پەرەگراف
نێچیرڤان بارزانی "دوو كێشەی گەورە" دەخاتە ڕوو كە هۆكارن بۆ دەستپێنەكردنەوەی هەناردەی نەوتی هەرێم و ڕایشیدەگەیەنێت "كێشەكە لە توركیا نییە و لە بەغدایە".
نێچیرڤان بارزانی، سەرۆكی هەرێمی كوردستان، لە پانێڵێكی دیداری میری بە ناونیشانی "بەدامەزراوەییكردنی پەیوەندیی فیدراڵ-هەرێمییەكان: پرۆسەیەك كە لەمێژە دواكەوتووە"، سەبارەت بە هۆكاری دەستپێنەكردنەوەی نەوتی هەرێم ڕایگەیاند "توركیا ئێستا ئامادەیی خۆی دەربڕیوە بۆ ئەوەی بۆریی نەوتەكە بكرێتەوە و نەوت بڕوات، بەڵام دوو كێشەی گەورە بەربەستن بۆ ئەوەی نەوت هەناردە نەكرێتەوە".
سەرۆكی هەرێم دەڵێت "كێشەی یەكەم پارەی كۆمپانیاكانە. ئەگەر نەوت بڕوات، پارەكە دێتەوە بەغدا، بەڵام ئایا پارەی كۆمپانیاكانی نەوت چۆن دەدرێت؟ ئێستا بەپێی یاسای بودجەی عێراق، بۆ هەر بەرمیلێك لە نەوتی كوردستان شەش دۆلاریان داناوە كە ئەوە زۆر كەمە".
وەكوو نێچیرڤان بارزانی ڕوونی كردەوە، كۆمپانیاكانی نەوت وتوویانە كە گرێبەستەكانیان لە هەرێمی كوردستان لە "جۆری سێرڤز (خزمەتگوزاری) نییە و هاوبەشییە لەگەڵ كۆمپانیاكان"، كۆمپانیاكان دەڵێن "ئەگەر بڕیار وابێت لە هەر بەرمیلێك شەش دۆلار وەربگرین، بۆمان دەرناهێنێت".
نێچیرڤان بارزانی وتیشی "گرفتەكەی دیكە ئەوەیە، سۆمۆ دەبێ گرێبەست لەگەڵ ئەو كۆمپانیایانە بكات كە تاوەكو ئێستا نەوتی كوردستانیان كڕیوە. پێم وایە ئەوە نابێتە كێشە، چونكە خەریكن ئێستا لەگەڵ یەكدی گفتوگۆ دەكەن، بەڵام ئەم پرسە دەبێ لەگەڵ بەغدا چارەسەر بكرێت بۆ ئەوەی لە ڕووی كردارییەوە دەست بە هەناردەكردنی نەوت بكرێتەوە".
سەرۆكی هەرێم لە وەڵامی ئەو پرسیارەی كە ئایا كێشەكە لە توركیا نییە و لە بەغدایە؟ وتی "بە دڵنیاییەوە كێشەكە لە توركیا نییە و لە بەغدایە".