پەرەگراف
فەرماندەی گشتیی هەسەدە "شەهیدبوونی 29 ئەندامی ئاسایش"ی ڕۆژئاوای كوردستانی لە هێرشێكی ئاسمانیی توركیادا ڕاگەیاند و بە "تاوانێكی دڕندانە" ناوی دەبات. مەزڵووم عەبدی هەڕەشە دەكات و دەڵێت "مافی ڕەوای خۆمان بۆ وەڵامدانەوە بەكار دەهێنین".
مەزڵووم عەبدی، فەرماندەی گشتیی هێزەكانی سووریای دیموكرات (هەسەدە)، لە تۆڕی كۆمەڵایەتیی ئێكس ڕایگەیاند "٢٩ ئەندامی هێزەكانی ڕووبەڕووبوونەوەی ماددەی هۆشبەر لە هێرشی توركیادا بۆ سەر ئەكادیمیای ئاسایشی ناوخۆ لە دێریك شەهید بوون".
فەرماندەی گشتیی هەسەدە دەڵێت "تاوانێكی دڕندانە و پێشێلكارییەكی ئاشكرای مافەكانی مرۆڤە كە ناتوانرێت پشتگوێ بخرێت".
"هێزەكانی ئاسایشی ناوخۆ دامەزراوەیەكی مەدەنییە و پشتیوانی لە هاوپەیمانی نێودەوڵەتی وەردەگرێت بۆ پاراستنی ئاسایش و سەقامگیریی ناوچەكە"، مەزڵووم عەبدی وا دەڵێت.
جەختیش دەكاتەوە كە "لە بەرانبەر دەستدرێژی و هێرشە داگیركارییەكانی توركیا بۆ سەر خاك و گەلەكەمان بێدەنگ نابین و مافی ڕەوای خۆمان بۆ وەڵامدانەوە بەكار دەهێنین".
ڕووانگەی سووری بۆ مافەكانی مرۆڤ دەڵێت "ژمارەی كوژراوانی بۆردوومانەكەی توركیا بۆ سەر ناوەندێكی مەشق و ڕاهێنانی ئاسایشی ناوخۆ بۆ 30 كەس بەرز بووەتەوە و 37 كەسیش بریندارن كە برینی هەندێكیان سەختە".
هێرشەكە شەوی ڕابردوو ئەنجام دراوە و فڕۆكە جەنگییەكانی توركیا چەند ناوچەیەكی دیكەی ڕۆژئاوای كوردستانیشیان بۆردوومان كردووە.