پەرەگراف
پارێزگاری سلێمانی جارێكی دیكە داوا لە مامۆستایان دەكات دەوام دەست پێ بكەنەوە و ڕایدەگەیەنێت "ژمارەیەكی زۆری ناوەندەكانی خوێندن دەستیان بە خوێندن كردووەتەوە". هەڤاڵ ئەبووبەكر جەخت دەكاتەوە كە "لەگەڵ مامۆستایانداین و پشتیوانیانین، بەڵام نابێت ئەوەی داوای دەكەین زیان بە نەوەكانمان بگەیەنێت".
پارێزگاری سلێمانی ئەمڕۆ بۆ میدیاكان دوا و ڕەخنەی لە حكومەتی هەرێم گرت بۆ دابیننەكردنی مووچە و وتی "ئەوەی كە حكومەتی هەرێم بە 32 ساڵ حوكمڕانی نەیتوانیوە مووچەی مانگێك پاشەكەوتی هەبێت، كەمتەرخەمی و ستەمێكە لە مووچەخۆران و بازاڕ و كایەی گشتی، داواكەی ئێمە ئەوەیە كە نابێت ئێمە بۆ سەندنی مافی خۆمان، ستەمێكی دیكە لە قوتابیان و خوێندكاران بكەین".
"پەیامی ئێمە گوزارشت نییە لە هیچ هێزێكی دەسەڵات و دەرەوەی دەسەڵات، ئێمە لە گیانی بەرپرسیارێتیمانەوە پەیامی خۆمان داوە كە ئیدارەی پارێزگایەك دەدەین زیاتر لە دوو ملیۆن و 400 هەزار كەسی تێدایە، دەبێت بە خەمی هەموو پێكهاتەكانەوە بین"، هەڤاڵ ئەبووبەكر وا دەڵێت.
هەروەها داوای لە حكومەتی فیدراڵی كرد "بودجە بنێرێت" و وتیشی "ئەو ئەركە دەخەینە سەر شانی حكومەتی هەرێم كە مووچە دابین بكات".