پەرەگراف
ئومێد سەباح، سەرۆکی دیوانی ئەنجوومەنی وەزیرانی هەرێم، ڕایگەیاند "بەم نزیكانە دەگەڕێینەوە بۆ بەغدا و وەرگرتنی قەرز بۆ سێ مانگی دیكەی مووچە، خاڵی یەكەمی گفتوگۆكانمان دەبێت".
ئومێد سەباح لە كەركووك لە كاتی بانگەشەی هەڵبژاردنی پارتیدا قسەی بۆ میدیاكان كرد و وتی "سەرۆكوەزیرانی هەرێم نامەیەكی فەرمیی بەئامانجی ناردنی سێ 700 ملیار دینار قەرزی دیكە بۆ مووچە، بۆ سوودانی ناردووە، ئەو بابەتە بووە بە بابەتێكی ستراتیژی و گرنگ لای ئێمە و خاڵی یەكەمی گفتوگۆكانمانە".
سەبارەت بە ناردنی سێیەم 700 ملیار دیناری قەرزیش كە لە وادەی خۆی دواكەوتووە و بەهۆیەوە مووچە دابەش نەكراوە، سەرۆکی دیوانی ئەنجوومەنی وەزیرانی هەرێم دەڵێت "ڕێكارەكانی ناردنی 700 ملیار دینارەكە تەواو بوون، بڕیاریشە بەم نزیكانە دەست بە دابەشكردنی مووچە بكرێت".
ئومێد سەباح گفتوگۆكانی نێوان هەرێم و بەغدادی بە "گشتگیر" ناو برد كە پەیوەستن بە "بودجە، نەوت و ناوچە كوردستانییەكانی دەرەوەی ئیدارەی هەرێم"، وتیشی "گفتوگۆكان بەرەو ئاراستەی باش دەڕۆن".
بەهۆی ڕاگرتنی هەناردەی نەوت و كێشەكانی لەگەڵ بەغداد، حكومەتی هەرێم چەند مانگە نەیتوانیوە مووچە لە وادەی خۆی دابەش بكات، ئێستاش مووچەی مانگەكانی (9، 10، 11)ی مووچەخۆران قەرزارە، بەوهۆیەشەوە پرۆسەی خوێندن لە دوو پارێزگا و دوو ئیدارەی سەربەخۆی هەرێم پەكی كەوتووە.