پەرەگراف
مامۆستایانی ناڕازی لە هەڵەبجە، سەیدسادق، ڕانیە، قەڵادزێ، كۆیە، كفری و شارەزوور خۆپیشاندانیان ئەنجام دا و جەختیان لە "بایكۆت تا جێبەجێكردنی داواكارییەكان" كردەوە.
داواكاریی مامۆستایان پەیوەست بە مووچە و دەستپێكردنەوەی پلە بەرزكردنەوە. ئەوان داوا دەكەن "مووچە نەدراوەكانیان پێ بدرێت، مووچە 30 ڕۆژ جارێك دابەش بكرێت، مامۆستایانی وانەبێژ بكرێن بە هەمیشەیی و پلەبەرزركردنەوەی مامۆستایان و فەرمانبەران دەست پێ بكاتەوە".
لە خۆپیشاندانەكانی ئەمڕۆدا، ئومێد تۆفیق، بەڕێوەبەری پەروەردەی ڕانیە، چووە ناو مامۆستایانی خۆپیشاندەر و وتی "داواكاریی مامۆستایان ڕەوایە و پشتیوانیی دەكەم". هاوكات ناوبراو داوای شكاندنی بایكۆتی لە مامۆستایان كرد و وتی "لەپێناو سۆز و خۆشەویستی بۆ خوێندكاران، وەكوو بەڕێوەبەری پەروەردە نا، وەكوو مامۆستایەك داواتان لێ دەكەم خۆتان بڕیاری چوونەوە بۆ دەوام بدەن". بەڵام مامۆستایان دوای قسەكانی ئەو وتیان "بایكۆت بەردەوامە".
مامۆستایانی هەڵەبجەیش جەختیان لە داواكارییەكانیان كردەوە و وتیان "هەتا داواكارییەكانمان لە مووچە، پلەبەرزكردنەوە و دامەزراندنی مامۆستایانی وانەبێژ جێبەجێ نەكرێن، شەقام چۆڵ ناكەین و لە بایكۆت بەردەوام دەبین".
یەک شەممەی ڕابردووش خۆپیشاندانی فراوانی مامۆستاو فەرمانبەران لە سلێمانی، هەڵەبجە، گەرمیان و ڕاپەڕین و کۆیە، بەڕێوەچوو، سووربوونیان دووپات کردەوە لەسەر بایکۆتی خوێندن هەتا جێبەجێکردنی داواکانیان.
دریژەدان بە خوپیشاندان و بایکۆت لە کاتێکدایە فشارەکان بەردەوامن بۆ دەستپێکردنەوەی خوێندن لەو قوتابخانانەی هێشتا دەستی پێ نەکردووەتەوە، پێشتر نوێنەرانی مامۆستایانی ناڕازی ڕایانگەیاند "زیاتر لە سێ هەزار مامۆستا لە پەروەردەكانی ڕۆژهەڵات و ڕۆژئاوای سلێمانی بە نەهاتوو (غیاب) سزا دراون، ژمارەكە بە پەروەردەكانی دەوروبەرەوە زۆر لەوەیش زیاترە".
ئەنجوومەنی سەرتاسەریی مامۆستایان و فەرمانبەرانی ناڕازی لە كۆنگرەیەكی ڕۆژنامەوانیدا ڕایگەیاند "كۆتا ئاگاداركردنەوە بە بەرپرسە ئەمنی و پەروەردەیی و كارگێڕییەكان دەدەین و داوایان لێ دەكەین واز لە فشار و هەڕەشەكانیان بهێنن و سزاكانیان هەڵبوەشێننەوە، ئەگەرنا ڕووبەڕووی فشاری مەدەنیی زیاتریان دەكەینەوە و تەنانەت پەنا بۆ دادگا تایبەتمەندە ناوخۆیی و نێودەوڵەتییەكان دەبەین".
ئەنجوومەنەكە فشارەكانی سەر مامۆستایان بۆ شكاندنی بایكۆت و دەستكردنەوە بە دەوامكردن، بە "كۆیلایەتیی سەردەم" ناو دەبات و دەڵێت "دەسەڵات بە فشار و هەڕەشە و سزا بەیاساییكراوەكان، ڕووبەڕووی خەباتی مەدەنیی ناتوندووتیژی مامۆستایان و فەرمانبەران و چین و توێژەكان بووەتەوە، تاوەكوو لە ڕێگەی بەكۆیلەكردنیانەوە كۆتایی بە بایكۆت و ناڕەزایەتییەكان بهێنێت".
هەروەها هەڤاڵ ئەبووبەكر، پارێزگاری سلێمانی، لە كۆنگرەیەكی ڕۆژنامەوانیدا جارێكی دیكە جەختی کردەوە "ئەركی حكومەتی هەرێم و حكومەتی فیدراڵییە كە بابەتی مووچە لە ململانێی سیاسی بهێننە دەرەوە و مامۆستایان و مووچەخۆرانی دیكەی هەرێمیش وەكوو خەڵكی پارێزگاكانی دیكەی عێراق بە مافی خۆیان بگەن".
پارێزگاری سلێمانی دەشڵێت "خوێندن ئامانجە و هەموو ئەو شتانەی تر ئامرازێكن لەپێناوی بەدیهێنانی ئەم ئامانجەدا، نابێت ئەم ئامانجە شكست بهێنێت، چونكە كەوتنی ساڵێكی خوێندن كارەساتی زۆر گەورە دەهێنێتە كایەوە".
سەبارەت بە سزادانی مامۆستایان، هەڤاڵ ئەبووبەكر وتی "ئەمانە كۆمەڵێك ڕێكاری یاسایی و كارگێڕین، هەر كەسێك كە دادەمەزرێت كۆمەڵێك پابەندیی هەیە كە یاسا دیاریی كردووە، پەیوەندیی بە وەزارەت یان بەڕێوەبەرایەتییەكی دیاریكراوەوە نییە. ئەوەش دەكەوێتە سەر لایەنە یاساییەكە و ئێمە تێكەڵی نابین، تەنیا یاسا جێبەجێ دەكەین".