بەڕێوەبەری پێشووی تەندروستیی چەمچەماڵ: وام دەزانی ئەگەر تاوان ئاشكرا بكەم ڕێزم لێ دەگرن كەچی دەریان كردم
پەرەگراف
بەڕێوەبەری پێشووی تەندروستیی چەمچەماڵ دەڵێت "حەوت ساڵە حەوزی ئاوی خواردنەوەی چەمچەماڵ پاك نەكراوەتەوە و قەسابخانەكەی لە زبڵدان پیسترە". دەشڵێت "وام دەزانی ئەگەر تاوان ئاشكرا بكەم، ڕێزم لێ دەگرن، كەچی دەریان كردم".
دكتۆر فەرهاد محەمەد، بەڕێوەبەری پێشووی تەندروستیی چەمچەماڵ، لە ڕوونكردنەوەیەكدا باس لە "هۆكاری ناچاركردنی بە دەسلەكاركێشانەوە" دەكات، لە كاتێكدا وەكوو خۆی دەڵێت "ئەوەی من و هاوڕێكانم لە ماوەی دەسبەكاربوونما بۆ تەندروستیی چەمچەماڵمان كرد، بەدرێژایی هەموو ڕابردووی ئەو سێكتەرە و ئەم شارە، نەكرابوو".
دكتۆر فەرهاد محەمەد دەربارەی ئەوەی بۆچی لە پۆستەكەی لابراوە، دەڵێت "سوودی چییە، وا هەموو خەڵكی چەمچەماڵ و كوردستان زانییان كە حەوزی سەرەكیی ئاوی خواردنەوەی شاری چەمچەماڵ حەوت ساڵە پاك نەكراوەتەوە و پڕ بووە لە زبڵ و پیسی و خاشاك، من لەسەری هاتوومەتە دەنگ و لەسەر ئەوە دەریان كردووم؟!".
"سوودی چییە، ئەگەر هەموو خەڵكی چەمچەماڵ ئاگادار بكەمەوە كە قەسابخانەكەیان لە زبڵدان پیسترە و هەرچی مەرجی تەندروستی هەیە تێیدا نییە"، دكتۆر فەرهاد وا دەڵێت.
هەروەها بەڕێوەبەری تەندروستیی چەمچەماڵ باس لەوە دەكات كە "حەوزی ئاوی خواردنەوەی چەمچەماڵ، حەوت ساڵە بەهۆی تاكە كەسێكەوە كە خانووی لەسەر حەوزەكە دروست كردووە و ڕێگر بووە لە پاكردنەوەی، پاك نەكراوەتەوە".
دەقی ڕوونكردنەوەكەی دكتۆر فەرهاد محەمەد، بەڕێوەبەری پێشووی تەندروستیی چەمچەماڵ:
لەجیاتی ڕوونكردنەوە
ژمارەیەكی زۆر لە دۆست و هاوڕێانم، چەند ڕۆژێكە داوای ئەوەم لێ دەكەن ڕوونكردنەوەیەك بنووسم و هۆكاری ئەوە ئاشكرا بكەم كە بۆچی ناچاریان كردم دەست لەكار بكێشمەوە؟!
لە كاتێكدا پێشتر خۆم دووجار داوام كردبوو كە دەست لەكار بكێشمەوە، بەڵام قبووڵ نەكرابوو، كاتی خۆیشی تەكلیفیان لێ كردم ببمە بەڕێوەبەر، نەك خۆم داوام كردبێ.
ئەوەی من لەگەڵ هاوڕێكانمدا لە ماوەی دەسبەكاربوونما بۆ تەندروستیی چەمچەمالمَان كرد، بەدرێژایی هەموو ڕابردووی ئەو سێكتەرە و ئەم شارە، نەكرابوو.
ئیستا بۆچی لام دەبەن؟!
وەڵامەكەی من لەم چەند ڕۆژە هەر ئەوە بوو كە من بێئومێد بووم لە قسەكردن و چیتر نامەوێ قسە بكەم.
سوودی چییە، وا هەموو خەڵكی چەمچەماڵ و كوردستان زانییان كە حەوزی سەرەكیی ئاوی خواردنەوەی شاری چەمچەماڵ حەوت ساڵە پاك نەكراوەتەوە و پڕ بووە لە زبڵ و پیسی و خاشاك، من لەسەری هاتوومەتە دەنگ و لەسەر ئەوە دەریان كردووم؟!
سوودی چییە، ئەگەر هەموو خەڵكی چەمچەماڵ ئاگادار بكەمەوە كە قەسابخانەكەیان لە زبڵدان پیسترە و هەرچی مەرجی تەندروستی هەیە تیای نییە؟!
من ویستم ئەمجارەیان وەك پێشوو نەكەم، وەكوو ئەو هەموو بەڕێوەبەری فەرمانگە و بەرپرسی حیزبی و ئاغا و كوێخا و خاوەن دیوەخان و پیاوماقووڵانی شار و بەحساب نووسەرو ڕۆژنامەنووسی شار، دەست بگرم بە كڵاوەكەی خۆمەوە و بێدەنگ ببم و بەبێ بێدەنگی ئەو شارە بۆ هەتاهەتایە بەجێ بێڵم و خەریكی ژیانە تایبەتەكەی خۆم بم.
ئەو خەڵكەی كە دەزانم هیچیان پێ ناكرێ و ئاگاداركردنەوەیان لەو تاوانە گەورەیەی چەندین ساڵە دەرحەق بەوان دەكرێ و سەرەڕای ئەوەی شاری چەمچەماڵ بەتەنها خۆی بەقەد هەردوو وڵاتی فەرەنسا و ئەڵمانیا سامانی سروشتی هەیە، كەچی ئاوی خواردنەوەی نییە و پانزە ڕۆژ جارێك ئاویان دەدرێتێ و ئاوەكەش لەناو زبڵداندا حەوت ساڵە گلدەدرێتەوە، سوودی چییە ئاگادریان بكەمەوە؟!
وا ئێستا ئاگادارم كردنەوە و بە هەموو دەنگم هاوار دەكەم: حەوت ساڵە حەوزی ئاوی خواردنەوەی شارەكەیان پاك نەكراوەتەوە، قەسابخانەكەشیان هیچ مەرجێكی تەندروستیی تیا نییە، بزانم چەند كەس لەجیاتی من دێنە دەنگ؟!
وام زانی ئەگەر تاوان كەشف بكەم، ڕێزم لێ دەگرن، كەچی دەریان كردم!
وام زانی ئەگەر تاقیگەی ناوەندی و سەنتەری گورچیلەی دەستكرد و سەنتەری پسپۆڕیی ددان و سەنتەری فریاكەوتن و خودەج و پزیشكی دادوەری و دەیان هۆبە و بەش و هۆڵی منداڵبوون و دوو نەخۆشخانە و سەدان ئامیری پزیشكی و ئۆتۆمبێلی گواستنەوەی دەرمان و ئیسعاف و بە بڕی هەشت ملیار دینار كەلوپەل لەم قەیرانەدا بۆ ئەم تەندروستی ئەم شارە بكڕم، پەیكەری ڕیزلێنانم بۆدروست دەكەن و منداڵەكانم شانازی بە پەیكەرەكەی باوكیانەوە دەكەن، كەچی لەبەر خاتری خاترداران كە خانوویان لەسەر حەوزی ئاوخواردنەوەی شارەكە دروست كردبوو، دەریان كردم.
وامزانی ئەگەر لەسەر منداڵی قادركەرم بێمە جواب كە بۆچی دانا غاز و سامانە سروشتییەكان چوار كارمەندیان بۆ دانامەزرێنن بۆ ئەوەی مەڵبەندەكەیان دانەخرێ، دەستخۆشیم لێ دەكەن، كەچی دەریان كردم.
وامزانی ئەوەی بەڕێوەبەری چاك و ڕاستگۆ و دەستپاك و داوێنپاك و دڵسۆز بێت، پشتگیری دەكرێ، كەچی دەریان كردم.
یەكێك لە فەرمانبەرەكانی دیوانی بەڕێوەبەرایەتی كە تەلەفۆنی بۆم كرد، بەدڵی پڕەوە وتی: خەفەت لە هیچ ناخۆم، لەوە نەبێ كاتێك دەهاتین بۆ لات بۆ كڕینی شتێك، كە بێئومێد دەبووی لەوەی ژمێریاری بتوانێ بیكڕێت، لە گیرفانی خۆت پارەكەت دەداینێ و دەمانكڕی.
منیش وتم: خۆشم خەفەت لە هیچ ناخۆم، لەوە نەبێ دوای ئەو هەموو تەمەن و ئەو هەموو كتێبەی كە خوێندمنەوە، عەقڵم پێی نەشكا كە ناكرێ لەسەر ڕێگایەكی هەڵە و سیستەمێكی هەڵە بتەوێ بە ڕێكی و ڕاستی هەنگاو بنێی.
ڕاستییەكەی ویستم ئەمجارە بێدەنگ بم و قسە نەكەم بەرامبەر ستەم و ستەمكاری، بەڵام نەیانهێشت، هەر ئەوانەی كە هانیان دەدام لەبری ئەوان من واز لە بەرژەوەندیی تاكەكەسیی خۆم بێنم و عیادە و ژیانی تایبەتی خۆم بكەمە قوربانی نەخۆشخانە و ژیانی گشتی، ئەمجارەش نەیانهێشت بێدەنگ بم و قسەم كرد، بزانم ئەنجامەكەی چی و كێ لەسەر مافی گشتی دێتە دەنگ؟!
خۆ داواكاری گشتیی ئەم وڵاتە ئەم نووسینەی من دەبینێ، یان كەسێك هەیە پێی بڵێ كە بەڕێوەبەری تەندروستیی چەمچەماڵ بە ڕوون و ڕاشكاوی دەڵێ: حەوزی ئاوی خواردنەوەی شاڕێكی گەورەوگران حەوت ساڵە بەهۆی تاكە كەسێكەوە كە ڕێگر بووە لە پاكردنەوەی، پاك نەكراوەتەوە و هەموو بەڵگەكانیش لە كۆمێنت دادەنێم، بزانم داوكاری گشتی لەسەری دێتە دەنگ؟!
خۆ داواكاری گشتی ئەم نووسینەی من دەبینێ، یان كەسێك هەیە پێی بڵێ كە بەڕێوەبەری تەندروستیی شارێكی گەورەوگران دەڵێ: قەسابخانەی ئەو شارە هیچ مەرجێكی تەندروستیی تیا نییە، بزانم لەسەری دێتە دەنگ؟!
ئەگەر كەسێكی دەسەڵاتداری دڵسۆز هەبوایە و لەسەر مافی گشتی بهاتایەتە دەنگ، ئەوە سەرئەنجامی دەسەڵات و حكومڕانییەكەمان بەو شێوەیە نەدەبوو كە دوای سی و دوو ساڵ لە فەرمانڕەوایی، پەنجا هەزار مامۆستا سێ مانگە لەجیاتی لە پۆلی وانەوتنەوەدا بن، لەسەر جادەن بۆ وەرگرتنی مووچەكانیان.
من جارێكی تریش وەكوو هەمیشە هاتمەوە دەنگ و لەبری ئەو چوار پۆستەی كە لە شوێنی بەڕێوەبەری تەندروستیی چەمچەماڵ بۆیان پێشنیار كردووم، بۆ ئەوەی پێنج ساڵی تر لە ژیان و تەمەن و مافی ماڵ و مناڵەكەم بكەمەوە قوربانیی ئەم سیستەمە گێڕ و ناڕێكە و هەر كاتێكیش دەسم برد بۆ گەنجینەی دزراو و ماڵی شووشەبەندی گەوران، بە بیانوویەكی تر دەرم بكەنەوە، من بڕیارم داوە نەك پۆست و پلە و پایە، بەڵكوو فەرمانبەرێتیش لە سایە و سێبەری ئەم سیستەمەدا ڕەفز بكەم و خۆم خانەنشین بكەم.
بە ئومێدی ئەوەی ڕۆژ و ڕۆژگارێك بێت ئەم تەرازووە لاسەنگە ڕاستبێتەوە، ئەگەر تەمەنیش مۆڵەتی نەدا ئەو ڕۆژگارە ببینم، ئومێدم وایە نەوەكانی داهاتوو بە ڕێزەوە ناوی ئێمە بهێنن.
د. فەرهاد محەمەد
٢٠٢٣/١٢/٧
بەفرانبار
تێبینی:
1- دوای ڕاپۆرتەكەی ئێمە و بەڕێوەبەرایەتیی خۆپاراستنی تەندروستیی سلێمانی، چەند ڕۆژێك بەر لە ئێستا ڕێڕەوێكی لاوەكییان بۆ حەوزەكان دروست كرد و بەبێ ئەوەی خانووە تەجاوزكە بڕمێنن و بەبێ چاودێریی ئێمە و كامێرا، حەوزەكان بەحساب پاككراونەتەوە، بەڵام ئەی ئەو حەوت ساڵەی كە پاكنەكرایەوە؟! كێ لێی بەرپرسە و ئەو سەدان هاووڵاتییەی كە بێگومان بەهۆی پیسیی حەوزەكانەوە تووشی زیانی تەندروستی بوون، كێ لێی دێتە دەنگ؟!
2- لە ڕاپۆرتەكەی خۆپاراستنی سلێمانیدا بە ڕوونی هاتووە كە حەوزەكان جگە لەوەی پڕە لە زبڵ و حەوت ساڵە پاك نەكراونەتەوە، ڕێگاشی نییە بچێتە سەر حەوزەكان و چاودێری بكەی و كارەبای بەردەوامیشی نییە تا كۆنترۆڵی ئامێری پیدانی كلۆر بكەی بە ڕێژەی گونجاو كلۆر بكرێتە حەوزەكانەوە و سیاجی حەوزەكانیش ڕووخینراوە و ناوچەی موحەرەمە نەماوە بۆ حەوزەكان.
3- قەڵەمفڕۆشراوەكان ئەوانەی كە پەیجی علوج بەپارەیەكی كەم بۆ مافیاكان دەبەن بەڕیوە دوای ئەم ڕونكردنەوەیە دیسان پەلامارم ئەدەن بۆ ئەوەی شوێنن پێی تاوانی ئاغاكانیان بشارنەوە