بافڵ تاڵەبانی هەوڵێكی بۆ ئاشتكردنەوەی سەركردە نیگەران و ناڕازییەكانی یەكێتی دەست پێ كرد
پەرەگراف
بافڵ تاڵەبانی هەوڵێكی بۆ ئاشتكردنەوەی سەركردە نیگەران و ناڕازییەكانی یەكێتی دەست پێ كرد. پاش كۆتاییهاتنی كۆنگرە، دەیەوێت دەسەڵاتەكانی بۆ ئەو پرسە بەكار بهێنێت و بە پێدانی پۆست ناڕازییەكان ڕازی بكات.
ئەم هەوڵەی بافڵ تاڵەبانی، لاهوور شێخ جەنگی و ئەو كەسانە نزیكن لەو ناگرێتەوە، كە پێشتر ئەندامی سەركردایەتی بوون و بە فەرمانی بافڵ تاڵەبانی دوورخراونەتەوە.
هەوڵی سەردانكردن و ئاشتكردنەوەی سەركردە ناڕازی و نیگەرانەكانی یەكێتی، لە كۆبوونەوەی دوێنێی سەركردایەتیی حیزبەكەدا بڕیاری پێكهێنانی لیژنەیەكی بۆ درا كە بافڵ تاڵەبانیی سەرۆكی یەكێتی خۆی سەرۆكایەتیی دەكات.
لیژنەكە كە جەعفەر شێخ مستەفا، بەرپرسی ئەنجوومەنی پاراستنی بەرژەوەندییە باڵاكانی یەكێتی و عومەر شێخ مووس، ئەندامی دەستەی دامەزرێنەری یەكێتی و عیماد ئەحمەد، ئەندامی مەكتەبی سیاسی و سەعدی ئەحمەد پیرە، وتەبێژی یەكێتی تێیدا ئەندامن، سەردانی سامان گەرمیانی، ئەندامی سەركردایەتیی پێشووی یەكێتیی كرد.
سامان گەرمیانی لە هەژماری خۆی لە فەیسبووك وێنەیەكی سەردانەكەی بڵاو كردووەتەوە و هیچ قسەیەكی لەبارەوە نەنووسیوە، بەڵام بە دانانی دوو دڵی سەوز ئاماژەی ئەرێنیبوونی كۆبوونەوەكە و یەكێتیبوونی خۆی گەیاندووە. میدیای یەكێتیش هیچی لەبارەوە نەوتووە.
بەهۆی ڕووداوەكانی چەند ساڵی ڕابردووی ناوخۆی یەكێتی، ژمارەیەك لە سەركردەكانی ئەو حیزبە نیگەرانن و وازیان لە كاری حیزبی هێناوە، لە كۆنگرەی پێنجەمی یەكێتیشدا ئەو ناڕەزایەتییانە بە تەواوی دەركەوتن.
مەلا بەختیار كە دیارترین سەركردەی ناڕازیی یەكێتییە، بەر لە كۆنگرە لە پەیامێكدا ڕەخنەی زۆری لە ئامادەكارییەكان و شێوازی هەڵبژاردن و دیاریكردنی ئەندامانی مەكتەبی سیاسی و ئەنجوومەنەكانی یەكێتی گرت و ڕایگەیاند بەو شێوەیە بەشداریی كۆنگرە ناكات، بەڵام ئەوانی دیكە بێدەنییگان هەڵبژاردووە.
هەریەك لە مەحمود سەنگاوی، عەدنان حەمەی مینا، حامید حاجی غالی و شۆڕش ئیسماعیل لە سەركردە دیارە ناڕازییەكانی یەكێتین كە ئامادە نەبوون بەشداریی كۆنگرەی پێنجەمی حیزبەكەیان بكەن.
بافڵ تاڵەبانی بەپێی ئەو دەسەڵاتانەی كە پەیڕەوی ناوخۆی حیزبەكەی پێی داوە، دەیەوێت سەركردە ناڕازییەكان ئاشت بكاتەوە و بە ئەندامێتیی لە یەكێك لە ئەنجوومەنەكانی یەكێتی ڕازییان بكات.
بەپێی پەیڕەوی ناوخۆی یەكێتی، بافڵ تاڵەبانی دەستكراوەیە بۆ دیاركردنی ئەندامانی ئەنجوومەنی سەركردایەتی، ئەنجوومەنی پاراستنی بەرژەوەندییە باڵاكان و ئەنجوومەنی پشتیوانی، هەروەها دەتوانێت ئەندامی دیكەی بۆ زیاد بكات.
سەركردە ناڕازییەكان ناتوانن ببنە ئەندامی مەكتەبی سیاسیی یەكێتی، بەوپێیەی چواردە ئەندامەكەی مەكتەبی سیاسی دوای دیاركردنیان لەلایەن بافڵ تاڵەبانییەوە، دوێنێ لە كۆبوونەوەی سەركردایەتیدا ھەڵبژێردران.
ئەندامانی مەكتەبی سیاسی نوێی یەكێتی پێكدێن لە، قوباد تاڵەبانی، عیماد ئەحمەد، شاناز ئیبراهیم ئەحمەد، دەرباز كۆسرەت رەسوڵ، شاڵاو كۆسرەت رەسوڵ، ئاسۆ مامەند، د.جوان ئیحسان، رەفعەت عەبدوڵا، شاڵاو عەلی عەسكەری، تەلار لەتیف، بورهان سەعید سۆفی، ئەحمەد حەمە كەریم (شێخ ئەحمەد نۆكان)، نزار ئامێدی و هاوڕێ دارۆ شێخ نوری.
ھەر لەو كۆبوونەوەیەدا سەعدی ئەحمەد پیرە بە وتەبێژی یەكێتی دیاری كرا. ھاوكات خەسرەو گوڵ محەمەد، وەكوو نوێنەری سەرۆكی یەكێتی لە هەرسێ ئەنجوومەنی سەركردایەتی، ئەنجوومەنی باڵای بەرژەوەندی و ئەنجوومەنی پشتیوانی دەستنیشان كرا و بەشداریی كۆبوونەوەكانی هەر سێ ئەنجوومەنەكە دەكات.
بەهۆی ئەوەی هەوڵی ئاشتكردنەوەی سەركردە ناڕازییەكانی یەكێتی خرایە دوای هەڵبژاردنی مەكتەبی سیاسی، پێناچێت پۆستی ئەندامێتی لەو ئەنجوومەنانەی دیكەی یەكێتی بەشێك لە سەركردە ناڕازییەكان ڕازی بكات، ئەمە جگە لەوەی كە هۆكارەكانی دیكەی نیگرانییەكانیان چارەسەر نەكراوە و بەگشتی لە ئیدارەدانی حیزبەكە بەم شێوەیەی ئێستا ڕازی نین.