پەرەگراف
لە وەڵامی ئەنجوومەنی بەڕێوەبەرایەتیی گشتیی پەروەردەی سلێمانی بۆ دەستپێكردنەوەی دەوام، نوێنەرانی مامۆستایانی ناڕازی ڕایدەگەیەنن "بە هیچ شێوەیەك سازش لەسەر ماف و داواكارییەكانمان ناكەین و تا چارەسەری ڕیشەیی بۆ پرسی مووچە، درێژە بە بایكۆت و ناڕەزایەتییەكان دەدەین".
نوێنەرانی مامۆستایان و فەرمانبەرانی ناڕازی جەخت لە چوار داواكاری بۆ شكاندنی بایكۆت دەكەنەوە، ئەوانیش "دەسپێكردنەوەی پلەبەرزكردنەوە، دامەزراندنی مامۆستایانی وانەبێژ، دیاریكردنی چارەنووسی مووچە پاشەكەوتكراوەكان و دیاریكردنی چارەنووسی مووچەی سێ مانگی كۆتایی ئەمساڵە".
دەقی ڕاگەیەندراوی نوێنەرانی مامۆستایان و فەرمانبەرانی ناڕازی:
ئەمڕۆ ئەنجومەنی بەڕێوەبەرایەتی گشتی پەروەردەی سلێمانی بەبێ گەڕانەوە بۆ مامۆستایان و جێبەجێكردنی هیچ داواكارییەكی مامۆستایان، داوا لە مامۆستایانی میلاك و وانەبێژ دەكەن بایكۆت بشكێنن.
ئێمە لە نوێنەرانی مامۆستایانی سەرجەم شاروشارۆچكەكان لێرەوە ڕایدەگەیەنیین: بە هیچ شێوەیەك سازش لەسەر ماف و داواكارییەكانمان ناكەین و تا چارەسەڕی ڕیشەیی بۆ پرسی مووچە، درێژە بە بایكۆت و ناڕەزایەتیەكان دەدەین.
ئێمە ئاواتەخوازبووین ئەنجومەنی بەڕێوەبەرایەتی گشتی پەروەردە لەجیاتی داوای شكاندنی بایكۆت لەمامۆستایان ، داوای لە حكومەتی هەرێم بكردایە ئەو داواكارییانەی مامۆستایان جێبەجێ بكات كە جێبەجێكردنیان لە ئەستۆی حكومەتی هەرێمە ئەوانیش
١ــ دەسپێكردنەوەی پلەبەرزكردنەوە
٢ـ دامەزراندنی مامۆستایانی وانەبێژ
٣ ــ دیاریكردنی چارەنوسی مووچە پاشەكەوتكراوەكانمان .
٤ـ دیاری كردنی چارەنوسی سێ مووچەی سێ مانگی كۆتایی ئەمساڵ .
هەر بۆ درێژەدان بە ناڕەزایەتیەكان ڕۆژی یەكشەممە مامۆستایان ناڕەزایەتیەكان دەبەنە بەغدای پایتەخت و لەگەڵ گەڕانەوەشیان لێرە بەگوڕێكی تر ناڕەزایەتیەكان دەست پێدەكەنەوە
دووبارە ڕایدەگەیەنین: بایكۆت بەردەوامە بۆ ئەوەی كاتێكی تر و ساڵێكی تر بایكۆت نەكەینەوە .
نوێنەرانی مامۆستایان و فەرمانبەرانی ناڕازی