پەرەگراف
وەزارەتی دارایی هەرێمی كوردستان دەڵێت "نزیكەی ١٩٠ هەزار فەرمانبەر بەشدارییان لە پرۆژەی هەژماری من كردووە و زیاتر لە شەش هەزاریان كارتی بانكییان وەرگرتووەتەوە، زیاتر لە سێ هەزار فەرمانبەریش لەڕێی هەژماری منەوە مووچەیان وەرگرتووە". ڕایشیدەگەیەنێت كە "ئامادەكارییەكان بۆ دەستپێكردنی پرۆژەكە لە دهۆك و سلێمانی لە قۆناغی كۆتاییدایە".
وەزارەتەكە ڕوونكردنەوەیەكی لەبارەی پرۆژەكەوە بڵاو كردووەتەوە و تێیدا دەڵێت "قۆناغی یەكەمی كارەكانی پرۆژەی هەژماری من لە سنووری پارێزگای هەولێر لە كۆتایداییە و لە ماوەی چوار مانگی ڕابردودا نزیكەی ١٩٠ هەزار فەرمانبەر لە سنووری پارێزگاكە بەشدارییان لە پرۆژەی هەژماری من كردووە".
هەروەها بەپێی ڕوونكردنەوەكە، لە ئێستادا "زیاتر لە شەش هەزار فەرمانبەر كارتی بانكییان وەرگرتووەتەوە و مانگی ڕابردووش نزیكەی سێ هەزار فەرمانبەر لەڕێی هەژماری منەوە مووچەیان وەرگرتووە".
لە پرۆژەكەدا پێنج بانكی تایبەت بەشدارن كە بریتین لە (بانكی جیهان، بانكی ئاشوور، بانكی ئەهلیی عێراقی، RT bank و bbac bank). وەزارەتی دارایی ئاماژەی بەوە كردووە كە "بانكەكان سەرجەم مەرجەكانیان تێدایە و لەلایەن بانكی ناوەندیی عێراقەوە پەسەند كراون".
وەكوو ئامادەكاری بۆ هەنگاوەكانی داهاتوو و ڕاكێشانی پارە، نزیكەی ٥٠ ئامێری ڕاكێشانی پارە (ATM) لە شاری هەولێر دانراون و "ژمارەیان لە زیادبووندایە".
وەزارەتی دارایی دەڵێت "چەندین بانكی تریش لەسەر هێڵن بۆ بەشداری لە پرۆژەكە و تا ئێستا پرۆژەی دروست كردنی (ھەژماری من) بەبێ هیچ كێشە و ئاستەنگێك بەڕێوە دەچێت، ئامادەكارییەكان بۆ دەستپێكردنی پرۆژەی (هەژماری من) لە پارێزگاكانی دهۆك و سلێمانی لە قۆناغی كۆتاییدایە".
وەزارەتی دارایی هەرێم، پرۆژەی (هەژماری من)ـی بە "پرۆژەیەكی گرنگ و ستراتیژیی كابینەی نۆیەمی حكومەتی هەرێمی كوردستان" ناو بردووە كە "لەلایەن نووسینگەی سەرۆكوەزیران بە هاوكاریی وەزارەتی دارایی و ئابووری و بە ڕەزامەندیی بانكی ناوەندیی عێراق ئەنجام دەدرێت".
"ئامانج لە پرۆژەكە، بنیاتنانی سیستەمێكی بانكیی بەهێزە كە فەرمانبەران و مووچەخۆران تیایدا لە چەندین خزمەتگوزاریی دارایی و بانكی سوودمەند دەبن و لە قۆناغی داهاتووشدا كارمەندانی كەرتی تایبەت دەبنە خاوەن ( هەژماری من)"، وەزارەتی دارایی وا دەڵێت.