پەرەگراف
ئیسرائیل و حەماس بە نێوەندگیریی قەتەر و میسر لەسەر ئاگربەستێكی چوار ڕۆژە ڕێككەوتن. بەپێی ئاگربەستەكە 50 دیلی ئیسرائیلی و 150 دەستگیركراوی فەلەستینی ئازاد دەكرێن.
قەتەر لەگەڵ ڕاگەیاندنی ئەم ئاگربەستە، دەڵێت "لە ماوەی 24 كاتژمێری داهاتوودا شەڕ ڕادەگیرێت و ئەو كەسانەی ئازاد دەكرێن ژن و منداڵن. ئاگربەستەكەیش قابیلی درێژكردنەوەە".
دیل و زیندانییەكان لە ماوەی چوار ڕۆژی ئاگربەستەكەدا هەنگاو بە هەنگاو ئازاد دەكرێن. ئیسرائیل دەڵێت "لە ماوەی ئەو چوار ڕۆژەدا جەنگ ڕادەگرین و ئەگەر بارمتەی زیاتر ئازاد بكرێت، ماوەی ئاگربەستەكە درێژتر دەكرێتەوە، بە جۆرێك بۆ ئازادكردنی 10 بارمتە ڕۆژێك ئاگربەست درێژ دەكرێتەوە".
ئیسرائیل جەختیشی كردووەتەوە كە ئەم ئاگربەستە "كۆتایی جەنگ نییە"، جەنگێك كە وەكوو خۆی دەڵێت ئامانج لێی "سڕینەوەی حەماس و دڵنیابوون لە نەمانی هیچ هەڕەشەیەك لە غەززەوە بۆ سەر ئیسرائیلە".
بەپێی ئاگربەستەكە، دەبێت ژمارەیەكی زۆر هاوكاریی مرۆیی لە خۆراك و سووتەمەنی و پێداویستیی پزیشكی ڕەوانەی غەززە بكرێت.
دەربارەی ئاگربەستەكە، حەماس دەڵێت "بەپێی ئاگربەستەكە، 150 ژن و منداڵی فەلەستینی ئازاد دەكرێن و سەدان بارهەڵگر هاوكاریی مرۆیی و پێداویستیی پزیشكی و سووتەمەنی دەگاتە غەززە".
حەماس دەشڵێت "لەماوەی ئاگربەستەكەدا، فڕینی فڕۆكەی سەربازی و سیخوڕییش بەسەر ئاسمانی باشووری غەززەدا بە تەواوی ڕادەگیرێت و بەسەر ئاسمانی باكووری غەززەیشدا ڕۆژی شەش كاتژمێر ڕادەگیرێت".
لە ماوەی ئاگربەستەكەدا، هێرش و بۆردوومانەكانی ئیسرائیل بۆ سەر غەززە و دەستگیركردنی فەلەستینییەكان ڕادەگیرێن.