پەرەگراف
كۆنگرەی دامەزراندنی ڕەوتی هەڵوێستی نیشتمانی لە شاری سلێمانی بەڕێوە چوو، تێیدا عەلی حەمەساڵح بە بڕیاردەری ڕەوتەكە هەڵبژێردرا. ڕەوتەكە دەستەیەكی بەڕێوەبردنی هەیە و سەرۆكی نییە، تەنیا بڕیاردەری هەیە.
عەلی حەمەساڵح پاش كۆنگرەكە بۆ میدیاكان دوا و ڕایگەیاند كە ماوەی ساڵێكە كار لەسەر دروستكردنی ڕەوتەكە دەكەن و ئامانجیان تەنیا بەشداری لە هەڵبژاردن نییە، بەڵكوو "هێزێكی ئەقڵانیی جیددیی پێشوودرێژ"ن و كار و چالاكیی جیاوازی مەدەنی ئەنجام دەدەن.
سەبارەت بە هۆكاری هەڵبژاردنی ناوی ڕەوتەكەشیان، عەلی حەمەساڵح وتی "هەڵوێست لە بەرانبەر ئەو دۆخە نەخوازراوانەی كە پارتەكانی دەسەڵاتدار بەسەر خەڵكیاندا سەپاندووە لە سزادانی خەڵك، ڕاگرتنی مووچە، هەڵوێست بەرانبەر چەوتییەكانی حوكمڕانی كە هیچ دامەزراوەیەكی شەرعیی حوكمڕانییان نەهێشتووە و حیزب دەستی بەسەردا گرتوون".
ڕەوتی هەڵوێستی نیشتمانی لە چەندین كەسایەتی و پەرلەمانتار و چالاكوان لەسەر ئاستی هەرێمی كوردستان پێك دێت، بۆ هەڵبژاردنی پەرلەمانی كوردستان لیستی دەبێت.