پەرەگراف
وەزارەتی دارایی هەرێم قسەكانی بەڕێوەبەری پێشووی باجەكان دەربارەی بڕی باج لە هەرێم بە "درۆیەكی شاخدار و ناپاكی لە خەڵك و حكومەتی هەرێم" ناو دەبات و دەڵێت "بە مافی خۆمانی دەزانین ڕێكاری یاسایی توند لە دژی پڕوپاگەندەكار بگرینە بەر".
دوو ڕۆژ لەمەبەر، زانیار محەمەد قادر، بەڕێوەبەری گشتیی پێشووی باجەكان و خانووبەرەی میری، لە گفتوگۆیەكدا لەگەڵ دەنگی ئەمریكا وتی "ئێمە ئەوكات ساڵانە بەس لە داهاتی باج دەگەیشتینە 800 ملیار دینار، بەس لەبەر مەقاسەی عێراق بە ڕەسمی دەمانوت 220 ملیار دینار، واتە ئەو ژمارەیەمان داخڵ دەكرد و دەنووسی".
وەزارەتی دارایی و ئابووریی هەرێم لە ڕوونكردنەوەیەكدا وەڵامی ناوبراوی داوەتەوە و دەڵێت "حكومەتی هەرێمی كوردستان لە ماوەی ڕابردوودا، بە هەماهەنگیی حكومەتی فیدراڵیی عێراق و لە ڕێگەی لیژنەی دیوانی چاودێریی دارایی، هەموو داتا و ژمارە ڕاستەقینەكانی داهات و باجی ناوخۆی ئاشكرا كردووە و ئەو پرسە كۆتایی هاتووە".
وەزارەتەكە دەشڵێت "ورووژاندنی ئەم بابەتە لەم كاتە هەستیارەدا و بەلاڕێدابردن و چەواشەكردنی هاووڵاتییانی هەرێمی كوردستان و حكومەتی فیدراڵی، ئامانجێكی خراپی هەیە و دەیەوێت زیان بە پرسی ڕوونی و شەفافییەت بگەیەنێت و هەماهەنگییە داراییەكانی هەرێم و حكومەتی فیدراڵی لە زیانی خەڵكدا بەرەو خراپی بڕۆن".
وەزارەتی دارایی، بەڕێوەبەری گشتیی پێشووی باجەكان تۆمەتبار دەكات بەوەی كە "كێشەی یاسایی هەبووە" و دەڵێت "لەلایەن ئەنجومەنی وەزیرانەوە كەیسەكەی ڕەوانەی دادگای لێكۆڵینەوەی دەستپاكیی هەولێر بۆ گرتنەبەری ڕێكاری یاسایی، كراوە".
زانیار محەمەد قادر، بەڕێوەبەری گشتیی پێشووی باجەكان و خانووبەرەی میری، جەخت لەوە دەكاتەوە كە "دادپەروەری لە سەپاندنی باجدا نبووە" و دەشڵێت "ئەو باجەی ئەمڕۆ لە هاووڵاتیان وەردەگیرێت، لەگەڵ دۆخ و ژیانی ئەمڕۆیاندا ناگونجێت. بێگومان لە باجدا پارێزگایەك لەچاو پارێزگایەكی تر غەدری لێ دەكرێت، بۆیە دەسەڵات دراوە بە وەزیری دارایی لە یاساكەدا كە لێخۆشبوون دەربكات".
بەڵام وەزارەتی دارایی لە ڕوونكردنەوەكەیدا بانگەشەی ئەوە دەكات كە لە كابینەی نۆیەمدا "زۆرترین چاكسازی لە باجدا كراوە" دەڵێت "باج بە شێوەیەكی ڕوون و شەفاف مامەڵەی لەگەڵدا كراوە".