پەرەگراف
مامۆستا و فەرمانبەرانی ناڕازیی زانکۆی سلێمانی جەخت لە بەردەوامیی بایکۆت و دەربڕینی ناڕەزایی دەکەنەوە لەپێناو مووچەکانیان، تا وەڵام دەدرێنەوەو داواکانیان جێبەجێ دەکرێت.
"بەردەوام دەبین و هەوڵی فراوانکردنی ناڕەزاییەکان دەدەین. سبەینێش لە بەردەم کەمپی نوێی زانکۆی سلێمانی گردبوونەوەی ناڕەزایی ئەنجام دەدەین"، ئەنجوومەن و ستافی ناڕازیی مامۆستایان و فەرمانبەرانی زانكۆی سلێمانی لە کۆنگرەیەکی ڕۆژنامەوانیدا ڕایانگەیاند.
ئەنجوومەنەکە داواش لە چین و توێژەکانی دیکە دەکات پێکەوە کار بکەن و داواکارییەکانیان فراوانتر بکەن.
ئەنجوومەن و ستافی ناڕازیی مامۆستایان و فەرمانبەرانی زانكۆی سلێمانی لە كۆنگرەیەكی ڕۆژنامەوانیدا ڕایگەیاند "لە چەند هەفتەی ڕابردوودا، دەسەڵات بە كردەوە و میكانیزمی جیاواز كاری لەسەر كۆتاییپێهێنانی ناڕەزایەتییەكان كردووە، بەڵام شكستی هێناوە".
لە ناوەڕاستی مانگی ١١ نزیک دەبینەوەو هێشتا دیارنییە کەی مووچەی مانگی ٩ و ١٠ دابەش دەکرێت. بەپێی لێدوانی بەرپرسانی حكومەت و وەزارەتی پەروەردە، هیچ ئەگەرێك بۆ جێبەجێكردنی داواكارییە سەرەكییەكانی مامۆستایان لەئارادا نییە، هەرێم بۆ چارەسەری كێشەی مووچە لەگەڵ بەغدا لە دانوستاندایە و ئەوەش كاتی پێویستە.
دوو مانگە پرۆسەی خوێندن دەستی پێ كردووە، دەیان هەزار مامۆستا و فەرمانبەر لە سنووری پارێزگاكانی سلێمانی و هەڵەبجە و ئیدارەكانی ڕاپەڕین و گەرمیان بایكۆتیان كردووە، وەزارەتی پەروەردە دەڵێت "چارەنووسی خوێندنی نزیكەی 700 هەزار قوتابی لە مەترسیدایە".
دەربارەی چارەنووسی خوێندن لە ناوچەكانی بایكۆت، سامان سیوەیلی، وتەبێژی وەزارەتی پەروەردە، پێشتر بە پەرەگرافی وت "هیچ بڕیارێك لە وەزارەتی پەروەردەوە نییە و هەرچی هەبێت بە فەرمی ڕادەگەیەنین".
ئەگەرچی مامۆستایانی ناڕازی ڕەتی دەكەنەوە مەترسیی فەوتانی خوێندنی ئەمساڵی خوێندكاران لە ناوچەكانی بایكۆت هەبێت و ئاماژە بەوە دەكەن كە لە كاتی بڵاوبوونەوەی ڤایرۆسی كۆرۆنایشدا خوێندن دواكەوتووە و ساڵی خوێندن نەفەوتاوە، بەڵام وەزارەتی پەروەردە پێی وایە "دۆخی خوێندن لەو ناوچانە لە مەترسیدایە".