پەرەگراف
دادگای فیدراڵی عێراق ڕۆژی 19ی ئەم مانگەی دیاریکرد بۆ دانیشتن لەسەر سکاڵاکەی مەسرور بارزانی کە لە دژی کۆمسیۆن تۆماری کردووەو بەهۆیەوە دادگا کارەکانی کۆمسیۆنی ڕاگرت تایبەت بە هەڵبژاردنی پەرلەمانی کوردستان.
دادگای فیدراڵی عێراق ڕۆژی ٧-٥-٢٠٢٤ بڕیارێكی لە بەرژەوەندیی سكاڵاكەی مەسروور بارزانی دەركرد و بە فەرمانێکی سالاریی بڕیاریدا بە ڕاگرتنی کارەکانی کۆمسیۆنی تا سکاڵاکەی سەرۆکی حکومەتی هەرێم کە لە دژی کۆمسیۆن لە دادگا تۆماری کردووە یەکلایی دەبێتەوە، بەوەش جارێکی دیکە پرسەکە چووەوە دەست نێچیرڤان بارزانی کە وەک سەرۆکی هەرێم وادەیەکی نوێ بۆ هەڵبژاردنەکە دیاری بکات، بەوپێیەی تا سکاڵاکەی مەسرور بارزانی یەکلا دەبێتەوە کۆمسیۆن ناتوانێت کارەکانی ئەنجام بدات و ئەوەش ڕاستەوخۆ بووەتەهۆی دواخستنی هەڵبژاردنەکە کە بڕیاربوو لە ١٠-٦ ئەنجام بدرێت.
دادگای فیدراڵی لە فەرمانە سالارییەکەیدا جێبەجێکردنی سیستمی تۆماركردنی كاندیدەكان و پەسەندکردنیانی ڕاگرتووە کە بەپێی ئەو سیستمە ١٠٠ کورسییەکەی پەرلەمانی کوردستان دابەشکراوە بەسەر چوار بازنەی هەڵبژاردنداو مەسرور بارزانی لە سکاڵاکەیدا دەڵێت، دابەشکارییەکەی کۆمسیۆن پێچەوانەی دەستوورەو لەسەر بنەمای ژمارەی دەنگدران کورسییەکان دابەشکراون نەک لەسەر بنەمای ژمارەی دانیشتوان.
بەشێکی دیکە لە سکاڵاکەی مەسرور بارزانی تایبەتە بە نوێنەرایەتی پێکهاتەکان لە پەرلەمانی کوردستان، هەرچەندە دادگا فیدراڵی پێشتر ١١ کورسییەکەی پێکهاتەکانی هەڵوەشاندەوە، بەڵام مەسرور بارزانی لە سکاڵاکەیدا بە پشتبەستن بە ماددەی ٤٩ی دەستوور داوای لهبهرچاوگرتنی نوێنهرایهتی سهرجهم پێكهاتهكان دهكات له دهسهڵاتی یاسادانان و دەیەوێت لەو ڕێگایەوە کورسیی کۆتای پێکهاتەکان بگەڕێنێتەوە.
دادگای فیدراڵی لە فەرمانە سالارییەکەیدا ئەوەی خستووەتەڕوو، ڕاگرتنی ڕێكارەكانی کۆمسیۆن "زەرورەتی كرداری و هونەری"ـی هەیە، چونكە ڕێكارەكان و گرێبەستەكانی لەگەڵ كۆمپانیا جیهانییەكان، تێچوویەكی زۆریان لەسەر دەوڵەت هەیە و ئەگەر دادگا وەڵامی بۆ سكاڵاكەی مەسرور بارزانی هەبێت و پێكهاتەكان بەشداریی هەڵبژاردنەكە بكەن و لیستی تایبەت بە خۆیان هەبێت كە تا ئێستا پێشكەش نەكراوە، پێویستە ڕێكارەكان دووبارە بگیرێنەوەبەر ئەوەش زیانێکی زۆری ماددی دەبێت بەهۆی ئەو ڕێكارانەی كۆمسیۆن كە دەبێت دووبارە بکرێنەوە هەر بۆیە بڕیاریداوە بە ڕاگرتنی ڕێكارەكان لە ئێستادا.
هاوڕێ تۆفیق شارەزای یاسا و هەڵبژاردن کە پێشووتر سەرۆکی نووسینگەی سلێمانی کۆمسیۆنی هەڵبژاردنی عێراق بووە، پێیوایە بڕیارەکەی دادگای فیدراڵی کە داواکەی مەسرور بارزانی پەسەندکردو ڕێوشوێنەکانی هەڵبژاردنی ڕاگرت "بەجۆرێک لە جۆرەکان پاشگەزبونەوەیە لە بڕیاری پێشووی دادگاکەو جارێکی دیکە گەڕانەوەی کورسی کۆتای پێکهاتەکانە بەڵام بە ژمارەو شێوەیەکی تر".
ئەو شارەزایەی یاساو هەڵبژاردن دەڵێت "ئەوەی گرنگە سەرنجێکە کە دادگای فیدراڵی بڕیارەکانی شایەنی پێداچونەوەو دەرکردنی بڕیاری تازەن، هەرچەندە ئەم قسەیە لە دیدی تیۆریی قانونیی وشک و رەهاییەوە راست نییەو بڕیارەکانی دادگا کۆتایین و شایەنی دەستکاریکردن نین، بەڵام لەنێوان بژاردەی پیتی سەر کاغەزو واقیع، ئەوا بەدڵنیاییەوە ئەوەی دووەمیان ڕاستە".