پەرەگراف
كۆمەڵی دادگەری و یەكگرتووی ئیسلامی دەڵێن، بەپێی هەموو سیناریۆكان بە یەكلیستیشەوە، كورد لە كەركووك هەر حەوت كورسیی ئەنجوومەنی پارێزگای دەبردەوە.
ڕوونكردەوەی ئەم دوو لایەنە لە كاتێكدایە كە لیستەكەیان بە ناوی (مەشخەڵی كەركووك)، لە هەڵبژاردنی ئەنجوومەنی پارێزگاكاندا (6655) دەنگی بەدەست هێنا و نەگەیشتە كورسسییەك، هەروەها نەوەی نوێ 24620 دەنگ بەدەست هێنا و كورسیی بەدەست نەهێنا، بەو هۆیەشەوە لە تۆڕە كۆمەڵایەتییەكان تۆمەتبار كران بەوەی دەنگی كوردیان سووتاندووە و كورسییەكی كورد لەدەست دراوە.
بەشی ئامار و داتابەیسی مەكتەبی هەڵبژاردنی كۆمەڵی دادگەری، بە داتابەیسێك ژمارەی دەنگ و كورسییەكانی ئەنجوومەنی پارێزگای كەركووكی ڕوون كردووەتەوە.
مەكتەبی هەڵبژاردنی كۆمەڵ دەڵێت، لە حاڵەتی یەكلیستبوونی كورددا، كۆی دەنگەكانی كورد (217774) دەنگە، بەپێی سیستمی (سانتلیگۆی هەمواركراو) كە لەم هەڵبژادنەدا كاری پێ كراوە بۆ دابەشكردنی كورسییەكان، كورد بەو ژمارە دەنگە حەوت كورسیی بەردەكەوێت، لە كاتێكدا ئێستایش هەر حەوت كورسییەكەی بەدەست هێناوە.
هەروەها فاتیح سەنگاوی، ئەندامی سەركردایەتیی یەكگرتوو، لە نووسینێكدا لەژێر ناوی "ئایا لیستی مەشخەڵی كەركووك و نەوەی نوێ بوونەتە هۆی لەدەستدانی كورسیی كورد لە كەركووك؟"، چوار سیناریۆ دەخاتە ڕوو كە تێیدا كورد هەر حەوت كورسی دەهێنێت.
فاتیح سەنگاوی دەشڵێت "دەبێت بزانین ژمارە لە خزمەت كورددا بووە، چونكە لیستە عەرەبی و توركمانییەكان بە ٢٧٥٩٥٠ دەنگ، هەشت كورسییان بردووە، لە كاتێكدا دوو لیستە كوردییەكە بە ١٨٦٤٨٦ دەنگ حەوت كورسییان بردووە، واتە ٨٩٤٦٤ دەنگی لیستەكانی دیكە یەك كورسییان فەرق كردووە".
سیناریۆكان:
سیناریۆی یەكەم: هەموو كورد بە یەك لیست بەشداریی بكردایە ئەوكاتە كۆی دەنگەكانی كورد یەكسان دەبوون بە ٢١٧٧٧٤ دەنگ، لەو دۆخەدا كورد حەوت كورسیی دەبرد، ئێستاش كورد هەر حەوت كورسیی بردووە، واتە هیچ كورسییەك زیادی نەدەكرد.
سیناریۆی دوووەم: ئەگەر هاوپەیمانی لەنێوان (یەكێتی و نەوەی نوێ و مەشخەڵدا بكرایە، ئەوكات ژمارەی دەنگەكانیان یەكسان دەبوون بە 170648 دەنگ، لەو دۆخەشدا ژمارەی كورسییەكانی یەكێتی هەر بە پێنج دەمانەوە و هیچ كورسیی كورد زیادی نەدەكرد.
سیناریۆی سێیەم: ئەگەر هاوپەیمانی لە نێوان پارتی و نەوەی نوێ و مەشخەڵدا ئەنجام بدرایە، ئەوكات ژمارەی دەنگەكانیان دەبووە ٧٨٠٢٤ دەنگ، لەم دۆخەدا ژمارەی كورسییەكانی یەكێتی دەبوونە چوار كورسی و هاوپەیمانیەتییەكە دەبووە سێ كورسی، واتە كۆی گشتیی كورسیەكان هەر بە حەوت كورسی دەمایەوە .
سیاناریۆی چوارەم: مەشخەڵ و نەوەی نوێ هاوپەیمان بونایە، ئەوكات دەنگیان دەبووە (31275) دەنگ، كورسییەكی یەكێتی كەمی دەكرد، بەڵام كۆی كورسیی كورد هەر حەوت كورسی دەبوو .