پەرەگراف
بافڵ تاڵەبانی ڕۆژێك بە لە دەستپێكردنی كۆنگرەی پێنجەمی یەكێتی، پەیامێك بڵاو دەكاتەوە و جەخت لەوە دەكاتەوە كە "قووڵایی ستراتیژیی كورد لە بەغدایە". دەشڵێت "كۆنگرەی پێنج لەپێناو بەهێزتربوونی یەكێتییەكەمان ساز دەكەین".
بڕیارە سبەینێ 27-9-2023، كۆنگرەی یەكێتی لە سلێمانی دەست پێ بكات و سێ ڕۆژ بخایەنێت. ژمارەیەك لە بەرپرسی باڵا و كادیری دیاری یەكێتی لەوانە مەلا بەختیار، چەتۆ ساڵح، فێنك ئەحمەد، ئاراس شێخ جەنگی، ژینۆ محەمەد (ئەندامی دوورخراوەی سەركردایەتیی یەكێتی)، ڕایان گەیاندووە كە بەشداریی كۆنگرە ناكەن.
بافڵ تاڵەبانی،سەرۆكی یەكێتی، لە پەیامەكەیدا دەڵێت "ئەوانەی یەكێتیتان لە دڵتاندا هەڵگرتووە و بەهیواوە بەرەو داهاتوویەكی گەشتر دەڕوانن، پێكەوە بە یەك ڕۆحیەت و یەك ئامانج بەرەو كۆنگرەی پێنج، بەرەو یەكێتییەكی بەهێزتر و نوێگەر هەنگاو دەنێین".
دوێنێ مەلا بەختیار، ئەندامی ئەنجوومەنی باڵای سیاسی و بەرژەوەندییەكانی یەكێتى، بایكۆتكردنی كۆنگرەی ڕاگەیاند و وتی "لەم كۆنگرەدا هەڵبژاردن نەكراوە، بەڵكوو دەستنیشان كراوە كێ دەربچێت و كێ دەرنەچێت. گوێ بە تێكرشەی قارەمان و خاوەن هەڵوێست نەدراوە، كەمترین كەسوكاری شەهیدیش بۆ كۆنگرە دەرچوون، تەنانەت بە خەڵكیان وتووە دەنگ بەوانە نەدەن".
لەگەڵ نزیكبوونەوەی كۆنگرەی پێنجەمی یەكێتی، ناڕەزایەتی لەناو بەشێك لە بەرپرسان و كادیرانی ئەو حیزبە سەری هەڵدا، 24 كاتژمێر بەر لە دەستپێكردنیشی، ناڕەزایەتییەكان بوون بە بایكۆت.
چەتۆ ساڵح، ئەندامی سەركردایەتیی یەكێتی، دەڵێت "كۆنگرەی پێنجەم، كۆنگرەی هەڵكڕوزاندن و زاڵبوونی مەرامە ترسناكەكانە. یەكێتی لە هێزی بیروبازوو داماڵدراوە بۆ بازووی بێ بیر".
هەروەها فێنك ئەحمەد، ئەندامی سەركردایەتیی یەكێتی، دەڵێت "ئامادە نیم بەشداریی كۆنگرەی پێنجی یەكێتی بكەم. ئەم كۆنگرەیە، نەك كۆنگرەی ڕێكخستنەوە و یەكگوتاری و یەككرداری نییە، بەڵكوو كۆنگرەی وێرانكردنی یەكێتییە".
مەلا بەختیار كە دیارترین سەركردەی یەكێتییە بایكۆتی كۆنگرەی ڕاگەیاندووە، لە پەیامە ڤیدیۆییەكەیدا باسی لە "پیلانگێڕى و خەیاڵێكی ترسناك بۆ ئایندەی یەكێتی" كرد و وتی "ئاراستەیەكی ڕاستڕەو لەناو یەكێتی دروست بووە كە باوەڕی بە دیموكراسی و ئازادی نییە".
"هەڤاڵ بافڵ بۆی هەیە 100 كەس بهێنێتە ناو كۆنگرە، بۆی هەیە لیستی ئەندامانی سەركردایەتی دابنێت، ئەندامانی مەكتەبی سیاسی دابنێت، ئەندامانی ئەنجوومەنی ڕاوێژكاری دابنێت، دەیشیویست قەناعەت بە ئێە بكات كە ئەندامانی ئەنجوومەی باڵاش ئەو دایبنێت"، مەلا بەختیار وای وت.
هەروەها هۆشداریی دا كە "ئەم سیاسەتەی گیراوەتە بەر، ناچێتە سەر و دوای كۆنگرە كاردانەوەی دەبێت". پێیشی وایە "تاكە چارەسەر ئەوەیە یەكێتی بخرێتەوە سەر ڕەگەزە ڕاستەقینەكەی خۆی و بكرێتەوە بە فرە مینبەر".
دەقی پەیامەكەی بافڵ تاڵەبانی، سەرۆكی یەكێتی:
هەڤاڵە سەربەرزەكانم:
یەكێتیی نیشتمانیی كوردستان ئەگەر لە رابردوودا لەڕێگەی شۆڕشی چەكداری و بەخشینی زیاتر لە 26 هەزار شەهید بە خاكی كوردستان خەباتی كردبێت، ئەمڕۆ بە پابەندبوون بە پێداویستییەكانی خەڵك و تێگەیشتن لە دۆخەكە، پێمانوایە باشترین رێگای خەبات بریتییە لە خەباتی سیاسی لەپێناو پاراستنی دەستكەوتەكان، پێشكەشكردنی خزمەتگوزاری و بونیادنانی داهاتوویەكی گەشتر و سەقامگیرتر.
یەكێتی بە دیدگا و ستراتیژێكی بەهێزەوە سیاسەتی خۆی لە ناوەندی فیدراڵ پەیڕەو دەكات، سیاسەتێك كە پێش هەموومان سەرۆك مام جەلال پەیڕەوی دەكرد، ئەویش بریتییە لە ئاشتی، پێكەوەژیان و هاوبەشیی راستەقینە. ئێمە دەزانین قوڵایی ستراتیژیی كورد لە بەغدایە، بۆیە دەمانەوێت لەو رێگەیەوە هەوڵ بۆ بەهێزتركردنی پێگەی هەرێم، بەدەستهێنانی مافە دەستوورییەكان و دەستەبەركردنی ژیانێكی شایستە بۆ خەڵكە خۆشەویستەكەمان بدەین.
هەروەها جەخت لە درێژەدان بە سیاسەتی نیشتمانی و نەگۆڕی یەكێتی دەكەمەوە سەبارەت بە پرسە نەتەوەییەكان و پشتگیریكردن لە مافەكانی گەلی كورد لەهەرشوێنێكی جیهان بێت.
خوشك و براكانم:
هەموومان پێكەوە بەرەو قۆناغێكی نوێی خەباتی رێكخراوەییمان هەنگاودەنێین و كۆنگرەی پێنج لەپێناو بەهێزتربوونی یەكێتییەكەمان ساز دەكەین، دڵنیام بە پشتیوانیی خودا و دڵسۆزیی ئێوەی خۆشەویست سەركەوتوو دەبین و مژدەی یەكێتییەكی پتەوتر بە خەڵكی كوردستان دەدەین.
دەمەوێت لای ئێوەی خۆشەویست و هەموو خەڵكی كوردستان روونبێت، ئێمە بڕوای تەواومان بە نوێگەری و نوێبوونەوە هەیە، لەگەڵ گۆڕانكارییەكان هەنگاودەنێین و خۆمان نوێ دەكەینەوە، ئەمەش راستییەكی مێژووییە و هەمیشە خوێنێكی نوێ بە دەمارەكانی یەكێتیی نیشتمانیی كوردستاندا دەگەڕێت.
خۆشەویستان:
مێژوو سەلماندوویەتی یەكێتی سەنگەری پتەوی كوردایەتی و قەڵای بەرزی خۆڕاگرییە، مێژووی خەباتمان هێندە زێڕینە كە هیچ هێزێك لە خۆمان بە دڵسۆزتر بۆ كوردستان نازانین. ئەمڕۆش هێز و كاریگەریی یەكێتی لە هەرێم و ناوەندی فیدراڵ لای هەمووان روونە و پەیوەندییە نێودەوڵەتییەكانیشمان لە ئاستێكی باڵادایە، ئاشكراشە بەهێزیی یەكێتی واتە بەهێزیی هەرێم و عیراق. بۆیە دەبێت هەموو هەڤاڵێكمان ئەوەی لەیادبێت كە یەكێتیبوون بەرپرسیارێتییەكی مێژوویی، نیشتمانی و ئەخلاقییە. دەبێت هەموو هەوڵ و هەنگاوێكتان هاوتابێت لەگەڵ سیاسەتی نیشتمانییانەی یەكێتی و ئامانجەكەتان خزمەتكردنی كورد و كوردستان بێت.
كەسوكاری سەربەرزی شەهیدان، پێشمەرگە دێرینەكان، زیندانیانی سیاسی و كەمئەندامانی سەنگەر
ئێوە زۆرتان بەخشی بە كوردستان و یەكێتییەكەتان، دەزانین دڵسۆزی و خۆڕاگریی ئێوەی تێكۆشەر بوو یەكێتی گەیاندە ئەم حزبە گەورە و كاریگەرەی كوردستان و ناوچەكە. دڵنیاتان دەكەم و بەڵێنتان پێدەدەم یەكێتی هەمان ئەو یەكێتییە دەبێت كە ئێوە قوربانیتان لەپێناودا و لەبەرامبەر هەوڵ و خۆڕاگریتان وەفادار دەبێت. دڵنیابن یەكێتیی نیشتمانیی كوردستان ئەمانەتی سەرۆك مام جەلال و ئێوەیە و وەك رۆحمان دەیپارێزین.
هەڤاڵان:
ئەوانەی یەكێتیتان لە دڵتاندا هەڵگرتووە و بەهیواوە بەرەو داهاتوویەكی گەشتر دەڕوانن، پێكەوە بە یەك رۆحیەت و یەك ئامانج بەرەو كۆنگرەی پێنج.. بەرەو یەكێتییەكی بەهێزتر و نوێگەر هەنگاو دەنێین و مێژوویەكی درەوشاوە و پڕ لە شانازی بۆ حزبی شەهیدان دەنووسینەوە.