ئەردۆغان: لەبارەی دۆخی كەركووكەوە لەگەڵ بنەماڵەی بارزانی و سوودانی لە پەیوەندیدا بووین
پەرەگراف
سەرۆككۆماری توركیا كەركووك بە "نیشتمانی توركمان" ناو دەبات و دەڵێت "لەبارەی دۆخی شارەكەوە لەگەڵ بنەماڵەی بارزانی و محەمەد شیاع سوودانی لە پەیوەندیداین".
ڕەجەب تەیب ئەردۆغان، سەرۆككۆماری توركیا، لە كاتی گەڕانەوەی لە ڕووسیا، لەناو فڕۆكەدا وەڵامی پرسیاری ڕۆژنامەنووسانی دایەوە و وتیشی "هاكان فیدان، وەزیری دەرەوە و ئیبراهیم كاڵن، سەرۆكی دەزگای هەواڵگری (میت)م ڕاسپاردووە بەدواداچوونی ورد بۆ دۆخی كەركووك بكەن".
"لەگەڵ بنەماڵەی بارزانی و سوودانی لە پەیوەنیدا بووین. لە ئەنجامی چاودێریی ورد، ئێستا كەشێكی تا ڕادەیەك ئارام لە كەركووك هەیە"، ئەردۆغان وا دەڵێت.
بە قسەی سەرۆككۆماری توركیا، هاكان فیدان لە ئێران لێدوانێكی دەربارەی دۆخی كەركووك داوە، لە ئەنجامی ئەو لێدوانە "ئێستا بارودۆخ ئارامە".
ئەردۆغان دەشڵێت "بۆ ئەوەی ئاسایش و ئارامیی ناوچەكە تێك نەچێت، پێویستە ڕێ لە هەر كردەوەیەك بگیرێت كە قەوارەی كەركووك تێك دەدات، هەر كارێك قەوارەی كەركووك تێك بدات، مانای تێكدانی یەكپارچەیی خاكی عێراقە".
پێرێ لە لێدوانێكدا وەزیری دەرەوەی توركیا خۆپیشاندانەكانی كەركووكی بە "پشێوی" ناو برد و ئەم بابەتەشی بە پەكەكەوە بەستەوە.
هاكان فیدان وتی "بوونی پەكەكە لە شارەكە زیادی كردووە و داوا لە بەرپرسانی عێراق دەكەین كۆتایی پێ بهێنن". ئاشكرایشی كرد كە پێشتر لەوبارەیەوە "لەگەڵ سەرۆكوەزیرانی عێراق و ئیدارەی هەولێر" گفتوگۆی كردووە.
فیدان ڕایشیدەگەیەنێت "كەركووك بۆ توركمانە هاوڕیشەكانمان كە نەتەوەی ڕەسەن و دامەزرێنەری عێراقن، نیشتمانی دایكە. ئێمە لە كاتی خۆیدا هۆشداری و پێشنیازمان بە بەرپرسانی عێراق داوە و گوتوومانە كە بوار بە هەوڵی لەم جۆرە نەدرێت".
وەزیری دەرەوەی توركیا پاڵپشتیی وڵاتەكەی بۆ محەمەد شیاع سوودانی، سەرۆكوەزیرانی عێراق دووپات كردووەتەوە و دەڵێت "ئەو حكومەتەی لە عێراق بە سەركردایەتیی سوودانی پێك هێندراوە، سەقامگیریی بۆ وڵاتەكە دەستەبەر كردووە".