سی پی تی: 22 هاووڵاتیی مەدەنيی هەرێم لە هێرش و بۆردوومانی توركیادا شەهید و بریندار بوون
پەرەگراف
تیمی كوردستانی عێراقی ڕێكخراوی سی پی تی، ژمارەی قوربانیانی مەدەنی و جۆر و هێرشی بۆردوومانەكانی توركیا بۆ سەر هاووڵاتیانی مەدەنی لە هەرێمی كوردستان بڵاو دەكاتەوە و دەڵێت "لە ساڵی 2023دا 22 هاوڵاتیی مەدەنی شەهید و بریندار بوون".
تیمی كوردستانی عێراقی ڕێكخراوی سی پی تیی ئەمریكی دەڵێت "لە 1ی كانوونی دووەمی 2023 تاوەكو 17ی تشرینی یەكەمی 2023، بەهۆی بۆردوومان و ئۆپەراسیۆنەكانی توركیا لەناو خاكی هەرێمی كوردستاندا، 10 هاووڵاتیی مەدەنی شەهید بوون و 12 هاووڵاتیی تری مەدەنیش بریندار بوون".
سی پی تی دەڵێت "شەش لەو هاووڵاتییە مەدەنییانە بەهۆی هێرشی فڕۆكەی بێفڕۆكەوان، سێ هاووڵاتیی تر بەهۆی فڕۆكەی جەنگی، یەك هاووڵاتی بەهۆی تەقینەوەی مین لە دەوروبەری یەكێك لە بارەگا سەربازییەكان شەهید بوون".
هەروەها لەناو بریندارەكانیشدا "دوو هاوڵاتیی مەدەنی بەهۆی تەقەی ڕاستەوخۆی سەربازانی توركیا، نۆ هاووڵاتیی تریش بەهۆی فڕۆكەی بێفڕۆكەوان و یەك هاووڵاتیش بەهۆی تەقینەوەی مینەوە بریندار بوون".
وەكوو تیمی كوردستانی عێراقی ڕێكخراوی سی پی تی پۆلێنی كردووە، "لەناو شەهیدەكاندا سێ هاووڵاتی لە كاتی كۆكردنەوەی گژوگیای بەهارەدا و شەش هاووڵاتیی تر لەناو ئۆتۆمبێل و یەك هاووڵاتیش لە ماڵەوە بە ئامانج گیراون".
"هەرچی بریندارەكانیشن، دوو كەسیان لە كاتی لەوەڕاندنی مەڕ و ماڵاتەكانیاندا، پێنج كەسیان لەناو ئۆتۆمبێل، سیانیان لەناو كەمپی ئاوارەكانی مەخموور، یەك هاووڵاتی لەكاتی كۆكردنەوەی گژوگیای بەهارە و یەك هاووڵاتیی تریش لەناو ماڵەكەی خۆیدا بەئامانج گیراون"، سی پی تی وا دەڵێت.
سەبارەت بە شوێنی ڕووداوەكان و هێرشەكان بۆ سەر هاووڵاتیانی مەدەنی، ڕێكخراوەكە دەڵێت "لە پارێزگای دهۆك چوار شەهید و دوو بریندار، لە پارێزگای هەولێر یەك شەهید و هەشت بریندار، لە پارێزگای سلێمانی پێنج شەهید و دوو بریندار بەهۆی ئۆپەراسیۆن و هێرشەكانی توركیا بۆ سەر خاكی هەرێم لە ساڵی 2023دا تۆمار كراون".
تیمی كوردستانی عێراقی ڕێكخراوی CPTی ئەمریكی، ئاماژە بەوەش دەكات "سوپای توركیا لە درێژكراوەی ئۆپەراسیۆنی چنگی قوفڵدا كە لە ناوەڕاستی مانگی نیسانی 2022دا ڕایگەیاند، بەراورد بە ساڵانی ڕابردوو بە قووڵاییەكی زیاتر و بە دووریی سەدان كیلۆمەتر لە سنووری نێوان توركیا-عێراق، سەرباری بە ئامانجگرتنی گەریلاكانی پارتی كرێكارانی كوردستان، هاووڵاتیانی مەدەنی و گوندنشینان و جووتیارانی هەرێمی كوردستان بە ئامانج دەگرێت".