پەرەگراف
وەزیری دارایی هەرێم لەسەر داواکارییەکەی لیژنەی دارایی پەرلەمانی عێراق، دەچێتە بەغدا بۆ وەڵامدانەوەی پرسیارەکان لەسەر داهات. فەرمانگەی میدیا و زانیاریی حكومەتی هەرێم دەڵێت "بۆ بەرگریكردن لە مافی مووچەخۆران و لەسەر داوای حكومەتی هەرێمی كوردستان، دەچێتە بەغدا".
پێشتر لیژنەی دارایی پەرلەمانی عێراق داوای ئامادەبوونی هەردوو وەزیری دارایی عێراق و هەرێمی لە كۆبوونەوەیەكی لیژنەكەدا كرد، بۆ وەڵامدانەوە پرسیارەكان لەسەر داهات و خستنەڕووی ئەو داتایانەی كە ئەندامانی لیژنەكە زانیاریی وردیان لەسەر نییە.
وەزیری دارایی هەرێم سبەی 17-10-2023 دەچێتە بەغد و ڕۆژی دواتر بەشداریی كۆبوونەوەی لیژنەی دارایی دەكات بۆ وەڵامدانەوەی پرسیارەكان.
فەرمانگەی میدیا و زانیاریی حكومەتی هەرێم دەڵێت "بۆ بەرگریكردن لە مافی مووچەخۆران و لەسەر داوای حكومەتی هەرێمی كوردستان، ئاوات جەناب، وەزیری دارایی، دەچێتە بەغدا و لەگەڵ لیژنەی دارایی پەڕلەمانی عێراق كۆدەبێتەوە".
ئەم لێدوانەی فەرمانگەی میدیا و زانیاری لە كاتێكدایە كە بەشداریی وەزیری دارایی هەرێم لەسەر داوای لیژنەی دارایی پەرلەمانی عێراق بووە و سەرۆكی حكومەتی هەرێم ڕەزامەندیی لەسەر نیشان داوە، كۆبوونەوەكە لەسەر داوی حكومەتی هەرێم دوو هەفتە دواخرا.
لیژنەی دارایی پەرلەمانی عێراق دەیەوێت بڕی مووچە و ژمارەی فەرمانبەرانی هەرێمی كوردستان و پلەكانیان، ژمارەی خانەنشینان و ئەو كەسانەی چاودێریی كۆمەڵایەتی دەیانگرێتەوە، هەروەها داهاتە نانەوتییەكان و داهاتی دەروازە نافەرمییەكان لە وەزیری دارایی هەرێم وەربگرێت، ژمارەیەك پرسی دیكەی داراییش لە كۆبوونەوەكەدا تاوتوێ بكرێت.
ڕۆژی 4-10-2023، ئومێد سەباح، سەرۆكی دیوانی حكومەتی هەرێمی كوردستان، نووسراوێكی ئاراستەی نوێنەرایەتیی هەرێم لە بەغداد كرد و تێیدا ڕایگەیاندووە كە سەرۆكوەزیرانی هەرێم ڕەزامەندیی نیشان داوە لەسەر داواكاریی لیژنەی دارایی پەرلەمانی عێراق بۆ ئامادەبوونی وەزیری دارایی و شاندی هەرێم لە كۆبوونەوەی داواكراو، بەڵام داوای كرد وادەیەكی دیكە بۆ كۆبوونەوەكە دیاری بكرێت.
هەمان ڕۆژ نوێنەرایەتیی حكومەتی هەرێمی كوردستان لە بەغداد، بە نووسراوێكی فەرمی وەڵامی لیژنەی دارایی پەرلەمانی عێراقی داوەتەوە و تێیدا ڕەزامەندیی مەسروور بارزانیی لەسەر كۆبوونەوەكە ڕاگەیاندووە، بەڵام داوای دواخستنی كردووە.
لە نووسراوەكەدا هاتبوو "وەزیری دارایی هەرێمی كوردستان ئەم هەفتەیە و هەفتەی داهاتوویش ناتوانێت لە لیژنەی دارایی ئامادە بێت، چونكە سەرقاڵە بە سەرپەرشتیی فەرمانگەكانی وەزارەتەكەی بۆ ئامادەكردنی داواكارییەكانی دەستكردن بە وردبینی لە ژمارە و بڕی مووچەی فەرمانبەران، خانەنشینان و ئەو كەسانەی چاودێریی كۆمەڵایەتی لە هەرێم دەیانگرێتەوە".
دیوانی چاودێریی دارایی فیدراڵی بە هاوئاهەنگی لەگەڵ دیوانی چاودێریی دارایی هەرێمی كوردستان، سەرقاڵی وردبینیكردنە لە داتاكانی مووچەخۆرانی هەرێم و بڕی مووچەی پێویست بۆیان.
ڕۆژی 30-9-2023، عەتوان عەتوانی، سەرۆكی لیژنەی دارایی پەرلەمانی عێراق، نووسراوێكی ئاراستەی نوێنەرایەتیی حكومەتی هەرێمی كوردستان لە بەغداد كرد. تێیدا داوای كردبوو ڕۆژی پێنجشەممە 5-10-2023، وەزیری دارایی حكومەتی هەرێمی كوردستان لە لیژنەكەیان ئامادە بێت بۆ تاوتوێكردنی ژمارەیەك دۆسیە و پرسی دارایی.