پەرەگراف
پەرلەمانی عێراق تەمەنی کۆمسیۆنی ھەڵبژاردنی درێژکردەوە بە ئامانجی لابردنی بەربەست لەبەردەم ھەڵبژاردنی ئەنجومەنی پارێزگاکانی عێراق و ھەڵبژاردنی پەرلەمانی کوردستان.
سۆران عومەر، ئەندامی پەرلەمانی عێراق، بە پەرەگرافی ڕاگەیاند "پەرلەمانی عێراق هەمواری یاسای كۆمیسیۆنی هەڵبژاردنەكانی پەسەند كرد. بەپێی هەموارەكە تەمەنی كۆمیسیۆن بۆ ماوەی شەش مانگ درێژ كراوەتەوە".
ئەو پەرلەمانتارە وتیشی "تەمەنی كۆمیسیۆنی هەڵبژاردنەكانی عێراق لە 7-1-2024 كۆتایی دەهات، ئامانج لەم درێژكردنەوەیە ئەوەیە كە كۆمیسیۆن كاتی هەبێت بۆ ڕاگەیاندنی ئەنجامی هەڵبژاردنی پارێزگاكانی عێراق و ئەنجامدانی هەڵبژاردنی پەرلەمانی كوردستان".
بڕیارە ھەڵبژاردنی ئەنجومەنی پارێزگاکانی عێراق لە ١٨-١٢-٢٠٢٣ و ھەڵبژاردنی پەرلەمانی کوردستان لە ٢٥-٢-٢٠٢٤ بەڕێوەبچن، کۆمسیۆنی ھەڵبژاردنی عێراق سەرپەرشتی ھەردوو ھەڵبژاردنەکە دەکات.