پەرەگراف
وتەبێژی حكومەتی عێراق ڕایدەگەیەنێت، حكومەتی فیدراڵ "تەواوی ئەرك و پابەندییە داراییەكان"ی بەرانبەر هەرێم جێبەجێ كردووە و بە پێچەوانەوە هەرێم "داهاتی ڕادەست نەكردووە و سێ هێندەی بەشە بودجەكەیش پارە قەرزدارە".
شەوی ڕابردوو مەسروور بارزانی، سەرۆكی حكومەتی هەرێم، خشتەیەكی لە تۆڕی كۆمەڵایەتی ئێكس بڵاو كردەوە كە ئاماژەی نەناردنی بودجەی لە سێ مانگی ڕابردوو تێدا بوو، وتیشی "نەناردنی شایستە داراییەكانمان وەك لە بودجەی فیدرالدا هاتووە، لەلایەن بەغداوە، زیان بە هاووڵاتیانمان دەگەیەنێت، متمانە كەم دەكاتەوە و پێشێلكردنی دەستوور و ڕێككەوتنەكانیشە".
ئەمڕۆ باسم عەوادی، وتەبێژی حكومەتی عێراق، لە ڕاگەیەندراوێكدا دەڵێت "حكومەتی فیدراڵ تەواوی ئەرك و پابەندییە داراییەكانی بەرانبەر هەرێمی كوردستان جێبەجێ كردووە، هەوڵی زۆریشی داوە بۆ پێشكەشكردنی چارەسەر".
عەوادی جەخت دەكاتەوە كە "حكومەتی هەرێمی كوردستان داهاتی نەوتی و نانەوتیی بەپێی یاسای بودجەی فیدراڵ ڕادەست نەكردووە" و بەو هۆیەوە "تا كۆتایی مانگی حوزەیران، ئەو بڕە پارەیەی بەپێی خەرجیی ڕاستەقینەی دەوڵەت لە ئەستۆی هەرێمدایە، زیاتر لە سێ هێندەی پشكی هەرێمە لە بودجەدا".
وتەبێژی حكومەتی عێراق ئاماژە بە بڕیارەكەی ئەنجوومەنی وەزیرانی عێراق بۆ پێدانی قەرز بە حكومەتی هەرێم بۆ مووچە و دەڵێت "سەرەڕای جێبەجێنەكردنی ئەرك و پابەندییەكان لەلایەن حكومەتی هەرێمەوە، حكومەتی فیدراڵ بڕیاری دا كە هاووڵاتیانی عێراقیی هەرێم ئۆباڵی ئەم پابەندنەبوونە نەكەوێتە ئەستۆیان، ئەنجوومەنی وەزیران بڕیاری دا قەرز بە هەرێم بدات تا ئەو كاتەی كێشە داراییەكانی یەكلا دەكاتەوە".
"حكومەتی فیدراڵ هاوشێوەی پەرۆشیی بۆ مافی هاووڵاتیانی پارێزگاكانی تر، بۆ مافی هاووڵاتیانی هەرێمی كوردستانیش بەپەرۆشە. پابەندبوون بە یاسا فیدڕاڵییەكان و ڕێككەوتنەكان لە سێبەری دەستووردا، كورتترین ڕێگەیە بۆ تەواوكردنی گواستنەوە و ڕادەستكردنە داراییەكان و بەهێزكردنی متمانە لەنێوان هەردوولادا"، وتەبێژی حكومەتی عێراق وا دەڵێت.
ڕاگەیەندراوی وتەبێژی حكومەتی عێراق پاش ئەوە دێت كە بەرپرسانی حكومەتی هەرێم لە سەرۆكی حكومەتەوە تا وتەبێژ و زۆرینەی وەزیرەكان، لە ڕۆژانی ڕابردوودا بەغدایان بەوە تۆمەتبار كرد كە پابەندی "یاسای بودجە و ڕێككەوتنەكان" نەبوو، جەختیان لەوە كردەوە كە حكومەتی هەرێم "سەرجەم پابەندییەكانی جێبەجێ كردووە".