پەرەگراف
پاش زیاتر لە ساڵێك، حكومەتی هەرێم بڕیارەكەی دادگای باڵای فیدراڵی بۆ هاوتاكردنی مووچەی خانەنشینانی هەرێم لەگەڵ عێراق، جێبەجێ نەكردووە. یەكێتیی خانەنشینانی كوردستان دەڵێت "سكاڵا لەسەر ئەو كەسانە تۆمار دەكەین كە هۆكارن بۆ جێبەجێنەكردنی بڕیارەكە".
یەكێتییەكە ئەمڕۆ لە كۆنگرەیەكی ڕۆژنامەوانیدا ڕایگەیاند "لەگەڵ فایەق زیدان، سەرۆكی ئەنجوومەنی باڵای دادوەریی عێراق كۆبووینەتەوە و چوارپێنج جار ئەم قسەیەی دووبارە كردەوە (هیچ كەس و دەسەڵاتێك لە عێراقدا بۆی نییە بڕیاری دادگای فیدراڵی جێبەجێ نەكات)".
سادق عوسمان، وتەبێژی یەكێتیی خانەنشینانی كوردستان، وتی "مانگێك لەمەوبەر، هەفتەیەك مۆڵەتمان دا بە حكومەتی كاربەڕێكەری هەرێم بۆ جێبەجێكردنی بڕیارەكە، بەڵام وەڵامیان نەبوو، بۆیە ناچار بووین جارێكی دیكە ڕوو بكەینەوە بەغداد".
سادق عوسمان داوای لە حكومەتی هەرێم كرد كە "تا زووە" ئەم بابەتە لەگەڵ بەغداد چارەسەر بكات و مافی خانەنشینان بگەڕێننەوە، بە پێچەوانەوە ئەوان "لەو دادگا تایبەتانەی كە بەدواداچوون بۆ بڕیارە جێبەجێنەكراوەكانی دادگای فیدراڵی دەكەن، سكاڵا لەسەر هەردوو سەرۆكوەزیران و هەردوو وەزیری دارایی عێراق و هەرێم" تۆمار دەكەن.
ڕۆژی 23-11-2022، دادگای باڵای فیدراڵی بڕیاری دا لە دۆسیەی سكاڵای خانەنشینان لە دژی مەسرور بارزانی، سەرۆكی حكومەت و ئاوات شێخ جەناب، وەزیری دارایی ھەرێم.
دادگای فیدراڵی بڕیاری دا بە نادەستووریبوونی كاركردنی دەسەڵاتی هەرێم بە یاسای خانەنشینیی ژمارە ٢٧ی ساڵی ٢٠٠٦ی هەڵوەشاوە، ھەروەھا پابەندكردنی دەسەڵاتی هەرێم بە كاركردن بە یاسای خانەنشینیی یەكگرتوی عێراق ژمارە ٩ی ساڵی ٢٠١٤ی هەمواركراو لە هەرێمی كوردستان.
یوسف محەمەد، سەرۆكی پێشووی پەرلەمانی كوردستان كە لە نزیكەوە ئاگاداری دۆسیەكە بوو، بڕیارەكەی بە "سەركەوتنێكی گەورە" ناو برد.
یوسف محەمەد وتی، جێبەجێكردنی یاسای خانەنشینیی بەركاری ئێستای عێراق لە بەرژەوەندیی خانەنشینانە، "بۆ نمونە لانی كەمی مووچەی خانەنشینی لە یاسای ژمارە ٩ی ٢٠١٤ی هەمواركراوی بەركار لە عێراق (٥٠٠٠٠٠ پێنجسەد هەزار) دینارە، بەڵام لە یاسای ژمارە ٢٧یساڵی ٢٠٠٦ی هەڵوەشاوە و رێنماییەكانی هەرێم (٢٢٠٠٠٠ دوسەد و بیست هەزار) دینارە.
وەكو یوسف محەمەد وتی، ئەمە جگە لە دادپەروەرییەكی زیاتر لە مووچەی خانەنشینی لە نێوان بەرزترین مووچە و كەمترین مووچە، ڕەچاو كردنی بڕوانامە سەرەڕای ساڵانی خزمەت، ڕەچاوكردنی ڕێژەی گرانبوونی باری بژێوی لەسەر ئاستی عێراق، پێدانی ١٢ مانگ مووچەی تەواو بە دەرماڵەوە وەكوو پاداشتی كۆتایی خزمەت بۆ ئەوانەی ٢٥ ساڵ و زیاتر خزمەتیان هەیە و چەندین جیاوازیی تر.