پەرەگراف
بە بڕیاری تەیف سامی، وەزیری دارایی عێراق، سەرجەم دەسەڵاتەكان لە مەسعود حەیدەر، بریكاری وەزارەتی دارایی وەرگیرایەوە.
لە فەرمانێكی وەزاریدا كە واژووی وەزیری دارایی عێراقی لەسەرە، هاتووە "بڕیار درا بە هەڵوەشاندنەوەی ئەو دەسەڵاتانەی كە بەپێی فەرمانێكی وەزاری لە 12-1-2023 بە مەسعود حەیدەر ڕۆستەم وەكوو بریكاری وەزارەتی دارایی دراوە".
سەرچاوەیەك ڕاستیی نووسراوەكەی بۆ پەرەگراف پشتڕاست كردەوە و بەپێی زانیارییەكانی پەرەگرافیش سەرجەم دەسەڵاتەكان لە مەسعود حەیدەر وەرگیراوەتەوە.
مەسعود حەیدەر لە 12-1-2023 بە فەرمانێكی وەزاری لە وەزارەتی دارایی وەكوو بریكاری وەزارەت دەستبەكار بوو.
دوورخستنەوەی مەسعود حەیدەر كە لەسەر پشكی پارتی بریكاری وەزارەتی دارایی بوو، لە كاتێكدایە كە ئەمڕۆ ناوبراو لە لێدوانێكدا وتى "جگە لەو 700 ملیار دینارەی كە پێشتر بڕیاری لێ دراوە، پارەی دیكە ئامادە كراوە بە قەرز بۆ هەرێمی كوردستان بنێردرێت و وەكو مووچە بدرێت بە فەرمانبەران".
هەروەها بەغدای تۆمەتبار كرد بەوەی كە "بابەتی مووچە و بودجە بە سیاسی كردووە".