومەتی فیدراڵ كرا".
ناردنی لیستی مووچەی مانگی ئایاری فەرمانبەران، لە كاتێكدایە كە تا ئێستا وەزارەتی دارایی عێراق مووچەی مانگی نیسانی هێزە ئەمنییەكانی هەرێمی كوردستانی خەرج نەكردووە.
ئەندامێكی لیژنەی دارایی پەرلەمانی عێراق هۆكاری نەناردنی مووچەی هێزە ئەمنییەكان ئاشكرا دەكات و ڕایدەگەیەنێت پەیوەندیی بە "تەواونەبوونی وردبینی و تێبینی لەسەر لیستی مووچەكانیانەوە هەیە".
د. نەرمین مەعرووف، ئەندامێكی لیژنەی دارایی پەرلەمانی عێراق، دوێنێ سەردانی وەزارەتی دارایی فیدڕاڵی كردووە و دەڵێت "تایبەت بە هۆكاری دواكەوتنی مووچەی (مانگی نیسانی) هێزە ئەمنییەكان، پەیوەندیی هەیە بە تەواونەبوونی وردبینی لە دیوانی چاودێری دارایی فیدڕاڵی و ئەو تێبینییانەی وەزارەتی دارایی هەیەتی لەسەر زانیاری و لیستی مووچەكانیان".
ئەندامێكی پەرلەمانی عێراق بە پەرگرافی ڕاگەیاند "وەزارەتی دارایی هەرێم لیستی ناوی هێزە چەكدارەكانی ڕادەستی بەغداد نەكردووە و ئەوەی نێردراوە تەنیا كۆدە، ئەوەش هۆكاری دواخستنی ناردنی مووچەكانیانە".
چاوەڕوان دەكرێت بەر لە جەژنی قوربان، وەزارەتی دارایی عێراق مووچەی مانگی پێنجی مووچەخۆرانی هەرێمی كوردستان جگە لە هێزە ئەمنییەكان خەرج بكات و دابەش بكرێت. بەرپرسانی حكومەتی هەرێمیش ڕایدەگەیەنن كە سەبارەت بە كێشەی مووچەی هێزە ئەمنییەكان لەگەڵ حكومەتی فیدراڵ لەسەر خەتن.