پەرەگراف
ئەمریكا پاڵپشتی بۆ دەستپێكردنەوەی هەناردەی نەوتی هەرێمی كوردستان "دووپات" دەكاتەوە و داواش لە بەغداد دەكات بەردەوامی بە "پێكەوەكاركردن" لەگەڵ حكومەتی هەرێم بدات.
ئەم پەیامەی ئەمریكا لەلایەن ئەنتۆنی بلینكن، وەزیری دەرەوەی ئەمریكاوە محەمەد شیاع سوودانی، سەرۆكوەزیرانی عێراق دراوە، كە ئەمڕۆ بە لە پەراوێزی خولی ٧٨ـەمینی كۆبوونەوەكانی كۆمەڵەی گشتیی نەتەوە یەكگرتووەكان لە نیویۆرك كۆبوونەوە.
وەزارەتی درەوەی ئەمریكا لە ڕاگەیەندراوێكدا دەڵێت "ئەنتۆنی بلینكن هانی حكومەتی عێراقی دا بۆ بەردەوامبوون لە پەرەپێدانی سەقامگیری لە سەرچاوەكانی وزە و ڕووبەڕووبوونەوەی گۆڕانكارییەكانی كەشوهەوا، هەروەها پاڵپشتیی ئەمریكای دووپات كردەوە بۆ كردنەوەی بۆریی نەوت لەگەڵ توركیا".
هەر بەپێی ڕاگەیەندراوەكە، وەزیری دەرەوەی ئەمریكا "هانی حكومەتی عێراقی دا بۆ بەردەوامیدان بە هەماهەنگی و پێكەوەكاركردن لەگەڵ حكومەتی هەرێمی كوردستان، لەپێناو پەرەپێدانی ئاسایش و خۆشگوزەرانی لە هەرێمی كوردستان".
نشاندانی پاڵپشتی لەلایەن وەزیری دەرەوەی ئەمریكاوە بۆ هەرێم، پاش ئەوە دێت كە هەفتەی ڕابردوو ماڵپەڕی ئەلمۆنیتەری ئەمەریكی لە ڕاپۆرتێكدا ئاشكرای كرد، مەسروور بارزانی بانگەوازێكی ئاراستەی جۆ بایدن كردووە بۆ ئەوەی نێوەندگیری بكات لە نێوان بەغداد و هەولێر، بەهۆی قووڵبوونەوەی قەیرانەكان لەگەڵ حكومەتی ناوەند.
بەپێی ڕاپۆرتەكە، مەسروور بارزانی ترسی خۆی نەشاردووەتەوە لەوەی كە ئەگەری هەیە قەوارەی هەرێمی كوردستان تووشی هەرەسهێنان ببێت، ئەگەر قەیرانەكە چارەسەر نەكرێت.
مەسروور بارزانی لە 3ی ئەیلولدا نامەكەی بۆ بایدن نووسیوە و یەكشەممەی ڕابردووتر گەیشتووەتە كۆشكی سپی. تێیدا نووسیویەتی "ئێستا ئەم نامەیەت لە ساتەوەختێكی وەرچەرخان و چارەنووسسازی مێژوویدا بۆ دەنووسم، ساتێكە كە ترسم هەیە ڕەنگە بە زەحمەت زاڵ ببین بەسەریدا. ئێمە لە ڕووی ئابوورییەوە خوێنمان لێ دەچۆڕێت و لە ڕووی سیاسییەوە تووشی نەزیف بووین".
"بۆ یەكەم جار لە ماوەی سەرۆكوەزیرانیمدا، نیگەرانییەكی گەورە باڵی كێشاوە بەسەرمدا، چونكە كەمپەینێكی ناشەرەفمەندانە دژی ئێمە بەڕێوە دەچێت كە ڕەنگە ببێتە هۆی هەرەسهێنانی ئەو مۆدێلەی عێراقێكی فیدراڵی كە ئەمریكا لە ساڵی ٢٠٠٣دا پاڵپشتیی كرد و لەو كاتەوە پشتی دەگرێت"، مەسروور بارزانی وا دەڵێت.
هەناردەی نەوتی هەرێمی كوردستان لە 25-3-2023 لەلایەن توركیاوە ڕاگیرا، پاش ئەوەی كە ئەنقەرە سكاڵایەكی لەوبارەیەوە لە دادگای نێودەوڵەتیی ناوبژیوانیی پاریس بە بەغداد دۆڕاند.
بڕیارەكەی دادگای پاریس، حكومەتی هەرێمی ناچار كرد بە ڕادەستكردنی نەوت بە بەغداد و هەناردەكردنی لە ڕێگەی كۆمپانیای بەبازاڕكردنی نەوتی عێراق (سۆمۆ) ڕازی ببێت. لە ماوەی نزیكەی شەش مانگی ڕابردوویشدا، بەهۆی ڕاگرتنی هەناردەی نەوتەوە، ملیاران دۆلار زیان بە هەرێمی كوردستان گەیشتووە.