ئێران بۆ جێبەجێكردنی ڕێكەوتننامەی ئەمنی فشار لە هەرێم و عێراق دەكات؛ فوئاد حسێن بۆ بەرگرتن بە هێرش دەچێتە تاران
پەرەگراف
هەفتەی داهاتوو ئەو وادەیە كۆتایی دێت كە ئێران دیاریی كردووە بۆ لەچەكداماڵین و كەمپنشینكردنی هێزە ئۆپۆزسیۆنەكانی ڕۆژهەڵاتی كوردستان لە هەرێم. سووربوونی ئێران و هەڕەشەكانی لە ئەگەری جێبەجێنەكردنی ڕێككەوتنی ئەمنیی نێوان بەغداد و تاران و جووڵەكردن بە هێز بەرەو سنوورەكان، وەزیری دەرەوەی عێراق دەباتە تاران و داوا لەو وڵاتە دەكات هێرش نەكات و توندووتیژی بەكار نەهێنێت.
فوئاد حسێن، وەزیری دەرەوەی عێراق، ڕایگەیاند "عێراق دەستی بە جێبەجێكردنی ڕێككەوتنەكە كردووە و ئێمە پابەندی بە ڕێككەوتنەكەوە. سبەی ئەم پەیامە بۆ ئێران دەبەین و چاوەڕوان دەكەین توندووتیژی دژی هەرێمی كوردستان بەكار نەهێنێت كە دواجار دەكاتە دژی سەروەریی عێراق".
وەزیری دەرەوەی عێراق جەختی كردەوە كە "عێراق پابەندی ڕێككەوتنەكە بووە و حكومەتی هەرێمی كوردستان ڕێكاری پێویستی گرتووەتەبەر بۆ دوورخستنەوەی ئەو هێزانە لە ناوچە سنوورییەكان و نیشتەجێكردنیان لە كەمپدا قووڵایی خاكی عێراق و هەرێمی كوردستان".
فوئاد حسێن لە كۆنگرەیەكی ڕۆژنامەوانیی هاوبەش لەگەڵ ئەلیكساندەر شانلبێرگ، وەزیری دەرەوەی نەمسا، وتیشی "دەستووری عێراق ڕێگە نادات بە هیچ گرووپ و پارتێكی عێراقی و غەیرە عێراقی، خاكی عێراق بۆ هێرشكردنە سەر وڵاتانی دراوسێ بەكار بهێنێت". هاوكات ئاماژەی بەە كرد كە لەگەڵ لایەنی ئێرانییش قسەیان كردووە كە نابێت هەڕەشە بكات بە بەكارهێنانی توندووتیژی و بۆردوومانكردنی هەندێك ناوچەی هەرێمی كوردستان.
ڕێكەوتننامەی ئەمنیی نێوان عێراق و ئێران كە مانگی سێی ئەمساڵ لە نێوان هەردوو وڵات و بە ئامادەیی وەزیری ناوخۆی هەرێم واژوو كرا، سەرەكیترین خاڵی چەككردنی حیزبەكانی ڕۆژهەڵاتی كوردستان لەناو خاكی هەرێم و نیشتەجێكردنیانە لە كەمپدا.
ئێستا گەرمترین و گرنگترین دۆسیە لای ئێران، ئەو ڕێكەوتننامە ئەمنییەیە لەگەڵ عێراق كە ١٩ی ئەم مانگە دوا وادەیە بۆ جێبەجێكردنی. ئێران بە شێوەیەكی چڕوپڕ لەگەڵ بەرپرسانی عێراق و هەرێم لەسەر هێڵە بۆ زوو جێبەجێكردنی ڕێكەوتننامەكە.
ئەو پرسە بەشێكی سەرەكیی بووە لە كۆبوونەوەی بافڵ تاڵەبانی سەرۆكی یەكێتی لەگەڵ بەرپرسانی ئێران لە تاران. تاڵەبانی دوێنێ لەگەڵ وەزیری دەرەوەی ئەو وڵاتە كۆبووەوە و وەزیری دەرەوە جەختی لە زوو جێبەجێكردنی ڕێكەوتننامە ئەمنییەكە كردووەتەوە.
هاوكات لەگەڵ كۆبوونەوەكەی بافڵ تاڵەبانی و وەزیری دەرەوەی ئێران، باڵیۆزی ئێران لە عێراق سەردانی هەولێری كرد و لەگەڵ مەسعود بارزانی و نێچیرڤان بارزانی و مەسروور بارزانی كۆبووەوە.
بەپێی ڕاگەیەندراوی سەرۆكایەتیی هەرێم، نێچیرڤان بارزانی "جەختی كردووەتەوە كە هەرێمی كوردستان پابەندی ڕێكەوتنی ئەمنیی نێوان ئێران و عێراقە، دڵنیاییشی داوە كە هەرگیز ڕێگە نادەن هیچ هەڕەشەیەكی ئەمنی لە هەرێمی كوردستانەوە بۆ سەر كۆماری ئیسلامیی ئێران دروست ببێت".
هاوكاتی هەوڵە دیبلۆماسییەكانی بۆ جێبەجێكردنی ڕێكەوتنە ئەمنییەكە، ئێران جووڵەی بە هێز بە ئاراستەی سنوورەكانی هەرێمی كوردستان كردووە.
ڕێكخراوی مافی مرۆڤی هەنگاو دوو گرتەی ڤیدیۆیی كاروانی سەربازیی بڵاو كردووەتەوە و دەڵێت "سوپای پاسداران هێزی زۆری سەربازی و چەكی قورسی بۆ سەقز و مەریوان و سنووری هەرێم گواستووەتەوە".
ئێران هەڕەشە دەكات كە لە ئەگەری جێبەجێنەكردنی ڕێكەوتننامەی ئەمنی لەلایەن عێراقەوە، هێرش دەكات سەر حیزبە ئۆپۆزسیۆنەكانی ڕۆژهەڵات لەناو خاكی هەرێم.
سەرەتای ئەم هەفتەیەش حزبی دیموكراتی كوردستانی ئێران ڕایگەیاند "ئێران كاتی دیاری كردووە بۆ هێرشكردنە سەر پەنابەرانی سیاسیی كورد لە هەرێمی كوردستان و عێراق". داوایشی لە حكومەتی عێراق و هەرێم كرد "ئاگاداری ئەو پلانە نیزامی و ئەمنیەتییانەی كۆماری ئیسلامی بن كە بەڕێوەن".
پێشتریش محەمەد نەزیف قادری، بەرپرسی پەیوەندییە گشتییەكانی حیزبی دیموكرات، لێدوانی بەرپرسانی ئێرانی سەبارەت بە چەككردن و كەمپنشینكردنیان بە "بێ بەها" ناوبرد و بە پەرەگرافی وت "لێدوانی بەرپرسانی ئێران بە لای ئەوانەوە نامەنتقین و ئەو قسانەی دەیكەن بنەمای دروستی نییە، دەیانەوێت بەو پاساوانەوە دەستوەردانی زیاتر لە عێراقدا بكەن".