٢٠ هەزار یەكە نیشتەجێبوونەكەی حكومەت بۆ كرێنشینان بەردی بناغەی دانەنراوە؛ ١٥٩ هەزار خێزان چاوەڕێن
پەرەگراف
١٥٩ هەزار خێزان لە هەرێمی كوردستان فۆرمیان پڕكردووەتەوە بۆ ئەو ٢٠ هەزار یەكەی نیشتەجێبوونەی حكومەتی هەرێم ساڵێك و شەش مانگە ڕای گەیاندووە كە دروستیان دەكات و هێشتا بەردی بناغەیان دانەنراوە. دەستەی وەبەرهێنان بەدوای وەبەرهێنەردا دەگەڕێت بۆ دروستكردنی یەكەكان بەو مەرج و كوالێتییەی دیارییان كردووە.
شوقەكانی حكومەت قۆناغی یەكەمی 20 هەزار یەكەیە بە سەرپەرشتیی دەستەی وەبەرهێنان؛ لە ناوەڕاستی ساڵی ڕابردودا فۆڕمی بۆ پڕكرایەوە، بە ناوی كرێنشین و كەمدەرامەت و هەژارەوە بانگەشەی بۆ دەكرێت.
بەرگەشت ئاكرەیی، وتەبێژی دەستەی وەبەرهێنان، بە پەرەگرافی وت "یەكە نیشتەجێبوونەكان لە پارێزگا و ئیدارە سەربەخۆكان قۆناغی باشی بڕیوە، ڕێكارە یاسایی و كارگێڕییەكانی باش ڕۆیشتوون". جەختیشی كردەوە "ئەوەی پێداگری لەسەر دەكەین، كوالێتیی یەكەكانە و دەمانەوێت وەبەرهێنێك بدۆزینەوە كە بەو مەرج و كوالێتییەی ئێمە دەمانەوێت، دروستی بكات".
20 هەزار یەكەكەی دەستەی وەبەرهێنان بە ڕووبەری 80 و 100 و 120 مەتری، لە 17ـی حوزەیران تا تەمووزی 2022 فۆڕمی بۆ پڕكرایەوە، فۆڕمەكان لەسەدا 50ـیان لە هەولێرەوە پڕكرانەوە، لە سەدا 26ـیان لە سلێمانی و لەسەدا 11ـیان لە دهۆك و پاشان لە ناوچەكانی دیكەوە بوون.
وتەبێژی دەستەی وەبەرهێنان دەڵێت "ئەو 20 هەزار یەكەیە بڕیارە لە پارێزگا و ئیدارە سەربەخۆكان دروست بكرێن؛ تا ئێستا 159 هەزار هاووڵاتی فۆڕمیان پڕكردووەتەوە. هەڵاوێری ناوەكان دەكەین و كەسانی هەژار و كەمدەرامەت كە شایستە بن، جیا دەكرێنەوە، ئەوەش بە ئاگاداریی پارێزگا و ئیدارەكان و بەشێوەیەكی شەفاف و بە ئاگاداریی میدیاكان".
بەرگەشت ئاكرەیی ئاماژەی بەوەش دا كە یەكەكان بەپێی ژمارەی دانیشتوان بەسەر شوێنەكاندا دابەش كراون، لە شاری سلێمانی لەسەر شەقامی تاسڵوجە دروست دەكرێن و بۆ هەولێریش دوو شوێن دیاری كراوە. پێشتریش ئیدارەی پارێزگای هەولێر بڵاوی كردەوە كە هەردوو ناوچەی گەڕەسۆر و باغلومنارە بۆ دروستكردنی یەكەكان دەستنیشان كراون.
وتەبێژەكەی دەستەی وەبەرهێنان وتی "لەڕێی وێبسایتی پەرەگرافـەوە داوا لە وەبەرهێنەران دەكەین؛ ئەو كەسانەی كە بەرژەوەندیی گشتییان بەلاوە گرنگە، با ئۆفەرەكانیان پێشكەشی دەستەی وەبەرهێنان بكەن بۆ دروستكردنی یەكەكانی نیشتەجێبوون".
بەدەر لەو ٢٠ هەزار یەكەی نیشتەجێبوونە، ٩ هەزار یەكەی دیكە هەن كە وەزارەتی ئاوەدانكردنەوە و نیشتەجێكردن سەرپەرشتیی دەكات و چەند مانگێكە پڕكردنەوەی فۆڕم بۆی دەستی پێ كردووە و بەردەوامە. ئەو یەكانە پڕۆژەی كۆنی حكومەتن و بەهۆی خەرجنەكردنی بودجەوە لە كابینەكانی ڕابردودا كارەكانیان ڕاگیراوە و بڕیارە بەبێ پێشەكی، بە قیستی درێژخایەنی 25 ساڵ بە هاووڵاتیان بدرێن.
مەریوان مەلا حەسەن، وتەبێژی وەزارەتی ئاوەدنكردنەوە، بە پەرەگرافی وت "یەكەكان بە قۆناغی جیاجیا كەوتوونەتە بواری جێبەجێكردنەوە و بەشێكیان لەسەدا 95ی كارەكانیان تەواو بووە، بەشێكیشیان لەسەدا 13".
وتەبێژی وەزارەتی ئاوەدنكردنەوە دەربارەی ئەو پرۆژانەی زۆرینەی كارەكانیان تەواو بوون، دەڵێت "لە شاری سلێمانی لە زڕگوێز و سیتەك پرۆژە هەیە كە لەسەدا 95ـی تەواو بووە، لە بنەسڵاوەی هەولێر پرۆژەیەك لەسەدا 95ـی تەواو كراوە و لە زاخۆش پرۆژەیەكی دیكە لەسەدا 96ـی تەواو بووە".
بەپێی بەدواداچونی پەرەگراف؛ دوو پرۆژەكەی زڕگوێز و سیتەك كە 1500 یەكەی نیشتەجێبوونن، لە 2010ـەوە باڵەخانەكانیان تەواو كراون و خزمەتگوزارییان ماوە، بەڵام لەوكاتەوە تەواو نەكراون.
ئەوە لەكاتێكدایە بەپێی بەدواداچوونی پەرەگراف و ئامارەكانی كۆمەڵەی داكۆكی لە مافی كرێنشینانی كوردستان، بە نزیكەیی ١٣٠ هەزار خێزانی كرێنشین هەن و شوقەكانی حكومەت لەسەدا 22ـی پێداویستیی كرێنشینان پڕ دەكاتەوە، ئەگەر تەنیا بە كرێچی بدرێن.