پەرەگراف
كۆمیسیۆنی هەڵبژاردنەكانی عێراق چەند بڕیارێكی بۆ چارەسەری كێشەی ئەو دەنگدەرانە دەركرد كە كێشەی نەخوێندنەوەی پەنجەمۆریان هەیە. دەشڵێت "پرۆسەی تۆماری بایۆمەتری لە پارێزگاكانی هەرێمی كوردستان دەست پێ دەكاتەوە".
كۆمیسیۆن ڕێكار بۆ چارەسەری كێشەی نەخوێندنەوەی پەنجەمۆر دەگرێتە بەر و ڕایگەیاند "دووبارە پەنجەمۆر لە دەنگدەران وەردەگیرێتەوە".
كۆمیسیۆنی باڵای سەربەخۆی هەڵبژاردنەكانی عێراق ئاماژەی بەوە كردووە كە "وەرگرتنەوەی پەنجەمۆر سەرجەم پارێزگاكانی عێراق لەناویاندا هەرێمی كوردستانیش دەگرێتەوە".
هەروەها داوا دەكات كە لایەنە پەیوەندیدارەكانی كۆمیسیۆن دەنگدەران ئاگادار بكەنەوە بۆ ئەوەی دووبارە سەردانی بنكەكان بۆ وەرگرتنەوەی پەنجەمۆر بكەن.
كۆمیسیۆن ڕایشیگەیاندووە "پرۆسەی تۆماری بایۆمەتری لە پارێزگاكانی هەرێمی كوردستان دەست پێ دەكاتەوە".
بڕیارەكان لە كۆبوونەوەی ئەمڕۆی ئەنجوومەنی كۆمیسیارانی كۆمیسیۆنی هەڵبژاردنەكانی عێراقدا دەركراون و داوا لە لایەنە پەیوەندیدارەكانی كۆمیسیۆن كراوە كە جێبەجێیان بكەن.
كێشەی نەخوێندنەوەی پەنجەمۆر لە ئامێرەكانی كۆمیسیۆندا، یەكێكە لە كێشە و داواكارییەكانی پارتی و پێشتر داوای كردبوو كە كێشەی ئەو دەنگدەرانە چارەسەر بكرێت كە ئامێری خوێندنەوەی پەنجەمۆر، پەنجەمۆرەكانیان ناخوێنێتەوە و دەبێتە هۆی فەوتانی دەنگەكانیان.